Read Yucateco Éxodo 21 Bible Online

Éxodo 21 - Yucateco bible

Éxodo 21

¹Leti'e' A'almaj t'aano'ob bíin a dzáa ti'oba':

²wa ca manic jun túul hebreo a palitzilte', bíin meyajnac seis ja'abo'ob, ba'ale' tu siete ja'abe' bíin a a cha'a u bin, ma' bíin bo'olnac tu yo'olal u jóokol tu palitzili'.

³Wa j kuch tu juune' tu juunal bíin xi'ic; wa j kuch yéetel u yatane' bíin xi'ic yéetel u yatan;

⁴wa j dzaab co'olel ti' tumen u dzuulil cu yantal j xibil paalalo'ob wa x ch'upul paalalo'ob ti'e', le co'olel yéetel le paalalo'obo', u ti'al u dzuulil, leti'e' tu juunal bíin xi'ic.

⁵Ba'ale' wa le palitzil ma' tu yóoltic bin tumen u yaabiltmaj u yatan, u paalal yéetel u dzuulile',

⁶le dzuul túuno' bíin u bis tu táan Ku, ca u wa'acunt taakal ti' le jool naj wa ti' u pakab che'il, cu pot lomtic u xiquin yéetel púudz máascab. Beyo' cu p'áatal u palitzil tuláacal u kiinil u cuxtal.

⁷Wa yaan máax cu conic u x ch'upul paal u ti'al x palitzilile', leti'e' ma' bíin jáalkabta'ac je'el bix le j xiibil palitzilo'.

⁸Wa le dzuul ma' tu dzo'ocol u beel yéetel tumen ma' utz tu yiche', unaj u kamic u bo'olil u jáalkabtajil; Ba'ale' ma' tu páajtal u conic ti' mix jun túul j táanxel lu'umil quex ma' utz tu yichi'.

⁹Wa cu dzo'ocsic u beel yéetel u j xibil paale', bíin u bisubáa x yéetel bey je'el bix wa u x ch'upul paale'.

¹⁰Wa cu yantal u láak u yatane', ma' bíin u jun p'íitcuns u janal u yáax atani' mix u nook, mix u láak ba'al cu ti'alintic jun túul x atantzil.

¹¹Ba'ale' wa ma' tu dzáic ti' mix jun p'éel ti' le óox p'éel ba'alo'oba', leti'e' cu páajtal u bin quex ma' u bo'otic mix ba'al yo'olal u p'atic u x palitzilil.

¹²Le máax loobiltic u láak máac, tac u quíimsique', yaan u xot kíinta'al j quíimil.

¹³Ba'ale', wa ma' taaliti' u beetic, tumen ti' Ku u taalbal ca quíimique', teen bíin in wa'al teech tu'ux bíin u ta'acbesubáa.

¹⁴Ba'ale', le máax cu p'u'ujul ti' u láaktzil cu quíimsic x ma' péec óolale', yaan a caxantic quex u ta'acbesubáa tu multuunil in kulta'al, yaan a xot kintic, yaan u quíimil.

¹⁵Le máax cu loobiltic u taata wa u maamae', bíin xot kíinta'ac, yaan u quíimil.

¹⁶Le máax ocoltmail jun túul máac, bey xan dzo'oc u conic wa quex ca'aliquil ti' yaan tu yicnale', bíin xot kinta'ac, yaan u quíimil.

¹⁷Le máax cu poch'ic u taata wa u maamae', yaan u xot kíinta'al j quíimil.

¹⁸Ichil ba'atelo'obe', wa jun túul máac cu loobiltic u láak máac yéetel tuunich wa yéetel loox, cu beetic u chuquic káan ma' tu quíimile',

¹⁹le máax beet le loobo' bíin a'ala'ac mina'an u si'ipil, chéen wa le máax loobilta'ano' cu líikil, cu páajtal u jóokol tu yotoch yéetel u xóolte', lelo' yaan u bo'otic u dza'acal, bey xan le kiino'ob cu p'áatal ma' tu meyajo'.

²⁰Le máax cu kol jadzic yéetel che' u palitzil wa u x palitzil tac u quíimsique', yaan u beeta'al u bo'otic le loob tu beetajo'.

²¹Ba'ale' wa cu cuxtal quex jun p'éel kiine', ma' bíin beeta'ac, mix ba'al ti'i' tumen ba'al u ti'al le palitzilo'.

²²Wa iquil u ba'atel ca'a túul máaco'ob cu loobiltico'ob jun túul x co'olel x yo'om ca kuchuc éemel u yaale', wa ma' tu kuchul tu chi'il quíimil le x co'olelo', le máax beeto' unaj u bo'otic le buca'aj bíin u káat u yíicham le x co'olelo', je'el bix cun u ya'alic le j táan óol ba'atelo'obo'.

²³Ba'ale' wa cu kuchul tu chi' quíimil le co'olelo', bíin tza'abac cuxtal tu yo'olal cuxtal,

²⁴ich tu yo'olal ich, coj tu yo'olal coj, kab tu yo'olal kab, ooc tu yo'olal ooc,

²⁵chu'ujul tu yo'olal chu'ujul, loob tu yo'olal loob, loox tu yo'olal loox.

²⁶Wa yaan máax cu kolic yich u palitzil wa u x palitzil ca kuchuc u ch'óopquint jun p'éel yiche', tu yo'olal le u yicho' yaan u cha'ic u bin.

²⁷Wa cu jodzic jun p'éel u coje', tu yo'olal le cojo' yaan cha'ic u bin.

²⁸Wa jun túul wacax cu kóochic jun túul j xiib, wa jun túul co'olel, tac u kuchul u quíimse', yaan u quíimsa'al yéetel ch'iin le wacaxo' cu dzo'ocole' ma' bíin jaanta'ac u bakeli', ba'ale' ma' tu beeta'al mix ba'al ti' u yuumil.

²⁹Ba'ale' wa suuquili' u kóoch, tu yo'olal u kóoch cu kuchul u quíims máaque', yaan u quíimsa'al yéetel ch'iin pa'ate'e' yéetel u yuumil wa leti' u yojel suuc u kóoch u waacax.

³⁰Wa tu cúuchil u quíimil cu dza'abal jun p'éel bo'ol ti'e', yaan u bo'otic le buca'aj bíin a'ala'ac ti' tu cúuchil u cuxtalo'.

³¹Le a'almaj j t'aana' leti' xan bíin meyajnac, quex wa j xi'ipal, quex wa x ch'úupal le máax cu kóochalo'.

³²Wa le wacax cu kóochic jun túul palitzil wa jun túul x palitzile', cu quíimsa'al yéetel ch'iin, cu dzo'ocole' cu bo'ota'al treinta sac taakino'ob ti' u dzuulil le palitzil wa le x paliltzilo'.

³³Wa máax cu je'ic jun p'éel ch'e'en wa cu jolic jun p'éel ch'e'en ma' tu maquic, let o'olal cu lúubul jun túul wacax wa jun túul burro ichile',

³⁴U yuumil le ch'e'eno' yaan u bo'otic ti' u yuumil le ba'alche' j quíimo', ba'ale' le j quimen ba'alche'o' je'el u páajtal u p'áatal ti' u yuumil le ch'e'eno'.

³⁵Wa u wacax jun túul máac cu kóochic u wacax u láak máaque', cu co'onol le wacax cuxa'ano', cu t'oxicuba'ob yéetel u tojol, bey xan yaan u t'o'oxol u bakel le j quimen wacaxo'.

³⁶Ba'ale' wa ojéelta'an suuc u kóoch ca'ach le wacax chéen cu yila'al tumen u yuumilo', yaan u dza'abal cuxa'an u je'el le wacax quimeno', cu dzo'ocole' le j quimen wacaxo' u ti'al u yuumil le wacax kóochnajo'.