Read Yucateco Ester 5 Bible Online

Ester 5 - Yucateco bible

Ester 5

¹Cu dzo'ocol u máan óox p'éel kiine', Estere' tu búuquintaj u jalach nook ca j ooc ichil u táancabil jalach naj ca j wa'alaj actáan ti' le noj naj tu'ux culucbal ca'ach le ajaw tu jalach káanche'o' le yaan ca'ach actáan ti' le jool najo'.

²Le ca tu yilaj ajaw, wa'alacbal x ajaw Ester te j táancabo' tu ye'esaj u yaacunaj ti', ca tu tich'aj tu tojil le jalach xóolte' oro u ca'ajo', Ester túune' j náadze' ca tu dzal kabtaj u ni' le jalach xóolte'

³Ajawe' tu káatchi'itaj ti': ¿Ba'ax cu yúuchul teech x ajaw Ester? ¿Ba'ax a káati'? ¡Wa ca káatic ti' teen tac táancoch in ajawile', je'el in dzáic ti' teche'! Estere tu núucaj:

⁴Wa ma'alob u yu'ubic a tzicbe'enile', quin káat óoltic ti' teech ca xi'iquech bajela'e', ti' jun p'éel noj janal dzo'oc in máakantic ti' a tzicbe'enil, ca u láakintech xan Amán. Ajaw túune' tu ya'alaj:

⁵Caxte'ex tu séeblaquil Amán, u ti'al ca dzo'ocbesa'ac u dzíibolal x ajaw Ester. Bey túuno' ajaw yéetel Amane' j bino'ob ti' le noj janal dzo'oc ca'ach u máakantic le x ajawo'.

⁶Ca'aliquil táan u janalo'obe' ajawe' tu ya'alaj ti' Ester: ¡Káat ti' teen Je'el ba'alac ca wóolte', tumen je'el in dzáic ti' teche', quex tac táancoch u ajawil le lu'uma'!

⁷Estere' tu núucaj: Chéen quin dzíiboltic yéetel quin káatic jun p'éel ba'al:

⁸Wa u yaabiltmajen a tzicbe'enil, wa xan cu yóoltic u beet utz ti' in dzíibolal ca u dzáa ti' teen ba'ax quin káatique', ca taalaquech sáamal láakinta'anech tumen Amán u ti'al u láak noj janal dzo'oc in máakantic u ti'al a tzicbe'enil. Sáamal túune' quin beetic ba'ax u káat a tzicbe'enil.

⁹Amane' jóok te j noj janalo' jach utz u yóol yéetel qui'imac u yóol xan; ba'ale' seten j pu'uj ca tu yilaj Mardoqueo culucbal tu jool jalach naj, ma' j wa'alaj mix péecnaj le ca j máan Amane'.

¹⁰Ba'ale' ti' le súutuco' ma' tu ye'esaj p'eec óolali', le ca j kuch tu yotoche' tu túuxtaj t'aanbil u yéet bisajba'ob, bey xan x Zeres u yatan,

¹¹ca tu tzicbaltaj ti'ob u nojoch ayikalil, buca'aj xan ya'abil u paalal yaan, bix beeta'abic utz ti' tumen ajaw iquil dza'abic ti' jun p'éel nojbe'en meyaj ma' dzaab ti' u nuuquilo'ob, mix ti' u yéet meyajo'ob.

¹²Ca tu ya'alaj: yéetel xane', chéen teen tu t'anajen x ajaw Ester u ti'al ca xi'iquen ti' le noj janal tu máakantaj ti' ajaw; dzo'oc xan u ya'alic ti' tene', ca xi'iquen ti' u láak noj janal cu bin u beet sáamal.

¹³chéen ba'axe' le quéen in wil le j Mardoqueo', le judío cu cutal tu jool le jalach najo', tuláacal le ba'alo'oba' mix ba'al u biilal in ti'al.

¹⁴Ca j a'alab ti' tumen u yatan yéetel u yéet bisajba'obe': Túuxt beetbil jun p'éel u nu'ucul jich' caal, veintidos métro'ob u ca'analil, sáamal ja'atzcabe' káat óolt ti' ajaw ca ch'uyquinta'ac Mardoqueo te'elo'. Beyo' je'el u páajtal a bin yéetel ajaw te noj janal x ma' chi'ichnaquile'. Le t'aan beya' utzchaj tu xiquin Amán, ca tu túuxtaj beetbil jun p'éel u nu'ucul jich' caal.