Read Yucateco Nehemías 6 Bible Online

Nehemías 6 - Yucateco bible

Nehemías 6

¹Le ca tu yojéeltaj Sanbalat, Tobías, Gesem le j árabeo' yéetel u láak c aj p'eeco'ob dzo'oc in lik utzquintic u tuulumil Jerusalén cu dzo'ocol xane' ma' tin p'ataj mix jun p'éel jool beji', (quex ma' in dzáa u jool najilo'ob tu cúuchilo'obi'),

²Sanbalat yéetel Geseme' tu túuxtajo'ob ti' teen u t'aanil u ti'al ca muuch'laco'on ti' jun p'éel u péet caajilo'ob u táax lu'umil Ono. Ba'ale' chéen u káato'ob ca'ach u beeto'ob ti' teen loob.

³Ca tin túuxtaj a'albil ti'ob, yaan ba'ax jach kabéet in beetic let o'olale' ma' tu páajtal in bin, tumen wa quin bine', le meyajo' cu jáawal u beeta'al.

⁴Can téen tu túuxtajo'ob t'anbilen, ba'ale' láili' bey tin núuquila' ti'obo'.

⁵Sanbalat túune', tu túuxtaj yéetel jun túul u palitzile' u cinco u téenel u t'aanil ti' jun p'éel ju'un je'ekab,

⁶cu ya'alic beya': Táan u ya'ala'al ichil le máaco'obo' teech yéetel le judiobo', táan bin a jok jo'oltique'ex jun p'éel lik óolal, bey xan u ya'alic Gesem, le t o'olal bin táan a lik utzquintique'ex le tuulumo'. Cu ya'alale' teech bíin a beet u ajawil ichilo'ob,

⁷dzo'oc bin a wa'alic máaxo'ob bíin Ka'aytico'ob teech u ajawil Jerusalén, beyo' ca u ya'alo'ob yaan ajaw Judá. Le ba'alo'oba' je'el u kuchul tu xiquin ajaw Artajerjese', le t o'olale' co'oten ca tzicbalnaco'on.

⁸Ca túun tin túuxtaj a'albil ti', le ba'ax cu ya'alalo' ma' jaji', chéen u jok jo'ol le máaco'obo'.

⁹Tumen leti'obe' u káato'ob u ja'aso'ob c óol, beyo' je'el c xúump'atic le meyaj c beetico'; ba'ale' tene' tin dzaj tuláacal in wóol u ti'al in beetic.

¹⁰Cu dzo'ocole' j binen tu yotoch Semanías u paal Delaía u yáabil Mehet-abel, leti'e' u kalmajubáa ca'ach tu yotoch, ca tu ya'alaj ti' teen: Co'ox muuch'ubáa tu kulnaj Junab Ku ichil le quili'ich najo', ca c kal u jool najilo'ob tumen u tucultmajo'ob u taal u quíimsecho'ob ti' le áakaba'.

¹¹Ba'ale' tene' tin núucaj ti': Le j xiibo'ob je'el bix teena', ma' tu yáalcabo'ob mix tu ta'acbesicuba'ob ichil kulnaj u ti'al ma' u quíimsa'al. Tene' ma' tin wocoli'.

¹²U láak ba'ale', le ba'ax cu ya'alic ca'acho', tin wu'uyaj ma' ti' Ku u taali', chéen cu ya'alic tin wo'olal tumen j bo'ota'ab tumen Sanbalat yéetel Tobías;

¹³j bo'ota'ab u ti'al u dzáa sajaquil ti' teen, u ti'al ca kebanchajaquen, u ti'al xan u dzáiqueno'ob kaasil tu táan le máaco'obo'.

¹⁴¡In Ku: ka'ajac ti' teech le ba'ax tu beetajo'ob Sanbalat yéetel Tobíase'! ¡Ma' xan a tu'ubsic Noadías, le x aj bóobate', mix le u láak aj bóobato'ob tu yóoltajo'ob u sajbejseno'obe'!

¹⁵Le tuulumo' j dzo'ocbesa'ab tu kiinil veinticinco ti' u winalil Elul, cincuenta yéetel ca'a p'éel kiin tu bisaj u beeta'al le meyajo'.

¹⁶C aj p'eco'obe' tu yojéeltajo'ob, tuláacal xan le múuch' caajo'ob yano'ob t bakpacho' tu ch'a'ajo'ob sajaquil, ca tu ch'a'ajo'ob subtal, tumen tu na'atajo'ob, yéetel u yáantaj Ku beeta'ab le meyajo'.

¹⁷Ti' le kiino'obo' sen paaclan dzíibnajo'ob Tobías yéetel u nuuquilo'ob Judá,

¹⁸tumen ya'abcach máac u jalach t'anmajo'ob nup óolal ti' j Tobías, chéen tu yo'olal u ja'an Secanías u paal Ara, yéetel tumen u paal Johanane' j dzo'oc u beel yéetel u x ch'upul paal Mesulam, u paal Berequías.

¹⁹Le beetic cu ya'ala'al ca'ach tin táan jach utzil wíinic, bey xan cu láaj tzicbalta'al ti', le ba'axo'ob quin wa'alico'. Wa tu yo'olal Tobíase' le ti'e' cu túuxtic ti' teen dzíibo'ob u ti'al u ja'asic in wóol.