Read Yucateco Éxodo 13 Bible Online

Éxodo 13 - Yucateco bible

Éxodo 13

¹Yuumtzile' tu t'anaj Moisese' ca tu ya'alaj ti':

²Jun páaycunt teen u nojochil le paalalo'obo', tumen tuláacal u yáax paal le israelitaobo' in ti'al, bey xan tuláacal u j yáax aal le ba'alche'obo'.

³Moisés túune' tu ya'alaj ti' le caajo': Ka'ajac te'ex le kiina'. Tumen Yuumtzile' tu jóokese'ex yéetel nojoch páajtalil Egipto tu'ux palitzilta'ane'ex ca'achi. Ma' unaj a jaantique'ex waaj yéetel levadurai'.

⁴Te'exe' táan a jóokole'ex tu mesil Abib.

⁵Láili' ti' u winalil Abib, u najmal a beetique'ex le kinbesaj, le quéen dzo'ococ u yocsique'ex Yuumtzil ti' le lu'um tu'ux le caab yéetel le leche cu yáalcab bey u yáalcab ja'e'. Lelo', tu lu'um le j cananeob, j hititaob, j amorreob, j heveob yéetel j jebuseob, in séeb chi'itmaj ti' a taataex, bíin in dzáa te'exo'.

⁶Bíin a jaante'ex waaj x ma' levadura siete kiino'ob, yaan xan a beetique'ex le kinbesaj tu siete kiin tu kaaba' Yuumtzilo'.

⁷Siete kiino'ob bíin a jaante'ex waaj x ma' levadura, yéetel mix ti' jun xéet' a lu'ume'ex unaj u yantal levadura, mix waaj yaan u levadura.

⁸Lela' cu beeta'al u ti'al u ka'ajsa'al ba'ax tu beetaj Yuumtzil t éetel le ca tu jóokeso'on Egiptoe'.

⁹Bey je'el bix wa dza'an jun p'éel chíiculal tu muuk a kab wa ti' a táan poole', bíin u beet u ka'ajal te'ex, unaj a tzicbaltique'ex mantadz u ya'almaj t'aan Yuumtzil, tumen leti' jóokese'ex Egipto yéetel nojoch páajtalil.

¹⁰Let o'olale' kabéet a kiinbesique'ex le quili'ich tich' kab tuláacal ja'abo'ob jach tu kiinil a'ala'ano'.

¹¹Le quéen dzo'ococ a bisa'ale'ex tumen Yuumtzil tu lu'umil le j cananeob le quéen u kub te'ex le lu'um tu séeb chi'itaj te'ex yéetel ti' a taataexo'.

¹²Yaan a jun páaycuntique'ex a yáax j xibil paale'ex yéetel tuláacal u yáax xiibil a walak ba'alche'ob bíin síijique'. Tumen lelo' u ti'al Yuumtzil.

¹³Le quéen síijic jun túul u j yáax aal a walak x burrae', yaan a dzáique'ex jun túul chan j taman wa jun túul chan j yuuc u ti'al u keexint le chan burroo', ba'ale' wa ma' ta dzáique'ex u keexe', bíin a cache'ex u caal. Unaj xan a dzáique'ex jun p'éel ti'ibil óolal u ti'al u keexint a j yáax paal.

¹⁴Beyo' le quéen u káat chi'ite'ex sáamal a paale'ex: ¿Ba'ax u káat ya'al le kinbesaja'? te'exe' bíin a núuque'ex ti'ob: Yuumtzil tu jóokeso'on yéetel nojoch páajtalil Egipto tu'ux palitzilta'ano'on ca'achi.

¹⁵Le ca tu pechubáa ca'ach faraón ma' u káat u cha'ic c jóokole', Yuumtzile' tu jadzaj yéetel u quíimil u j yáax paal tuláacal u láaktzililo'ob le j egipciobo', bey xan u yáax aal u yaalak ba'alche'ob; let o'olale' c kubic ti' Yuumtzil tuláacal le j xiibil ba'alche'ob cu yáax síijilo'obe', c dzáic xan jun p'éel ti'ibil óolal u ti'al u keexil c yáax paal.

¹⁶Bey túuno' bíin p'áatac bey jun p'éel u chíiculal tu muuk a kabe'ex yéetel ta táan poolale'exe', u ti'al ka'ajsic te'ex bix jóokesa'abique'ex tumen Yuumtzil tu caajil Egipto yéetel nojoch páajtalil.

¹⁷Le ca j cha'ab u jóokol le j israelitaob tumen le faraono', ma' j bisa'abo'ob tumen Yuumtzil tu toj bejil u lu'um le filisteobo', tumen tu tucultaj, le j israelitaob ma' bíin u yóolto'ob ba'atel le quéen kabéetchajque', ba'ale' bíin yóolto'ob j suut Egipto.

¹⁸Let o'olale' tu beetaj u bak pachtico'ob le x tocoy lu'um cu bin ti' le chac ka'anabo'.

¹⁹Moisese' tu bisaj xan u baaquelo'ob José je'el bix u ya'almajil ti'obe'. Leti'e' u ya'almaj ti'ob ca'achi: Yaan u taal Yuumtzil u yáanto'on, ba'ale' le quéen kuchuc u kiinile', lukese'ex in baaquelo'ob waye'.

²⁰Le j israelitaobo' jóoko'ob Sucote' ca j je'elo'ob Etan, le tu'ux cu cáajal le x tocoy lu'umo'.

²¹Yéetel kiine', cu láakinta'alo'ob tumen Yuumtzil yéetel jun p'éel j t'o'ol múuyal cu cóojol tac lu'um, u ti'al u ye'esic le bej ti'obo'; yéetel áakabe' yéetel jun p'éel t'o'ol káak, u ti'al u sáasilcunta'alo'ob. Beyo' j páatchajic u xíimbalo'ob yéetel kiin bey xan yéetel áakab.

²²Le múuyalo' mantadz cu bin táanil ti'ob yéetel kiin, le káako' yéetel áakab.