Read Yucateco Ester 2 Bible Online

Ester 2 - Yucateco bible

Ester 2

¹Cu dzo'ocol u máan dze'edzec kiino'obe', le ca jóom u yóol ajaw Asueroe', ka'aj ti' ba'ax ca'ach tu beeta x Vasti, yéetel bix lúubic tu yóokol le xotkiin j beeta'abo'.

²U nuuquilo'ob u méetáane' tu ya'alajo'ob ti': Kabet u caxta'al u ti'al ajawe' x qui'ichpantac yéetel x sujuy ch'úupalal.

³Ajawe' unaj u caxantic máaco'ob ichil tuláacal u caajnáalilo'ob u ajawil ca u kubent t'aan ti'ob, u ti'al ca láaj taaso'ob tac tu jalach naj le co'olelo'obo', le yaan ti' ajaw tu tuulum caajil Susa, ca dza'abaco'ob u canant Hegai máax canantic ca'ach le co'olelo'obo', tumen ajawe' yoojel utz u tuucul. Hegai xane' ca u beet u jach qui'ichpamcunta'alo'ob.

⁴Le x ch'úupal cu bin sen utztal tu yich ajawe' dza'abac bey x ajawil u ti'al ca u jeelint x Vaasti. Le t'aana' utzchaj tu xiquin ajaw, ca j beeta'ab beyo'.

⁵Tu tuulum caajil Susae', caja'an ca'ach jun túul judío u kaaba'intmaj Mardoqueo u paal Jair ti' u ch'i'ibal Simei u cajnáalil Cis, ti' u ch'i'ibalilo'ob Benjamín.

⁶Jun túul ti' ichil le bajun máaco'ob jóoksa'abo'ob Jerusalén tumen Nabucodonosor u ajaw Babilonia, le ca j bisa'abo'ob pa'ate' yéetel Jeconías u ajaw Judae'.

⁷Mardoqueo yaan ca'ach jun túul u x ca'a yíidzin, x ma' yuum yéetel x ma' na', le ca j quíimo'obe' tu ch'a'aj u ti'al u tzéentic bey jun túul u x ch'úupale', u kaaba' ca'ache' x Hadasa, wa x Ester, leti'e' jach qui'ichpam ca'achi, t'a'aj xan u yila'al.

⁸Le ca j dza'ab ojéeltbil u ya'almaj t'aan ajawe', ya'ab x ch'úupalal bisa'abo'ob jalach naj tu tuulum caajil Susa, ca dza'abo'ob canantbil tumen Hegai, u aj canan co'olelo'ob, ichilo'obe' ti' yaan ca'ach Esteri'.

⁹Le x ch'úupala' jach j lúub utzil tu yich Hegai lela' leti' j beet u dzáic u yóol u yáantic, beya' Hegaie' tu séeblaquil tu caxantaj tuláacal ba'ax kabéet u ti'al u sen qui'ichpamcuntic, tu dzaj xan u ma'alobil janal ti'; tu dzaj siete u asab ma'alobil x palitzilo'ob yaan jalach naj u ti'al ca meyajta'ac, yéetelo'obe' tu bisaj tu asab ma'alobil káasabo'ob yaan tu jalach naj x le co'olelo'ob.

¹⁰Estere' ma' tu ya'alaj ti' ba'ax ch'i'ibal u taali' wa máaxo'ob u láaktzilo'ob, tumen Mardoqueoe' tu sen kubentaj ti' bic u ya'ale.

¹¹Mardoqueoe' sáamsamal cu susutanquil actáan ti' u kíiwiquil tu jalach naj co'olelo'ob, u ti'al u yojéeltic bix yanil Ester wa utz yanil wa ma'alob u bin ti'.

¹²Tuláacal le x ch'úupalo'obo', doce winalo'obe', cu beeta'al wa ba'ax u ti'al u qui'ichpamtalo'ob. Le yáax táancoch ja'abo' cu cu'ulta'al tu wíinclilo'ob u aceiteil mirra, u láak táancoch ja'abe' cu ji'ibil ti'ob qui'iboc ba'alo'ob je'el bix suuc u dzáic le co'olelo'obo'. Cu dzo'ocole', jujun túul le x ch'úupalal cu bino'ob tu táan ajaw Asuero,

¹³cu cha'abal ca'ach u bisic tuláacal ba'ax cu káatic, le yaan tu jalach naj co'olelo'obo', tac tu jalach naj ajaw.

¹⁴Cu bin ca'ach jalach naj tu yáakabtal, tu sáastal u láak kiine' cu máan ti' jun láak tzéelil u jalach naj le co'olelo'obo', le máax canantic ca'ach le cúuchilo' cu kaaba'intic Saasgaz tumen ajawe' yojel jun túul máac jach utz u tuucul, u yaj canan le x keecho'obo'; Cu dzo'ocol lelo' ma' tu suto'ob tu táan ajaw chéen ja'ali' ca utzac tu yich ajaw, wa ca túuxta'ac t'aanbile'.

¹⁵Ester u x ch'upul paal Abihail u dzeyuum Mardoqueoe', le ca j yanchaj u bin tu táan ajawe', tu bisaj chéen le ba'ax a'alab ti' tumen Hegai le máac ojeéela'an tumen ajaw utz u tuucule', máax canantic xan le co'olelo'obo'. Ti' túun lelo' x Estere' dzo'oc u lúubul utzil ti' tuláacal le máaxo'ob táan óoltico'.

¹⁶X Estere' j bisa'ab tu táan ajaw Asuero, tu winalil diez cu kaaba'intic xan Tebet, tu siete ja'abil u ajawil.

¹⁷Asueroe' tu sen yabiltaj Ester, mix jun téen ca'ach u yaabiltmaj u láak co'olel beyo', leti'e' tu ti'altaj u yaacunaj Asuero, máan ti'ip'a'an utz beeta'ab ti', ma' bey ti' u láak x ch'úupalo'ob ti'anchajo'ob yéetele', ca tu dzaj túun u x péet jo'ol ca tu dzaj bey x ajaw u ti'al u jeelint Vasti.

¹⁸Cu dzo'ocole' tu beeta jun p'éel nojoch janal ti' u tzicbe'enil x Ester, ca tu t'anaj janal u yéet nuuquilo'ob yéetel u j meyajo'ob u ajawil, tu yéemsaj u bo'olal páatan ti' le caajo'obo', tu t'oxaj xan ya'abcach siibalo'ob je'el bix unaj u yutzil siibal jun túul ajawe'.

¹⁹Ti' u kiinilo'obo' suuc u bisa'alo'ob le x ch'úupalo'ob tu láak jun tzéelil u jalach najil le co'olelo'obo', Mardoqueoe' ti' ca'ach culucbal tu jool najil le jalach najo'.

²⁰Jach je'el bix tzolxiquinta'abic tumen Mardoqueoe', Estere' ma' tu ya'alaj mix ba'al tu yo'olal u caajal mix ti'olal u láaktzilo'obi', ba'ale tu dzo'ocbesaj le tzolxiquin dzaab ti' tumen Mardoqueo le ca'ach ti' yaan tu yéetele'.

²¹Ca'aliquil culucbal Mardoqueo tu jool le jalach najo', tu yu'ubaj u tzicbalo'ob Bigtán yéetel Teres, ca'a túul náacomo'ob cu canantico'ob u jool jalach naj, le ca'a túul máaco'oba' seten p'uja'ano'obe' táan u tuucultico'ob bix bíin u quíimso'ob ajaw Asuero.

²²Le ca tu yu'ubaj Mardoqueo le x mucul tzicbala' tu ya'alaj ti' x ajaw Ester, leti'e' tu ya'alaj ti' ajaw bey u kuben t'aan Mardoqueoe'.

²³Le ba'ala' káat péectzilta'ab wa jaaj, le ca j ojéelta'ab jach jaaje' le ca túul náacomo'obo' ji'ich' u caalo'ob. Le ba'ax úucha' dzíibta'ab tu táan ajaw u ti'al ca p'áatac bey jun p'éel jaajcunaj tu dzíibil ju'unil tu'ux dzíibta'ab u tzicbalil le lu'umo'.