Read Yucateco Éxodo 10 Bible Online

Éxodo 10 - Yucateco bible

Éxodo 10

¹Yuumtzile' tu ya'alaj ti' Moisés: Xeen a wil faraón, tumen dzo'oc in beetic u pechicubaob pa'ate'e' yéetel u nuuquil u aj meyajo'ob u ti'al in we'esic le nucuch jak óol máactzilo'ob cu páajtal in beetic,

²yéetel xan u ti'al a tzicbalt ti' a paalal yéetel ti' a wáabilo'ob, bix úuchic in mix ba'alcuntic le j egipciob yéetel le nucuch jak óol ba'alo'ob tin beetaj ichilo'obo'. Beyo' je'el a wojéeltique'ex tene' Yuumtzilen.

³Moisés yéetel Aarone', j bino'ob u yilo'ob faraone' ca tu ya'alajo'ob ti': Bey cu ya'alic Yuumtzil u Ku le j hebreoba': ¿Ba'ax kiin u jáawal a tuuculticabáa noj ba'alech tin táan? Cha'a u bin in caajal u ti'al u kulten;

⁴tumen wa láili' xi'ic u bin a pechicabáa ma' ta cha'ic u bine', sáamal in beetic u taal sáako'ob yóokol a lu'umil,

⁵bíin u pixo'ob le lu'um tac u balico'ob u ti'al ma' u yila'al, tumen sen ya'abo'ob. Bíin u jaanto'ob le jun p'íit ba'al tu p'ataj le bato', bíin xan u jaanto'ob tuláacal u che'ilo'ob le káaxo'.

⁶Yaan u búut'lo'ob tac u chupico'ob a jalach naj, u yotoch u nuuquil a aj meyajo'ob yéetel u yotoch tuláacal le j egipciobo'. ¡Lela' jun p'éel sen nojoch ba'al mix jun téen ila'ab tumen a taataex, mix ila'ab tumen u taataob a taataex, ti' u máanjan kiinilo'ob tac bejela'e' ti' c kiinilo'obe'! Le ca j dzo'oc u t'aan Moisese' tu sutaj u paache' ca jóok tu jalach naj faraón

⁷U nuuquil u aj meyajo'ob túun faraone' tu ya'alajo'ob ti': ¿Ba'ax kiin bíin jáawac u dzáic to'on choco poolil le máaca'? U p'at a tzicbe'enil u bin le máacob u kulto'ob u Kuob, le máax Yuumtzilo'. ¿Ma' wa u yil a tzicbe'enil dzo'oc u yóotziltal Egiptoi?

⁸Faraone' tu túuchi'itaj t'anbilo'ob Moisés yéetel Aarón tu ca'a tene' ca tu ya'alaj ti'ob: Xeene'ex a kulte'ex Yuumtzil a Kuex. Chéen ba'ale' a'ale'ex teen máaxo'ob bíin xi'ic.

⁹Moisese' tu núucaj: Bíin xi'ico'on yéetel c mejen paalal, c nucuch máaquilo'ob, c j xibil paalal, c x ch'upul paalal, bey xan c tamano'ob yéetel c wacaxo'ob, tumen jun p'éel u nojoch kimbesajil Yuumtzil c ti'al to'on.

¹⁰Ba'ale' faraone' tu núucaj: ¡Ma' muculbe'en a kaakas tuucule'exi'! ¿Ca tuucultique'ex je'el u múul bin Yuumtzil ta wéetele'ex, bey xan bíin in ca in cha'a' a bine'ex yéetel a mejen paalale'ex?

¹¹Le je'elo' ma' bey bíin úuchuqui'. Xeene'ex te'ex nucuch máaque'ex a kulte'ex Yuumtzil, tumen lelo' leti' a káat a beete'ex. Faraone' tu túuchi'itaj ca tojol ch'inta'aco'ob tu táan.

¹²Ba'ale' Yuumtzile' tu ya'alaj ti' Moisés: Líikes a kab yóokol Egipto u ti'al ca ta'alac sáako'ob u xupo'ob tuláacal u paakalilo'ob le lu'um yéetel tuláacal le ba'ax tu p'ataj le bato'.

¹³Moisese' tu líiksaj u kab yóokol Egiptoe', ca j beeta'ab u taal jun p'éel j lakin iik tumen Yuumtzil, buul kiin yéetel buul áakab tu yóokol le lu'umo'. Tu láak kiine' le j lakin iiko' tu taasaj sáako'ob,

¹⁴ca j báano'ob yóokol tuláacal le lu'umo'. Mix jun téen j yanchaj beyo', mix xan bin yanac u láak, jach sen ya'ab sáako'ob je'el bix le kiinaco',

¹⁵tu balo'ob le lu'um yéetel u ya'abilo'ob, tu jaantajo'ob xan tuláacal le paakalo'ob yéetel u yich che'ob tu p'ataj ca'ach le bato'. Ma' j p'at mix ba'al yáax tu lu'umil Egiptoi': Mix ichil le coolobo', mix ti' le che'obo'.

¹⁶Faraone' tu séeb túuchi'itaj t'anbilo'ob Moisés yéetel Aarone' ca tu ya'alaj ti'ob: Dzo'oc in kebantal ti' Yuumtzil a Kuex yéetel ti' te'ex,

¹⁷Ba'ale' quin káat óoltic te'ex chéen ti' le jeedza' ca sa'atse'ex teen in keban, yéetel ca payalchi'inaque'ex ti' Yuumtzil a Kuex, ca káate'ex ti' quex chéen ca u náachcunt teen le j báan quíimila'.

¹⁸Le ca j jóok Moisés tu jalach naj faraone' j payalchi'inaj ti' Yuumtzil.

¹⁹Yuumtzil túune' tu kexaj u beel le iiko', ca tu sutaj jun p'éel j ka'amcach j chikin iikile', ca tu bisaj le sáako'ob ichil le j chac ka'anabo'. Ma' j p'at mix jun túul sáak Egiptoi.

²⁰Ba'ale' Yuumtzile' tu beetaj u pechicubáa faraone', ca j p'áat ma' tu cha'a u jóokol le j israelitaobo'.

²¹Yuumtzil túune' tu ya'alaj ti' Moisés: Líikes a kab j ca'an, ca yanac éekjoch'e'enil tuláacal Egipto jach tat ca páatac tac u ma'achal.

²²Moisese' tu líikesaj u kabe' ca yanchaj jun p'éel sen nojoch éekjoch'e'enil tuláacal Egipto

²³tu chucaj óox p'éel kiin mix máac páatchaj u pactic máax cajacbal tu tzéel, mix xan páatchaj u péec tu cúuchili'. Ba'ale' ti' tuláacal u yotoch le j israelitaobo', yaan ca'ach sáasil.

²⁴Faraón túune' tu túuchi'itaj t'anbil Moisese' ca tu ya'ala' ti': Xeene'ex a kulte'ex Yuumtzil, bise'ex xan a paalale'ex; ba'ale' p'ate'ex a j tamane'ex yéetel a x wacaxe'ex waye'.

²⁵Ba'ale' Moisese' tu núucaj: Ma' bey bíin c beeto', teche' yaan xan a dzáic to'on ta kabil le ba'alche'ob bíin j quíimso'ob yéetel bíin c to'oco'ob tu nojbe'enil Yuumtzil c Kuo'.

²⁶Tu yóokol lelo' c wacaxo'obe' yaan xan u bino'ob t éetel. Mix jun túul ba'alche' unaj u p'áatal, tumen yaan c yéeyic dze'edzec ti'ob u ti'al c kultic Yuumtzili'. Ca'aliquil ma' kuchco'on te'elo', ma' c ojel máacalmáac bíin meyajnac to'on u ti'al c kultic Yuumtzili'.

²⁷Ba'ale' Yuumtzile' tu beetaj u pechicubáa faraón u ti'al ma' u p'atic u bino'ob.

²⁸Faraón xane' tu ya'alaj ti' Moisés: Jóoken waye', canáantaba xan ma' a suut a wilen tu ca'a téen, tumen le kiin bíin taalaquech tu ca'a téen tin táane', bíin quíimquech.

²⁹Moisese' tu núucaj ti': Ma'alob a wa'alic, ma' bíin suunaquen in wilechi'.