Read Yucateco Éxodo 17 Bible Online

Éxodo 17 - Yucateco bible

Éxodo 17

¹Tuláacal u caajil Israele' j jóok tu lu'umil Sin, jujun p'íitil binic u xíimbalo'ob je'el bix a'ala'anil ti'ob tumen Yuumtzile'. Cu dzo'ocole' j je'elo'ob Refidim, ba'ale' mina'an ca'ach ja' u ti'al u yuk le caajo'.

²Bey túuno' tu tzáajo'ob ti' Moisés beya': dzáa to'on ja' u ti'al j uke'. Moisese' tu núucaj: ¿Ba'ax teen ca tzáayque'ex ti' teen? ¿Ba'ax teen ca dzáique'ex túuntajil ti' Ku?

³Ba'ale' le caajo' ukaj ca'achi, ca j tutucchi'inajo'ob tu yo'olal Moisés iquil u ya'alajilaco'ob: ¿Ba'ax teen ta beetaj c jóokol tu lu'umil Egipto? ¿U ti'al a quíinso'on yéetel ukaj pa'ate'il yéetel c paalal bey xan c aalak ba'alche'ob?

⁴Moisés túune' j káat óolnaj ti' Yuumtzile' ca tu ya'alaj: ¿Ba'ax bíin in beet yéetel le máaco'oba'? ¡Chéen yo'olal jun p'íite' ma' tu quíimseno'ob yéetel ch'iini'!

⁵Ca j núuca'ab ti' tumen Yuumtzil: beet a láakinta'al tumen wa jay túul u nuuquil Israele' ca xi'iquech tu táan le caajo'. Ch'a'a xan le xóolte' úuchic a jadzic le áalcab ja'o', xeen.

⁶Tene' bíin in pa'atech tu pu'uquil Horeb yóokol le cháaltuuno'. Le quéen a kol le cháaltuuno' bíin jóokoc u ja'il u ti'al u yuk le caajo'. Moisese' bey tu beetajil tu táan u nuuquil Israele',

⁷ca tu dzáa u kaaba'int le cúuchilo' Meriba, tumen le j israelitaobo' tu tzáajo'ob ja'; tu dzáa xan Masah u kaaba'int iquil úuchic u dza'abal túuntajil Ku le ca tu ya'alajo'ob: ¿Ti' wa yaan Yuumtzil t éetele', Wa ma'?

⁸Le j amalequilo'obo' j bino'ob Refidin u ti'al j ba'atel yéetel le j israelitaobo'.

⁹Moisés túune' tu ya'alaj ti' Josué: Yéey wa jay túul máaco'obe' ca xi'iquech ba'atel yéetel le j amalequilo'obo'. Tene' bin in ca'a antal ja'atzcab tu ca'analil le pu'uc yéetel u xóolte' Ku tin kab.

¹⁰Josuee' tu beetaj le ba'ax a'ala'ab ti' tumen Moiseso', ca j jóok ba'atel yéetel le j amalequilo'obo'. Ca'aliquil' Moisés, Aarón yéetel hure' j na'aco'ob tu ca'analil le pu'uco'.

¹¹Le quéen u líikes u kab Moisese' cu t'onquinta'al le j amalequilo'ob tumen le j israelitaobo', Ba'ale' le quéen u yéems u kabe', cu t'onquinta'al le j israelitaob tumen le j amalequilo'obo'.

¹²Ba'ale' tu yo'olal cu ca'anal u kab Moisese', j ch'a'ab jun p'éel tuuniche' ca j dzaab u ti'al u cutal. Cu dzo'ocole' Aarón yéetel Hure' tu líikso'ob u kab Moisés, jun túul ti' jun tzéele', u láak ti' u láak jun tzéel. Bey túuno' j p'at jejedzquil liknalil u kab Moisés tac ca j t'ub le kiino',

¹³ca dzáanche'eta'ab yéetel u yej máascab u aj ba'atelo'ob Amalec.

¹⁴Yuumtzil túune' tu ya'alaj ti' Moisés: Lela' dzíibt ti' jun p'éel codzbil ju'un, u ti'al ka'asajil; a'al xan ti' Josuee' yaan in ch'éejsic le j amalequilo'obo'.

¹⁵Moisese' tu beetaj jun p'éel u multuunil kultaje' ca tu dzáa u kaaba'inte: Yuumtzile' leti' c lacam,

¹⁶Ca tu ya'alaj: ¡U lacam Yuumtzile' ti' Kab yaan! ¡Yuumtzile' yaan ba'atel ti' yéetel Amalec tac yéetel tuláacal u ch'i'ilancab!