Read Yucateco Ester 3 Bible Online

Ester 3 - Yucateco bible

Ester 3

¹Cu dzo'ocol u máan dze'edzec kiino'obe', ajaw Asueroe' tu dzaj Amán u paal Hamedata u ch'i'ibal Agague', u beet u nojoch méektáanil le lu'umo'.

²tuláacal le máaxo'ob cu meyajtic ajaw tu jalach naje', cu xoltalo'ob yéetel cu chin jo'oltico'ob le quéen máanac Amane', wa le quéen wa'alaco'ob tu táane' tumen bey tu ya'aljilac le ajawo'; ba'ale' Mardoqueoe' ma' tu yóoltaj u dzo'ocbes le ba'ax a'ala'abo'.

³Ca túun j káatchi'ita'ab tumen u aj meyajo'ob ajaw ba'ax óolal ma' tu dzo'ocbesic le t'aan tu dzaj le ajawo'.

⁴Sáamsamal cu beeta'al ti' láili' le káatchi'a', ba'ale leti'e' cu beetic bey ma' tu yu'ubique'. J bino'ob túun u tzicbalto'ob ti' Amán, u ti'al u yilico'ob ba'ax bíin u beet Mardoqueo, wa je'el u kexic u t'aane', tumen dzo'oc ca'ach u ya'alic Judío.

⁵Amane' le ca tu yilaj jach tu jaajil Mardoqueoe', ma' tu xoltal tu táan mix tu chíin jo'ol le quéen máanaque', ca j sen p'u'uji;

⁶le ca tu yojéeltaj ti' ba'ax ch'i'ibalil u taal Mardoqueoe', tu tuucultaj u beetic loob ma' chéen ti' leti'i', ca jo'op' u tuucultic bix bíin u xu'ul tuláacal le j judíob caja'ano'ob tu ajawil Asuero.

⁷Ti' u yáax winalil le ja'abo', u káat ya'ale' u winalil Nisán, tu ja'abil doce ti' u ajawil Asueroe', tu táan Amane' tu bulajo'ob ba'ax kiin yéetel ba'ax winalil unaj u dzo'ocbesico'ob le ba'ax dzo'oc ca'ach u kax t'aantico'obo', jóok u kiinil trece ti' u winalil doce, u káat ya'ale' u winalil Adar.

⁸Amane' tu ya'alaj ti' ajaw Asuero: Ichil ti' tuláacal le caajo'ob cu méektáantic u ajawil a tzicbe'enile', yaan jun p'éel caaj u jun páaycuntmajubáa ti' le u láako'obo'; u ya'almaj t'aano'obe' jela'an ti' le u ti'al u láak táabal caajo'obo', ma' tu dzo'ocbesico'ob u t'aan a tzicbe'enil. ma' u najmal u p'áatalo'ob cajtal ta ajawili', ma' utz u ti'al a tzicbe'enili'.

⁹Wa utz u tuucultic a tzicbe'enile', jóokoc jun p'éel t'aan ca u ya'al, ca xu'ulsaco'ob, tene' bíin in dzáa treinta wuudzo'ob plata ti' u nuuquilo'ob le máaxo'ob canantic u ayikalil jalach najo'.

¹⁰Ajaw túune' tu lukesaj u x dzipit kabe', ca tu dzaj ti' Amán u aj p'eec le judíobo',

¹¹ca tu ya'alaj: Je'el u páajtal a p'áatal yéetel le platao wa tu yo'olal le caaj ca wa'alico' beet yéetel je'el ba'ax a káate'.

¹²Tu kiinil trece ti' u yáax winalil le ja'abo' j t'a'ano'ob u aj dzíibo'ob ajaw u ti'al u dzíibto'ob ba'ax tu ya'alaj Amán, ti' u méektáano'ob le múuch' caajo'obo', bey xan ti' le táabal cajo'ob yéetel ti' u nuuquilo'ob le jujun p'éel múuch' caajo'obo'. Le ju'uno'oba' j dzíibta'ab je'el bix u t'aan tuláacal le caajo'obo'. J dzíibkata'ab xan tu kaaba' ajaw, ca j dzalab kabta'abo'ob yéetel u dzalabil ajaw,

¹³ca j túuxta'abo'ob tu séeblaquil yéetel aj bisaj ju'uno'ob ti' tuláacal u táabal caajilo'ob le ajawilo'. Tu'ux cu ya'alal ca xu'ulsa'ac ti' jun p'éelili' kiin tuláacal le judíobo', je'el bixaco'obe', táanquelemo'ob, nuxibo'ob, mejen paalal, co'olelo'ob, yéetel ca ch'a'abac xan tuláacal ba'ax u ti'alo'ob. Le kiin yéeya'ano', u kiinil trece tu winalil doce, u káat ya'ale' u winalil Adar.

¹⁴U x ca'a dzíibil u ju'unil le a'almaj t'aana' xo'oc j u'uybil, ca j dzaab xan ojéeltbil ti' u cajnáalilo'ob le táabal caajo'obo', u ti'al u pa'atico'ob u kuchul le kiino'.

¹⁵Le j bisaj ju'uno'ob j bino'ob tu séeblaquil u biso'ob je'el bix a'alabic tumen le ajawo', le a'almaj t'aana' ti' jóok tu tuulum caajil Susa. Ca'aliquil ajaw yéetel Amane' táan ca'ach u paaclam nuchico'ob u luuchil u yukulo'ob; tu caajil Susae' yanchaj jun p'éel nojoch péec óolal.