Read Yucateco Nehemías 8 Bible Online

Nehemías 8 - Yucateco bible

Nehemías 8

¹Much'laj túun tuláacal le caaj te j kíiwic yaan actáan te tu jool le ja'o', ca j a'ala'ab ti' le aj ca'anbesaj Esdraso', ca u taas le u ju'unil u ya'almaj t'aan Moisés, le tu dzaj ca'ach Yuumtzil ti' Israele'.

²Tu yáax kiinil u siete winale', le aj kiin Esdrase' tu taasaj le u ju'unil le a'almaj t'aano' tu táan le u múuch'cabil j xiibo'ob yéetel x co'olelo'obo' bey xan tu táan le máaxo'ob cu páajtal u ch'a'a nu'uctico'obo';

³líikbal ja'atzcab kiin tac chúumuc kiine' tu xocaj tu táan tuláacal leti'ob te j kíiwic yaan actáan ti' u jool caaj cu kaaba'intic Ja'. Tuláacal le caajo' táan u ch'enxiquintic u xo'ocol u ju'unil le a'almaj t'aano'.

⁴Aj ca'anbesaj Esdrase' ti' wa'alacbal tu yóokol jun p'éel u nu'ucul tze'ec beeta'an yéetel che' chéen u ti'al lelo'. Tu x no'oje' ti' wa'alacbalo'ob xan Matatías, Sema, Anías, Urías, Hilcías yéetel Maasías. Tu x dzíique' ti' yano'ob ca'ach Pedaías, Misael, Malquías, Hasum, Hasbadana, Zacarías yéetel Mesulam.

⁵Esdras túune' tu je'aj le dzíibil ju'un tu táan tuláacal le caajo', leti'e' cu páajtal u yila'al ca'ach tumen asab ca'anal yanil ti' tuláacalo'ob; le ca tu je'aj le dzíibil ju'uno', tuláacal máac wa'alaji'.

⁶Esdras túune' tu qui'iqui' t'antaj Junab Ku Yuumtzil ti' máax yaan tuláacal páajtalil, tuláacal túun le caajo' u tich'majo'ob u kabo'ob ca'anale' ca tu ya'alajo'ob: Ca béeyac, ca béeyac le ca j dzo'oque' j noclajo'ob lu'um ca tu kultajo'ob Yuumtzil.

⁷Le j levitaob Josué, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán yéetel Pelaíae' cu tzolico'ob le a'almaj t'aan ti' le caajo'. Ca'aliquil le máaco'obo' p'áatalo'ob tu cúuchilo'ob,

⁸le aj levitaobo' táan u ka'am xoquico'ob u ju'unil u ya'almaj t'aan Ku, yéetel cu sutico'ob ichil u t'aan le máaco'obo' u ti'al ca páatac u yutzil na'atico'ob le xooco'.

⁹Tu yo'olal tuláacal le caaj táan u yokol iquil u yu'ubico'ob le ba'axo'ob cu ya'alic le a'almaj t'aano', aj méektáan Nehemías bey xan aj ca'anbesaj aj kiin Esdras, bey xan le j levitaob, máaxo'ob tzolic le a'almaj t'aan ti' le caajo', tu ya'alajo'ob ti' tuláacalo'ob ma' u yokom óolta'alo'ob mix u yokolo'ob, tumen le kiino' jun páaycunsa'an u ti'al u meyajta'al Yuumtzil, u Kuob.

¹⁰A'ala'ab xan ti'ob tumen Esdras: Xeene'ex tzéentaba'ex yéetel u ma'alobil janal, uke'ex xan ch'ujuc vino, siibalnene'ex ti' le máaxo'ob mix ba'al u máanka'antmajo'obo', ca taalaco'ob janal ta wéetele'ex, tumen bejela'e' jun p'éel kiin jun páaycunsa'an u ti'al c Yuumtzil. Ma' a wokom óolale'ex tumen u qui'imac óolal Yuumtzile' leti' c muuk.

¹¹Bey xan le j levitaobo' cu jóomsic yóolo'ob le máaco'ob u ti'al ca u mac u chi'ob ma' u yokolo'ob, tumen le kiino' jun p'éel kiin jun páaycunta'an u ti'al Yuumtzil.

¹²Bey túuno' tuláacal le máaco'obo', j bino'ob janal yéetel ukul, tu paaclan t'oxajo'ob janalo'ob, tu beetajo'ob jun p'éel nojoch kiin ku, tumen j kuch u na'ato'ob le ba'ax ca'anbesa'ab ti'obo'.

¹³Tu láak kiine' tuláacal u nuuquil le otochnáalo'obo', aj kiino'ob yéetel j levitaob tu much'ajuba'ob yéetel aj ca'anbesaj Esdras u ti'al ca u cano'ob bix u na'ata'al u t'aanilo'ob le a'almaj t'aano'.

¹⁴Ca tu yilajo'ob dzíibta'an ti' le a'almaj t'aano', Yuumtzile' u ya'almaj tu chi' Moisese', tu kiinilo'ob u kiinbesajil tu siete winalile' le j israelitaobo', u najmal u cajtalo'ob tu yáanal u máacano'ob.

¹⁵Ti' tuláacal túun le caajo'ob yéetel te Jerusaleno' j bisa'ab u t'aanil ca xi'ico'ob ti' le pu'uco'obo' u caxto'ob u kabo'ob olivo, arrayán, xa'an wa u láak je'el ba'alac che'il búucpaja'ane' u ti'al u beetico'ob u máacano'ob, je'el bix dzíibta'anil ti' le a'almaj t'aano'.

¹⁶Le máaco'obo' jóoko'ob, le ca j suunajo'obe' yéetel u kab che'ob u ti'al u beetico'ob u máacano'ob tu yóokol u najo'ob, ti' u táancabo'ob, bey xan ichil u sujuy táancabil u kulnaj Ku, bey xan tu kíiwiquil u jool najil cu kaaba'intic Ja'o' yéetel tu kíiwiquil u jool caajil Efraín.

¹⁷Tuláacal le j suunajo'ob yano'ob ca'ach táanxel lu'umo' tu beetajo'ob máacano'ob ca j cajlajo'ob yáanal, tumen líikbal u kiinilo'ob Josué, u paal Nun tac le kiinaco' ma' beeta'ac ba'al beyo', ca j yanchaj jun p'éel nojoch qui'imac óolal.

¹⁸Siete kiino'ob tu kiinbesajo'ob u qui'imac óolalil kultajo'ob; líikbal u yáax kiin tac u dzo'oc kiin, Esdrase' sáamsamal tu xocaj u ya'almaj t'aan Ku, tu ocho kiine' yanchaj jun p'éel x qui' óotzil muuch'tal, je'el bix a'ala'anile'.