Read Yucateco Éxodo 16 Bible Online

Éxodo 16 - Yucateco bible

Éxodo 16

¹Tuláacal u múuch'cabil le j israelitaob j jóoko'ob Elimo', j kucho'ob tu x tocoy lu'umil Sin, chúumuc ti' Elim yéetel Sinaí. J kucho'ob tu kiinil quince ti' le ca'a p'éel mesil jóokico'ob tu lu'umil Egiptoo'.

²Te x tocoy lu'umo' tuláacalo'ob j jo'op' u tutucchi'ob tu yo'olal Moisés yéetel tu yo'olal Aarón.

³Cu ya'alico'ob ca'ach ti'ob: Quexi' ca u beet ca'ach Yuumtzil ca quíimco'on tu lu'umil Egiptoe'. Te'elo' c cutal ca'ach tu yicnal u cuumilo'ob bak, yéetel c janal tac u ti'al c na'ajtal, ba'ale' te'exe' ta taaso'one'ex way x tocoy lu'um u ti'al c láaj j quíimil yéetel wi'ij.

⁴Yuumtzil túune' tu ya'alaj ti' Moisés: Bíin in ca'aj in beet u káaxal u janalil j ca'an ti'ob. Le caajo' unaj u jóokol u mol sáamsamal chéen le ka'abéet u ti'al le kiino'. In káat in wil máax dzo'ocbesic in tzolbe'en t'aano'ob yéetel máax ma'.

⁵Tu seis kiin le quéen a nu'ucbese'ex le bíin a bise'ex ta wotoche'exe', unaj a molique'ex ca'a jaatz u ya'abil ti' le suuc a molique'ex sáamsamalo'.

⁶Moisés yéetel Aarón túune' tu ya'alajo'ob ti' le j israelitaobo': tu oca'an kiinile' bíin a wojéelte'ex Yuumtzil jóokese'ex Egipto;

⁷ja'atzcab kiinil xane' yaan a wilique'ex u nojbe'enil Yuumtzil, tumen dzo'oc u yu'ubic a tutuc chi'ex tu yo'olal leti'. ¿Tumen máaxon to'on u ti'al ca wa'ale'ex to'on ba'al?

⁸Moisese' j bin u ya'alic: Oca'an kiine', Yuumtzile' bíin u ca'aj u dzáa te'ex bak u ti'al a jaante'ex, ja'atzcab kiine' bíin u dzáa te'ex ya'abcach waaj, tumen leti'e' dzo'oc u yu'ubic bix a t'ane'ex kaas tu yo'olal. Tumen ¿to'one' máaxo'on? Te'exe' ma' ti' to'on ta wa'alaje'ex ba'ali', ti' Yuumtzil ta wa'ale'ex ba'al.

⁹Cu dzo'ocole' Moisese' tu ya'alaj ti' Aarón: A'al ti' tuláacal le j israelitaob ca u nadzuba'ob tu táan Yuumtzil, tumen leti'e' dzo'oc u yu'ubic a tutuc chi'ob,

¹⁰Ti' le súutuc táan ca'ach u t'aan Aarón yéetel le j israelitaobo', tuláacalo'ob j paacatnajo'ob tu tojil le x tocoy lu'umo', ca j chíicpaj u nojbe'enil Yuumtzil ti' jun p'éel múuyal.

¹¹Yuumtzile' tu t'anaj Moisese' ca tu ya'alaj ti':

¹²Dzo'oc in wu'uyic u tutucchi' le j israelitaobo'. T'aanen yéetelo'obe' ca a wa'al ti'ob: Le quéen ococ kiine', te'exe' yaan a jaantique'ex bak, ja'atzcab kiine' yaan a jaantique'ex waaj tac quéen na'ajchajque'ex. Beyo' bíin a wojéelte'ex teen le Yuumtzil a Junab Kuexo'.

¹³Láili' ti' le ocnaj kiino', j taal beech'o'obe' ca tu chupo'ob le caajo'. Ja'atzcab kiine' j yanchaj jun yáal p'uul ja' tu jáal le caajo'.

¹⁴Le ca j dzo'oc u sa'ap'al le p'uul ja'o', j p'áat jaytal te x tocoy lu'umo' jun p'éel ba'al bey bat sen p'ayache'.

¹⁵Tu yo'olal ma' u yojelo'ob le j israelitaob ba'ax le cu yilico'obo', jo'op' u ya'alico'ob tu baatzilo'ob: ¿Ba'ax lela'? Moisese' tu ya'alaj ti'ob: Lela' leti' le waaj cu dzáic te'ex Yuumtzil u ti'al a tzéenticaba'ex.

¹⁶Je'el u túuchi' t'aan Yuumtzila': Ta jujun túulile'exe', u mol le buca'aj kabéet u ti'al u jaante', je'el jay túule'ex ta wotoche'exe', ch'a'ex bey ca'a wuudz u ti'al jujun túul.

¹⁷Le j israelitaobo' tu beetajo'ob beyo'. Yaan máax mol ya'abi', yaan máax mol jun p'íiti',

¹⁸je'el bix le p'iisil a'ala'ane'; ma' j p'at yalab ti' le máax mol ya'abe', mix tu binetaj ti' le máax mol jun p'íite'. Tu jujun túulile', tu molaj le buca'aj kabéet u jaantique'.

¹⁹Cu dzo'ocole' Moisese' tu ya'alaj ti'ob: Mix máac unaj u p'áatic u ti'al u láak kiin.

²⁰Ba'ale' yaan jujun túul ti'ob ma' tu beetajo'ob ba'ax a'ala'ab tumen Moisese', ca tu p'ato'ob dze'edzec u ti'al u láak kiini'; ba'ale' le j p'at u ti'al u láak kiino', j chu'up yéetel x nookole' ca j tu'uchaji. Moisese' j kuuxchaj tu yéetelo'ob.

²¹Tu jujun túulilo'obe' cu molico'ob tu ja'atzcab kiin le kabéet u jaantico'obe', tumen cu yíibil quéen chocochajac kiin.

²²Ba'ale' tu seis kiine' tu molo'ob ca'a jaatz janal, míin can wuudz tu jujun túulil; u nuuquilo'ob túun le caajo' j bino'ob u ya'alo'ob ti' Moisés,

²³Moisese' ca tu núucaj: Lelo' bey u ya'almail le Yuumtzilo'. Sáamale' sábado, jun páaycuna'an ti' Yuumtzil. Beete'ex bejela'e' le ba'ax kabéet a jaantique'exo', loocanse'ex xan le ba'ax kabéet a loocansique'exe', p'ate'ex u ti'al sáamal u yalab.

²⁴Je'el bix tu ya'alaj Moisese', leti'obe' tu p'ato'ob u ti'al tu láak kiin u yalab, chéen ba'ale' ma' j tu'uchaji' mix yanchaj u x nookolili'.

²⁵Moisés túune' tu ya'alaj ti'ob: Jaante'ex bejela'a' ti' sábado jun páaycuna'an ti' Yuumtzila', tumen ti' le kiina' ma' bíin a nactáante'ex mix ba'al j káaxi'.

²⁶Je'el u páajtal a molique'ex seis kiino'obe', ba'ale' tu siete kiine' sábado jun páaycunta'an ti' Yuumtzile', mix ba'al bíin yanac.

²⁷Dze'edzec ti'obe' jóoko'ob tu siete kiin u caxto'ob wa ba'ax, ba'ale' ma' tu nactáantajo'ob mix ba'ali'.

²⁸Yuumtzil túune' tu ya'alaj ti' Moisés: ¿Ba'ax kiin u jáawal a x ma' u'uyaj t'antique'ex in wa'almaj t'aano'ob yéetel in tzolbe'en t'aano'ob?

²⁹Máanse'ex ta tuucule'ex teen Yuumtzile', in dzaamaj te'ex jun p'éel sábado; let o'olal tu seis kiine' quin dzáic te'ex u janalil ca'a p'éel kiin. Beyo' tu siete kiine' tuláacale'ex unaj a p'áatale'ex ta wotoche'ex, ma' unaj a jóokole'exi'.

³⁰Le caaj túuno' j je'el tu siete kiin.

³¹Le j israelitaobo' tu dzáajo'ob u kaaba'inte' maná[9] le ba'ax cu molico'obo'. Sac bey u neek cilantroe' yéetel ch'ujuc bey oop'il waaj yéetel caabe'.

³²Cu dzo'ocole' Moisese' tu ya'alaj: Je'el ba'ax cu ya'alic Yuumtzila': Chupe'ex yéetel maná jun p'éel nu'ucul yaan ca'a wuudz ti'e', líikese'ex u ti'al a ch'i'ibale'ex, tu yo'olal u yilico'ob ba'ax tin dzáa a jaante'ex ti' le x tocoy lu'um le ca tin jóokese'ex Egiptoe'.

³³Ti' Aarone' tu ya'alaj: Cha'a jun p'éel xaaque' ca dzáa bey ca'a wuudz maná ichile'. Cu dzo'ocole' dzáa tu táan Yuumtzil u ti'al líiksbil u yil a ch'i'ibale'ex.

³⁴Je'el bix tu ya'alajilac Yuumtzil ti' Moisese', Aarone' tu dzáa le xaac tu táan u ba'asche'il le nup t'aan u ti'al líiksbilo'.

³⁵Le j israelitaobo' tu jaantajo'ob maná cuarenta ja'abo'ob, tac u kuchbalo'ob ti' lu'umo'ob yaan u cajnáalilo'ob; tu jaantajo'ob tac ca j kucho'ob tu jáalo'ob u lu'umil Canaán.

³⁶(Le gomer ca'acho' jun jaatzil ti' u diez jaatzil jun p'éel efa.)