Read Yucateco Ester 6 Bible Online

Ester 6 - Yucateco bible

Ester 6

¹Láili' ti' le áakabo', ajawe' bin u wenel, ca tu ya'alaj ca taasa'ac le ju'un tu'ux dzíibta'an tuláacal le nucuch ba'alo'ob úuchlaja'ano'ob tu lu'umilo', u ti'al ca xo'ococ ti'.

²Ti' le ju'uno' ila'ab ti' dzíita'an bix Mardoqueoe' tu yu'ubaj u tzicbalo'ob Bigtán yéetel Teres, u náacomilo'ob u aj canano'ob tzicbe'enil, u káato'ob líikil u ti'al u quíimso'ob ajaw Asuero.

³Ajaw túune' tu káatchi'itaj: ¿Ba'ax bo'olal yéetel ba'ax tzi'iquilil dzo'oc u kamic Mardoqueo tu yo'olal le ba'ax tu beetajo'? Jach mix ba'al tu núucaajo'ob u aj cuch caabo'ob.

⁴Ti' le súutuco' j ooc Amán tu táancabil tu'ux yaan u jun páay káasab ajaw u ti'al ca'ach u káatic ca ji'ich'ic u caal Mardoqueo ti' le nu'ucul jich' caal tu túuxtaj beetbilo'. Ajawe' tu káatchi'itaj ¿Máax cu máan táancab?

⁵U aj cuch caabo'obe' tu núucaajo'ob ti': Amán. Ca tu ya'alaj ajaw ¡A'ale'ex ti' ca máanac!

⁶Ca j ooc Amáne', ajawe' tu káatchi'itaj ti': ¿Ba'ax u najmal u beeta'al ti' jun túul j xiib in káat in beet utz ti'? Amane' tu tuclaj tu báil: ¿Ti' máax bíin u beet utz ajaw wa ma' ti' teen?

⁷Bey túuno' tu núucaj: Ti' le j xiibo'

⁸u najmal u taasa'al jun p'éel búuc je'el bix le cu búuquintic a tzicbe'enilo' yéetel jun túul ti' le tzíimino'ob cu na'at'ic a tzicbe'enil, ca dza'abac xan tu pool jun p'éel jalach péet jo'olal.

⁹Le nook bey xan le tzíimino' bíin ku'ubuc ti' jun túul u asab nojochil aj méektáano', u ti'al ca u búucbes le j xiib a káat ca u beet a tzicbe'enil utz ti'o', cu dzo'ocole' cu xíimbalcuntic tu kíiwiquil le noj caaja' táan u yaawtic tu táan le ti': ¡Bey u nojbe'encunsa'al jun túul xiib u káat ajaw u beet utz ti'a'!

¹⁰Ajawe' tu ya'alaj ti' Amán: Je'el bix dzo'oc a wa'alico', tu séeblaquil beet bey yéetel le judío Mardoqueo, máax culucbal tu jool jalach naj. Bic p'áatac ma' dzo'ocbesic je'el bix dzo'oc a wa'alico'.

¹¹Amane' tu ch'a'aj le nook yéetel le tzíimino', cu dzo'ocol u jelic Mardoqueoe' tu na'acsaj tu yóokol le tzíimino' ca tu xíimbalsaj tu kíiwiquil le noj caajo', táan u yaawtic tu táan: ¡Bey u najmal u beeta'al ti' jun túul xiib u káat ajaw u beet utz ti'a'!

¹²Cu dzo'ocol le xíimbalo', Mardoqueoe' suunaj tu jool u jalach naj, Amane' j bin tu séeblaquil tu yotoch, okom u yóol, u pixmaj u yich.

¹³Le caaj kuch tu yotoche' tu tzicbaltaj ti' u yatan yéetel ti' u yéet bisajba'ob tuláacal le ba'ax dzo'oc u yúuchulo', leti'ob túune' tu ya'alajo'ob ti': Wa le j Mardoqueo, tu táan máax dzo'oc a chu'unsic a satic a nojochile', leti'e judío, ma' táan u páajtal a pa'ic u muuk, ba'ale' yaan u bíin kaasil teech.

¹⁴Ma'ili' dzo'oc u tzicbaltic ba'ax úucho', ca j kucho'ob le palitzilo'ob máaxo'ob táanlic le ajawo', u ti'al u biso'ob Amán tu séeblaquil ti' le noj janal dzo'oc ca'ach u máakantic Estero'.