Read Yucateco Éxodo 18 Bible Online

Éxodo 18 - Yucateco bible

Éxodo 18

¹Jetro u aj kiinil Madian u Suegro Moisese', tu yojéeltaj ba'ax dzo'oc u beetic Yuumtzil tu yo'olal Moisés yéetel u caajal Israel, tu yojéeltaj xan dzo'oc u jóokesa'alo'ob Egipto.

²Moisese' u túuchi'itmaj ca'ach séfora u yatane', ca j ka'am tumen Jetro

³leti' yéetel ca'a túul u paalalo'ob. Jun túul ti'obe' Gersón u kaaba', tumen Moisese' tu ya'alaj: Táan in beetic in j táanxel lu'umil ti' yaanal cúuchil.

⁴U láak jun túule' Eliezer, tumen tu ya'alaj xan: U Ku in taatae' j taal u yáanten ca tu tocajen yáanal u máascab faraón.

⁵Moisese' jelecbal ca'ach ti' le x tocoy lu'um tu tzéel u witzil Ku, ca j bin ilbil tumen Jetro, láakinta'an tumen u yatan Moisés yéetel tu ca'a túulal u paalal.

⁶Ca tu ya'alaj ti' Moisés: Teen Jetro a suegroe' dzo'oc in múul taal yéetel a watan bey xan yéetel u ca'a túulal a paalal in wilech.

⁷Moisese' j líik u kam u suegro. Tu chíin pooltaj ca tu dzu'udzaj; cu dzo'ocol u paclan tzijcuba'obe' j ooco'ob yáanal le chuybil najo'.

⁸Te'elo' Moisese' tu láaj tzicbaltaj ti' u suegro ba'ax tu beetaj Yuumtzil ti' faraón yéetel le j egipciob u ti'al u beetic utz u jóokesic Israel, bey xan buca'aj talam ba'alo'ob yanchaj ti'ob te j bejo' yéetel bix úuchic u jóokesa'alo'ob tumen Yuumtzil.

⁹Jetroe' sen j qui'imacchaj u yóol ca tu yu'ubaj buca'aj nojochil yaacunaj tu ye'esaj Yuumtzil ti' le j israelitaob úuchic u to'ocolo'ob tu kab le j egipciobo',

¹⁰Ca tu ya'alaj: Qui'iqui' t'antbil Yuumtzil le máax toque'ex tu kab faraón yéetel tu kab le j egipciobo' u caajil Israel; Tu jáanpayte'ex tu kab le j yedz cuxtalo',

¹¹yéetel ti' le pooch'ilo'ob iquil u t'anque'exo'ob ca'acho'. Bejela'e' jach in wojel Yuumtzile' asab nojochil ti' tuláacal kuob.

¹²Jetroe' tu ch'a'a jun túul ba'alche' u ti'al u tóoc ti' u nojbe'enil Ku, bey xan u láak ti'ibil óolalo'ob. Cu dzo'ocole' Aarón yéetel tuláacal u nuuquilo'ob Israele' j bino'ob janal yéetel u suegro Moisés tu táan Ku.

¹³Tu láak kiine' Moisese' j culaj u xotkint u talam ba'atel le j israelitaobo', lelo'oba' j wa'alajo'ob tu táan buul kiin.

¹⁴Le ca tu yilaj ba'ax cu beetic Moisés yéetelo'obe', Jetroe' tu ya'alaj ti': ¿Ba'ax ca beetic yéetel le máaco'ob beya'? ¿Ba'ax teen chéen teech ca cutal ca'aliquil leti'obe' láaj wa'alacbalo'ob buul kiin?

¹⁵Moisese' tu núucaj: Le caaja' cu taal u yilen u ti'al u yu'ubo'ob u tzol t'aan Ku.

¹⁶Le quéen yanac ba'atel ichilo'obe' cu taalo'ob u yileno'ob ca in wa'al ti'ob máax yaan u si'ipil; teen túune' quin we'esic ti'ob u ya'almaj t'aano'ob yéetel u ca'anbesajo'ob Ku.

¹⁷Ba'ale' j ka'ajsa'ab yiik tumen Jetro u suegroe' ca j a'ala'ab ti': Ma' paatal ba'ax ca beetiqui',

¹⁸tumen cu xu'ulul a wóol, teche' ca náacsic xan u yóol le máaco'ob yaan ta wicnalo'. Le meyaja' máan tip'a'an ti' a muuk; ta juunale' ma' bíin béeyaquechi'.

¹⁹U'uy ma'alob le tzol xiquin quin in dzáa techa', ca u yáantech Ku. Teche' unaj a bisic tu táan Ku u cuucho'ob le caaja', yéetel xan u ti'al a dzáic tu táan le u talamilo'ob

²⁰Ti' leti'obe' ca'ans u ya'almaj t'aano'ob yéetel u ca'ansajilo'ob, ca wa'al ti'ob bix úuchac u cuxtalo'ob yéetel ba'ax unaj u beetico'ob.

²¹Teech xane' yéey ichil le caaj máaco'ob nu'uca'ano'ob yaan sajacquilil Ku ti'ob, toj u tuuculo'ob yéetel u p'ectmajo'ob kaakas dzíibolal ayikalile', ca dzáa jujun túul ti'ob páajtalil yóokol mil máaco'ob, u láako'obe' yóokol cien, u láakobe' yóokol cincuenta, yéetel yóokol diez.

²²Leti'ob bíin a'alic ti' le caaj máax yaan u si'ipilo'; Le nucuch ba'alo'obo' cu taasa'alo'ob ti' teech, le mejentaco'obo' cu yilico'ob leti'ob. Beyo' bíin a sáalcunt a cuuch, leti'ob xane' bíin u yáantecho'ob.

²³Wa bíin a beet bey tumen cu túuchi'itic teech Ku ca beete', bíin xi'ic teech utzil; le caaj xano' bíin xi'ic yéetel qui'imac óolal tu yotoch.

²⁴Moisese' tu táan óoltaj u suegroe', ca tu beetaj tuláacal ba'ax tu ya'alaj;

²⁵Tu yéeyaj u asab nu'uca'anil máaco'ob Israele', ca tu dzáa páajtalil ti'ob yóokol u múuch'il mil máaco'ob, cien, cincuenta yéetel Diez.

²⁶Leti'ob tzolic ba'ax unaj u beetic le caaj je'el ba'alac súutuquil; le nucuch ba'alo'obo' cu bisa'al ti' Moisés, ba'ale' le mejentaco', leti'ob ilic.

²⁷Cu dzo'ocole' Moisés yéetel u suegroe', tu dzíiboltajo'ob utz tu baatzilo'ob, ca j suunaj u suegro tu lu'um tu ca'a téen.