Read Yucateco Éxodo 15 Bible Online

Éxodo 15 - Yucateco bible

Éxodo 15

¹Moisés yéetel le j israelitaob túuno', tu kayo'ob le kaaya', tu noj be'enil Yuumtzil: Quin kaay ti' u nojbe'enil Yuumtzil máax tu beetaj jun p'éel sen jadzutz dzáanche'etajil úuchic u bulic ich ka'anab tzíimino'ob yéetel le máaxo'ob nat'mail,

²In kaaye' u ti'al Yuumtzil máax in muuk yéetel in aj tocsajil. Leti' in Junab Ku, bíin in qui'iqui' t'ante; Leti'e' u Ku in taata, yaan xan in nojbe'encuntic.

³Yuumtzile' jun túul nojoch aj ba'atel. Yuumtzil ¡u kaaba' beyo'!

⁴Yuumtzile' tu bulaj ich ka'anab u bolano'ob yéetel u aj ba'atelo'ob faraón; u yéeya'anil u nuuquil u aj ba'atelo'obe' j bu'ulo'ob ich chac ka'anab.

⁵J lúubo'ob tu taamil bey tuuniche', ca j ba'alo'ob tumen u sen taamil le ka'anabo'.

⁶In Yuumtzil a mu'uka'an x no'oj kabil, leti'e' muuk yéetel páajtalil, tu xe'exe'et'aj le aj p'eeco'.

⁷Yéetel a nojoch páajtalil ta yach'aj le máaxo'ob j wa'alajo'ob ta táano', j t'a'ab a p'u'ujulil j eelo'ob bey sojol tu yo'olal a sen p'u'ujule'.

⁸Yéetel u muuk a wustaje' le ja'o' niclaji; u cuclil le ka'anabo' j líik bey pake'; ¡U dzu' u taamil le ka'anabo' j p'áat ma' tu péec!

⁹Le aj p'eeco' tu tucultaj ca'ach beya': bíin ca'aj in ch'a'apachto'ob tac quéen in chucpachto'ob, in ca'aj in t'ox le ba'ax tin lukesaj ti'obo' tac quéen utzac in wóol. Bíin in jóokes in máascab, yéetel u muuk in kabe' bíin in xu'ulso'ob.

¹⁰Ba'ale' j ustajnajeche', ca j lu'uko'ob xan tumen le ka'anabo'; j búulo'ob bey plomo ichil le j dzíidzic ja'o'.

¹¹In Yuumtzil, ¡Mix jun túul ku je'el u queticubáa ta wéetele'! ¡Mix máac quili'ich yéetel nojoch je'el bix teche'! ¡Ca beetic nucuch jak óol ba'alo'ob! ¡Ca najmatic a qui'iqui' t'anta'al!

¹²¡Ta xit'aj a páajtalile' ca j lu'uko'ob tumen le lu'umo'!

¹³Yéetel yaacunaj bíin u bin a nu'uctic u beel le caaj ta tocajo'; Yéetel a páajtalil ca bisic ta quili'ich najil.

¹⁴Le múuch' caajo'obo' bíin quiquilnaco'ob quéen u yojéelto'ob, le j filisteobo' yaan u ch'o'och'otcuba'ob tu yo'olal ki'inamil,

¹⁵U nuuquil u aj ba'atelo'ob Edone' bíin p'áataco'ob x ma' óolil, u jo'ol poolilo'ob Moabe' yaan u quiquilaanquilo'ob yéetel sajacquil, yaan xaan u p'áatal j ma' óolil le j cananeobo'.

¹⁶In Yuumtzil, ¡Ja'akac yóolo'ob! ¡U ch'a'ob sajacquil! ¡Suunaco'ob tuunichil yéetel u muuk a kab, tac quéen dzo'ococ u láaj máan a caajal, le caaj ta ti'alinto'!

¹⁷In Yuumtzil, biso'on j cajtal ta quili'ich pu'uc, te j cúuchil ta yéeyaj u ti'al a cajtal, te j kulnaj ta wedzcuntaj yéetel a kabo'.

¹⁸¡Yuumtzil cu beetcubáa ajaw u ti'al mina'an u xuul!

¹⁹Le ca j ooco'ob ka'anab u bolano'ob faraón yéetel u tzíimino'obe', Yuumtzile' tu beetaj u bu'ululo'ob tumen le ka'anabo', ba'ale' le j israelitaobo' tu ch'actajo'ob le ka'anab bey yóokol tiquin lu'ume'.

²⁰Bey túuno' le x bóobat María u quiic Aarone', tu cha'a jun p'éel lalajpaax,[7] ca j t'u'ulpachta'ab, tumen tuláacal co'olelo'ob táan u yóokoto'ob yéetel táan paxic u lalajpaaxo'ob,

²¹Ca'aliquil leti'e' táan ca'ach u kayic ti'ob: Kaaynene'ex ti' u tzicbe'enil' Yuumtzil, máax tu beetaj jun p'éel jak óol dzáanche'etajil le ca tu bulaj ich ka'anab tzíimino'ob yéetel le máaxo'ob nat'mailo'obe'.

²²Moisese' tu beetaj u náachtal le j israelitaob ti' le j chac ka'anabo'. Leti'ob túune', xíimbalnajo'ob tu x tocoy lu'umil Shur óox p'éel kiin x ma' ja'il

²³Le ca j kucho'ob Marae' ma' páatchaj u yukico'ob le ja' yano'o' tumen káaj. Let o'olal tu dzáajo'ob u kaaba'int Mara[8] le cúuchilo'.

²⁴Le máaco'obo' jo'op' u t'aano'ob kaas tu yo'olal Moisés, táan u káat chi'itico'ob: ¿Ba'ax bíin c ukej?

²⁵Moisés túune' tu káataj u yáantaj Yuumtzil, leti'e' tu ye'esaj jun cúul chan che' ti'. Moisese' tu pulaj le chan che' ichil le ja'o' ca j ch'ujucchaji. Te'elo' j túunta'ab yóolo'ob tumen Yuumtzile' ca j dzaab jun p'éel a'almaj t'aan ti'ob, u ti'al jun p'éel ma'alob cuxtal.

²⁶Ca tu ya'alaj ti'ob: Wa ca táan óoltique'ex utzil ba'ax quin wa'alic, teen Yuumtzil a Kuex, yéetel wa ca beetique'ex ba'ax utz tin wóol iquil a u'uyaj t'antique'ex in wa'almaj t'aano'ob yéetel ca dzo'ocbesique'ex in nup t'aano'obe', ma' bíin in túuchi'it ti' te'ex mix jun p'éel le báan quíimilo'ob je'el bix tin túuchi'itaj yóokol le j egipciobo', tumen teen Yuumtzil máax dzáic te'ex toj óolal.

²⁷Cu dzo'ocole' j kucho'ob Elim tu'ux yaan ca'ach doce sayabo'ob yéetel setenta u cúulul xa'ano'ob, ca j je'elo'ob tu jáal le ja'o'.