Read Yucateco Nehemías 9 Bible Online

Nehemías 9 - Yucateco bible

Nehemías 9

¹Tu kiinil veinticuatro láili' ti' le winalo', le j israelitaobo' tu much'ajuba'ob u ti'al su'ukin, u búuquintmajo'ob to'otoch nooko'ob, yéetel tu tosajo'ob lu'um tu poolo'ob,

²Ca tu tzelajuba'ob ti' le u ch'i'ibalo'ob le j táanxel lu'umilo'ob, wa'alacbalo'obe' tu cáanto'ob u kebano'ob, bey xan u kebano'ob u máanja'an ch'i'ibalo'obo'.

³Tu yóox p'éel horail wa'alacbalo'obe' j xo'oc u Ju'unil u ya'almaj t'aan Yuumtzil u Kuob, ti' u láak óox p'éel horae', tu cáantajo'ob u kebano'ob, tu kultajo'ob xan Yuumtzil.

⁴Cu dzo'ocole' le j levitaob Josué, Binuy, Cadmiel, Sebanías, Buni, Serebías, Bani yéetel Quenani, na'aco'ob ti' jun p'éel u ca'anche'il tze'eque', ca j ka'am payalchi'inajo'ob ti' Yuumtzil c Ku.

⁵Cu dzo'ocole' le j levitaob Josué, Cadmiel, Binuy, Hasabnías, Serebías, Hodías Sebanías yéetel Petaíase': tu ya'alajo'ob: Líikene'ex, qui' t'ante'ex Yuumtzil a Junab Kuex mantadz. ¡Úuchuc kaay ti', yéetel qui'iqui' t'aano'on tac xan yéetel qui'ichquelem kaayo'ob, ti' u nojbe'en kaaba'!

⁶Esdrase' tu ya'alaj: Chéen teech Yuumtzilech mina'an u láak. Teech beet ca'an yéetel u sen ca'analil le ca'ano', yéetel tuláacal u eeko'obo'; teech beet le lu'umo', yéetel tuláacal ba'ax yani', bey xan le ka'anabo' yéetel ba'ax yaan ichil. Teech ca dzáic cuxtal ti' tuláacal le ba'ax yano'. Le t o'olal ca kulta'al tumen u eekilo'ob le ca'ano'.

⁷Yuumtzil teech le Junab Ku j yéey Abram le ca ta jóokesaj Ur, u caajal le j caldeobo', ca ta dzaj u kaaba'int Abraham.

⁸Tumen ta wilaj jun túul máac u yoquesmaj u yóol ti' teech, ca ta beetaj jun p'éel nup t'aan tu yéetel: ta wa'alaj bíin a dzáa ti' yéetel ti' u ch'i'ibal, u lu'um le j cananeob, hititaob, amorreob, ferezeob, jebuseob yéetel gergeseobo'; ¡dzo'oc a beetic le ba'ax ta wa'alajo', tumen teche' ca dzo'ocbesic a t'aan!

⁹Teche' ta wilaj bix u mukyaj le c máanja'an ch'i'ibalo'ob tu lu'umil Egipto, ta wu'uyaj xan u yaayaj awato'ob tu jáal Chac Ka'anab.

¹⁰Ta beetaj nucuch máactzilo'ob yéetel jakbe'en ba'alo'ob tu yóokol faraón, u aj meeyjulo'ob, bey xan tu yóokol tuláacal u cajnáalilo'ob le lu'umo', tumen ta wilaj buca'aj ba'alo'ob kaastac cu beeta'al ca'ach tu cuxtalo'ob le j israelitaobo'. Bey ta najmatilac u kaj óolta'al bejela'a' a nojochilo'.

¹¹Ta jóosaj ca'a búuj ti' le ka'anab tu táano'obo', j máano'ob tu yóokol tiquin lu'um; ba'ale' ta bulaj u aj ch'a'apachto'ob tac tu taamil le ka'anabo', beyo'ob tuunich tu taamil ja'e'.

¹²Cu dzo'ocole' ta dzaj jun p'éel múuyal u ti'al nu'uctic u beelo'ob yéetel kiin, yéetel áakabe' jun p'éel u tóoch'bal káak u ti'al julic le bej u najmal u bino'obo'.

¹³Cu dzo'ocole' j éemech tu witzil Sinaí, ca j t'aanajech yéetelo'ob ti' yanech te j ca'ano', ta dzaj ma'alob tzol xiquino'ob ti'ob, u jaajilo'ob ca'anbesajo'ob, ta dzaj xan a'almaj t'aano'ob yéetel nu'ucbe'en t'aano'ob utztac.

¹⁴Ta ca'anbesajo'ob xan u jun páaycunto'ob a ti'alint u kiinil sábado'ob, ta dzaj a nu'ucbe'en ta'ano'ob, a ma'alob ca'ansajo'ob, ta dzaj xan a wa'almaj t'aano'ob ti'ob tu kab Moisés.

¹⁵Ta dzaj xan u waajil ca'an ti'ob u ti'al u na'ajcunsicuba'ob, yéetel u ja'il cháaltun u ti'al máanso'ob u yukajilo'ob. Cu dzo'ocole' ta wa'alaj ti'ob ca ococo'ob cajtal te j lu'um ta séeb chi'itaj ti'obo'.

¹⁶Ba'ale' leti'ob yéetel u máanja'an ch'i'ibalobe' ca'analchaj u yicho'ob, yéetel u dzu'uy poolo'ob, ma' xan tu táan óoltajo'ob a nu'ucbe'en t'aano'obi'.

¹⁷Ma' tu yóoltajo'ob u yu'ubaj t'antecho'obi', mix u ka'ajbeso'ob le nucuch ba'alo'ob ta beetaj tu yo'olalo'obi'. Tu yo'olal u jach dzu'uyil u poolo'obe' tu dzajo'ob jun túul u nojchilo'ob u ti'al u ca su'utco'ob Egipto u ti'al ca palitzilta'aco'ob tu ca'a téen, ba'ale' teche' jun túulech Ku ca sa'atsaj, jun túulech Ku utz a ch'a'a óotzilil, chuca'an u yóol, chuca'an u yaacunaj, ma' xan ta xúump'atajo'obi'.

¹⁸Quex tumen tu beetajo'ob jun p'éel chan wacax yéetel yibbil fierro, tu ya'alajo'ob xan leti' le ku jóokesajo'ob tu lu'umil Egiptoe', tu beetajo'ob xan ba'alo'ob talam kaastaque',

¹⁹teche' tu yo'olal a nojoch yaacunaje' ma' ta xúump'attajo'ob te x tocoy lu'umo'. Le t'o'ol múuyalo' ma' j náachchaj ti'ob yéetel kiin, u ti'al ca nu'ucta'ac u beelo'ob, mix yéetel áakab náachchaj le t'o'ol káak u ti'al u julic le bej tu'ux bíin u bisa'aco'ob ca'acho'.

²⁰Cu dzo'ocole' ta dzaj a ma'alob pixan u ti'al a ca'anbesico'ob, mix jun téen mina'anchaj le waaj ta túuxtaj ti'obo', ta dzaj xan ja' u ti'al a máansic u yukajilo'ob.

²¹J máan cuarenta ja'abo'ob táan a tzéentico'ob te x tocoy lu'umo', mix jun téen j p'áato'ob yéetel dzíibolal, mix laabchaj u nooko'obi', mix chu'uplaj u yooco'obi'.

²²Ta kubaj ti'ob ajawilo'ob yéetel nucuch lu'umo'ob, ca ta t'oxaj ti'ob jujun xéet' lu'um, leti'obe' tu ch'a'ajo'ob Esbón u nojoch lu'um ajaw Sehón, yéetel Basán, u lu'um ajaw Og.

²³Ta beetaj u ya'abtal u paalo'ob je'el bix ya'abil le éeko'ob yaan te j ca'ano', cu dzo'ocole' ta bisajo'ob j cajtal te nojoch lu'um ta séeb chi'itaj a dzáic ti' u máanja'an ch'i'ibalo'ob u ti'alinto'obo'.

²⁴Leti'obe' j ooco'obe' ca tu ba'ateltajo'ob u lu'umil Canaán; ta t'onquintaj tu táano'ob u cajnáalilo'ob le lu'umo', ta kubaj tu kabo'ob u ajawo'ob yéetel u cajnáalilo'ob u ti'al ca u beeto'ob yéetelo'ob je'el ba'alac u káato'obe'.

²⁵Tu ch'a'ajo'ob xan nucuch caajo'ob tuulumta'ano'ob, tu ch'a'ajo'ob xan ma'alob lu'umo'ob, u asab jadzutzil najo'ob, ch'e'eno'ob, coolo'ob, u x péetpachil olivo'ob, yéetel ya'abcach pakalbil che'ob janalbe'en u yicho'ob, tu na'ajcuntajuba'ob, polocchajo'ob, tu qui'imaccunsajo'ob xan u yóolo'ob ti' a nojoch utzil.

²⁶Ba'ale' j ko'oxchajo'ob ti' a t'aan, j p'u'ujo'ob ti' teech, ca tu kex óolta'ajo'ob a wa'almaj t'aan. Tu químsajo'ob a aj bóobato'ob, tumen cu ye'esa'al ca'ach u kebano'ob, yéetel cu ya'ala'al ti'ob ca suunaco'ob ti' teech, ca tu seten pajo'ob a subtal.

²⁷Le beetic ta kubajo'ob tu kab u aj p'eeco'ob máaxo'ob yaayaj palitzilto'ob. Cu dzo'ocole' le táan u yaayajo'obe', tu káatajo'ob áantaj, teech túune' tu yo'olal a nojoch ch'a'a óotzile', ta wu'uyajo'ob te ta ca'anilo', ca ta dzaj máaco'ob u ti'al u jáalkatico'ob tu kab le máaxo'ob yayaj paliltziltco'obo'.

²⁸Ba'ale', chéen p'elac u yantal jun p'íit jéedzel ti'obe', cu ca'a' beetico'ob ba'alo'ob kaastac ta táan, le t o'olal ta cha'aj u lúubulo'ob tu kab u aj p'eeco'ob u ti'al u yaayaj palitzilta'abo'ob, cu dzo'ocole' tu ca'a káatajo'ob áantaj ti' teech, teche' tu yo'olal a sen yaacunaje' ta wu'uyajo'ob yanilech te j ca'ano', ca ta tocajo'ob ya'ab u téenel.

²⁹Ta tzol xiquintajo'ob u ti'al ca u dzo'ocbeso'ob a wa'almaj t'aan, ba'ale' leti'obe' tu tuclajo'ob ma' kabéet u yáanta'alo'obi', le beetic ma' tu yu'ubajo'ob a t'aani', ca tu manba'alcuntajo'ob a tzol xiquino'ob, le cu dzáic cuxtal ti' le máaxo'ob beetique', jach líik u yóolo'ob, dzu'uy poolo'ob, le beetic ma' tu yu'ubajo'ob a t'aani'.

³⁰Ya'abcach ja'abo'ob chucpaj óolal ti'ob, yéetel a pixan bey xan yéetel a aj bóobato'obe' ta wa'alaj ti'ob ba'axo'ob je'el u yúuchul ti'obe'; ba'ale' ma' tu yu'ubajo'obi', let o'olal ta kubaj tu kab u nucuch caajilo'ob le lu'uma'.

³¹Ba'ale' tu yo'olal a nojoch ch'a'a óotzilile' ma' ta xu'ulsajo'obi', mix ta xúump'attajo'obi', tumen teche' jun túulech Ku utzech yéetel yaan ti' teech muumun pucsi'ikal yéetel ch'a'a óotzilil.

³²Le t o'olale', c Junab Ku, nojoch Ku, u Kuil tuláacal páajtalil, yéetel sajbe'entzilech, ma' ta xu'ulsic a nup t'aan mix a noj yaacunaj, ma' a jun p'iitcunsic tuláacal le mukyajo'ob dzo'oc u máan yóokol c ajawo'ob, c aj méektáano'ob, c aj kiino'ob yéetel c aj bóobato'ob, yéetel ti' c máanja'an ch'i'ibalo'ob bey xan yóokol tuláacal le a caaja', líikbal u kiinil ajawo'ob Asiria tac bejela'e'.

³³Ba'ale' teche' mina'an a si'ipil ti' tuláacal le ba'ax úuch ti' to'ono', tumen teche' a meyaje' nu'uca'an, ba'ale' to'one' t beetaj ba'ax kaas.

³⁴Mix c ajawo'ob, c aj méektáano'ob, c aj kiino'ob mix c máanja'an ch'i'ibalo'ob tu dzo'ocbesajo'ob a wa'almaj t'aan, mix tu yu'ubajo'ob a nu'ucbe'en t'aan le ta wa'alaj ti'ob u beetico'obe'.

³⁵Ba'ale' ma' tu meyaj techo'ob tu ajawilo'obi' quex tumen ya'ab utz ta dzaj ti'ob, ta kubaj xan le nojoch lu'um ti'obo', mix tu kultajecho'obi', mix tu wet'o'ob le ba'alo'ob kaastac cu beetico'obo'.

³⁶Pacto'oni', suunajo'on palitzilil, jach te j lu'um ta dzaj ti' c máanja'an ch'i'ibal u ti'al u tzéenticuba'ob yéetel u ma'alobil u yich le lu'uma'.

³⁷Tuláacal ba'ax cu dzáique' u ti'al le ajawo'ob, tu yo'olal c kebano'obe' ta dzaj t óokolo'on. To'on yéetel c wacaxo'obe' yaan c beetic ba'ax u káato'ob, let o'olal yaj c óol.

³⁸Tu yo'olal le ba'alo'oba', to'one' c ma'alob c jedzcuntic yéetel c dzíib, le ju'un xano' dzalabkabta'ab tumen c nuuquilo'ob c caajal, j levitaob yéetel le aj kiino'ob'.