Read Yucateco Ester 8 Bible Online

Ester 8 - Yucateco bible

Ester 8

¹Láili' ti' le kiino' ajaw Asueroe' tu síaj ti' x ajaw Ester u yotoch Amán, u aj p'eec le judíobo', Mardoqueoe' j bin tu táan ajaw, tumen Estere' dzo'oc ca'ach u ya'alic u láaktzil.

²Ajaw túune' tu lukesaj le x dzipit kab u dzaamaj ca'ach ti' Amano', ca tu dzaj ti' Mardoqueo. Ester xane' tu dzaj u meyajt yéetel u canant u ba'aluba'ob ca'ach Amán.

³Cu dzo'ocole', táan ca'ach u yáalcab u ja'il yich Ester, ca tu puljubáa tu ni' yoc ajaw ca tu káat óoltaj ti' ma' u béeytal le loob t'aan tu dzaj Amán, yéetel ma' u beeta'al loob ti' le judíobo'.

⁴Ajawe' tu tich'aj ti' Ester u xóolte' oro u ca'aj. X leti'e' j wa'alaji', bey wa'alacbal tu táano'

⁵Tu ya'alaj: Wa a tzicbe'enil ma'alob u yu'ubic, wa cu tuclic xan tu beel ba'ax quin káatique', wa xan u yaabiltmajen a tzicbe'enile', dzíibta'ac jun p'éel t'aan tu'ux ca mix ba'alcuntic le ju'uno'ob tu túuxtaj Amán tu'ux cu ya'alic ca xu'ulsa'ac tuláacal le judíob ki'itpaja'ano'ob ti' u táabal caajilo'ob a ajawil.

⁶Tumen ¿Bix bíin in cuch u nuumyajil jun p'éel nojoch loob cu taal tu yóokol in caajal, yéetel ca in wil u xu'ulsa'al tac in láaktzilo'ob?

⁷Ajaw Asueroe' tu núucaj túun ti' x ajaw Ester yéetel ti' Mardoqueo, le judíoe': Tene' dzo'oc in dzáic ti' Ester u yotoch Amán, dzo'oc xan u ji'ich'il u caal tu yo'olal tu yóoltilac u quimes le judíobo'.

⁸Bejela'e quin wa'alic ti' te'exe' ca úuchuc dzíib tin kaaba' je'el bix a tuucultique'ex ma'alob ti' le judíobo. ¡Yéetel dzale'ex le ju'uno'ob yéetel u dzalabil in ajawil! (Jun p'éel ju'un dzalkabta'an tu kaaba' ajaw, yéetel dzala'an yéetel u dzalabile' ma' tu páajtal u mixbalcunta'al.)

⁹Tu séeblaquil j t'aano'ob u aj dzíibo'ob ajaw. Tu yóox p'éel winalil u kiinil veintitres, u kaaba'e' Siván, tuláacal ba'ax tu ya'alaj Mardoqueoe' dzíibta'ab ti' le judíobo' bey xan ti' u méektáano'ob le múuch' caajo'obo', bey ti' le táabal caajo'obo', yéetel ti' u láak méektáano'ob le ciento veintitres táabal caajo'ob ki'itpaja'ano'ob India tac Etiopía. Beeta'ab le dzíiba' jach je'el bix u t'aano'ob yéetel u dzíibo'ob, ti' le jujun p'éel táabal caajo'. Tac ti' le judíob úuch le dzíibo', je'el bix u t'aano'ob je'el bix xan u dzíibo'obe'.

¹⁰Le ju'uno'obo' dzalkabta'ab tu kaaba' ajaw Asuero cu dzo'ocole' dza'al yéetel u dzalabilo'ob u ajawil, ca j túuxta'ab yéetel u aj máansaj ju'uno'ob cu nat'ico'ob ca'ach tzíimino'ob jach chich u yáalcabo'ob le cu tzenta'alo'ob tu'ux cu ka'alal u tzíinimo'ob ajawo'.

¹¹Ichil le dzíibo'oba' ajawe' tu dzaj páajtalil ti' le judíob u ti'al u much'uba'ob je'el tu'uxac caja'ano'obe' u ti'al u toquic u cuxtalo'ob, u ti'al xan j quíimsaj, xu'ulsaj, yéetel u ti'al xixcuntaj, bey xan ca u ch'a'ob ba'ax u ti'al le máaxo'ob bíin taalaco'ob u ti'al ba'atel, ti' je'el ba'axac caajil, wa táabal caaj wa ma', mix u sa'atsico'ob u cuxtal co'olelo'ob, mix u cuxtal mejen paalal.

¹²Tuláacal unaj u beeta'al ti' jun p'éelili' kiin ti' tuláacal u táabal caajilo'ob ajaw Asuero; le kiin yéeya'ano' u kiinil trece ti' u winalil doce u káat ya'ale' u winalil Adar.

¹³Jun jo'och u dzíibil le túuchi' t'aana' u najmal u dza'abal ojéeltbil bey jun p'éel a'almaj t'aan u ti'al ca kaj óolta'ac tumen tuláacal le caajo'obo', bey xan le táabal caajo'obo', u ti'al ca u pa'ato'ob u kuchul le kiino' u ti'al ca u tocuba'ob ti' u aj p'eeco'obo'.

¹⁴Ca tu ya'alaj ajaw, le aj máansaj ju'uno'obo' tu séeblaquil jóok u binbalo'ob ti' tzíimino'ob ch'a'abo'ob tu cúuchil u tzíimino'ob ajaw, le a'almaj t'aana', dzaab ojéeltbil xan tu caajil Susa.

¹⁵Mardoqueoe' jóok ti' jalach naj u búuquintmaj jun p'éel jalach búuc ch'ooj yéetel sac, jun p'éel péet jo'ol oro u ca'aj, yéetel jun p'éel suyem chac lino. Tuláacal u caajil Susae' awatnajo'ob yéetel qui'imac óolal,

¹⁶u ti'al le judíobo', tuláacal bey ca'ach sáasile', utzi' óolal, qui'imac óolal yéetel tziiquil.

¹⁷Tuláacal le táabal caajo'ob yéetel noj caajo'ob bey ti' tuláacal tu'ux kuch le jalach a'almaj t'aan ti' le judíobo', yanchaj qui'imac óolal ca tu kiinbesajo'ob yéetel nojoch janalo'ob. Bey xan ichil u cajnáalilo'ob le lu'umo' ya'ab tu beetuba'ob judíob, tu yo'olal le sajaquil ooc ca'ach ti'obo'.