Read Yucateco Éxodo 20 Bible Online

Éxodo 20 - Yucateco bible

Éxodo 20

¹J t'aanaj Kue' ca tu ya'alaj tuláacal le t'aano'oba':

²Teen Yuumtzil a Junab Ku máax jóokesech Egipto tu'ux j palitzilta'abe'ex ca'achi'.

³Ma' u yantal teech yaanal kuob wa ma' teen.

⁴Ma' a beetic mix jun túul patbil ku, mix u yoochel ba'ax yaan j ca'an, mix le ba'ax yaan yáanal lu'umo', mix ti' le ba'ax yaan te j ka'anab tu yáanal le lu'umo'.

⁵Ma' a chíin pooltico'ob, mix a kultico'ob, tumen teen Yuumtzil a Junab Kue', Ku cu yaj óolal, cu jadzic u kasa'anil le taataob u p'ectmajeno'ob, líikbal ti' u paalalo'obe' tac ti' u ca'a áabilo'ob.

⁶Ba'ale' quin we'esic in yaacunaj ti' mil ch'i'ibalo'ob ti' le máaxo'ob u yaabiltmajeno'ob yéetel cu dzo'ocbesico'ob in wa'almaj t'aano'ob.

⁷Ma' ch'a'a chi'itic u kaaba' Yuumtzil a Ku chéen cunel, tumen leti'e' ma' bíin u p'at x ma' jaadzil máax ch'a'achi'itic u kaaba' chéen cuneli'.

⁸Ka'ajac teech sábado u ti'al ca jun páaycunt ti' Yuumtzil.

⁹Meyajnen seis kiino'ob, beet ichilo'obe' tuláacal ba'ax kabéet a beetic,

¹⁰Ba'ale' u siete kiine' sábado jun páaycunta'an u ti'al Yuumtzil a Ku. Teche' ma' bíin meyajnaquech ti' le kiino', mix a j xibil paal, mix a x ch'upul paal, mix a palitzil, mix a x palitzil, mix a walak ba'alche'ob, mix le j táanxel lu'umil cajnáal ta wicnalo'.

¹¹Tumen Yuumtzile' seis kiino'ob tu beetilac ca'an, lu'um, ka'anab yéetel tuláacal le ba'axo'ob yano'obe'. Let o'olale' Yuumtzile' tu qui' t'antaj sábado, ca tu jun páaycuntaj.

¹²Tzic a taata, tzic xan a maama, u ti'al ca chowacchajac u kiinilo'ob a cuxtal yóokol le lu'um cu dzáic teech Yuumtzil a Kuo'.

¹³Ma' a quíimsaj.

¹⁴Ma' a beetic nup keban.

¹⁵Ma' a woocol.

¹⁶Ma' a tuus u ti'al a dzáic kaasil a láak.

¹⁷Ma' dzíiboltic a toquic u yotoch a láak, Ma' dzíiboltic a toquic u yatan, mix u palitzil, mix u x palitzil, mix u wacax, mix u burro, mix je'el ba'ax u ti'ale'.

¹⁸Tuláacal le j israelitaobo' tu yu'ubajo'ob le quíilbal cháac, tu ya'alajo' tu yilajo'ob u léembal cháac, tu yu'ubajo'ob xan u jóopsa'al le trompetaobo', bey xan tu yilajo'ob le pu'uc pixa'an tumen le buudzo': ba'ale' bey sajaco'ob ca'acho', j p'áato'ob náach.

¹⁹Let o'olale' tu ya'alajo'ob ti' Moisés: Teech t'aano'on, ca c u'uy a t'aan; ba'ale' ma' u t'anico'on Ku, tumen ma' xan ca quíimiconi'.

²⁰Moisese' tu núucaj ti'ob: Ma' a sajacchajle'ex. Kue' dzo'oc u taal u túunte'ex u ti'al ca ch'a'ex sajacquil ti' tu yo'olal ma' a kebanchajle'ex.

²¹Ca'aliquil le caaj p'áatal náacho', Moisese' j naadz ti' le j éekjoch'e'en múuyal tu'ux yaan Kuo'.

²²Yuumtzile' tu ya'alaj ti' Moisés: A'al bey ti' le j israelitaoba': Te'exe' ta wilaje'ex bix t'aanajiquen j ca'an ta wéetele'ex.

²³Ma' beetique'ex kuob oro u ca'aj wa plata u ca'aj u ti'al a kulte'ex je'el bix a kultiquene'exe'.

²⁴Beete'ex u multuunil in kulta'al yéetel lu'um, ca kube'ex teen tu yóokol u ba'alche'ilo'ob a waalake'ex yéetel a wacaxe'ex láaj tóocbil, bey xan quíimsbil u ti'al ca'a bisbáil. Tene' bíin taaquen in qui' t'ante'ex ti' tuláacal le cúuchilo'ob tu'ux in káat ca ka'ajsa'ac in kaaba'e'.

²⁵Wa bíin a beete'ex yéetel tuunich jun p'éel multuunil kultaje', ma' a beetique'ex yéetel póolbil tuunich. Tumen le quéen a póole'ex le tuunich yéetel u nu'ucul u yúuchul meyajo' ca manba'alcuntique'ex le multuuno'.

²⁶U multuunil in kulta'ale' ma' unaj u yantal u eb tuunili', tu yo'olal le quéen xíimbalnaquech yóokole', ma' a we'esic a chacnulil.