Read Yucateco Éxodo 23 Bible Online

Éxodo 23 - Yucateco bible

Éxodo 23

¹Ma' a dzáic ojéetbil tuuso'ob, mix a táacpajal a jaajcuntic u t'aan le aj loobil beel máac, u ti'al u beeta'al jun p'éel ba'al ma' tu beeli'.

²Ma' a tzaypachtic le sen ya'ab máaco'ob ti' u loolob beelo'ob. Le quéen a wa'al a t'aan tu yo'olal táadz máansa'an jun p'éel a'almaj t'aane', ma' cha'ic a jíilta'al tumen u ya'abil máaco'ob, u ti'al a wa'al ba'ax ma' tu beeli';

³mix xan a táacpajal a káat le ba'alo'ob ma' tu beel cu tzáic le óotzilo'.

⁴Wa ca nuptáantic u j satal wacax wa u j satal burro a aj p'eeque', sut ti'.

⁵Bic p'áatac ma' a wáantic máax p'ectmailech; Wa ca wilic luubul u yaalak burro yáanal u cuuche', áant u wach' u cuuch.

⁶Ma' a luksic ti' le óotzil le ba'ax cu najmatic ichil le a'almaj t'aano'.

⁷Tzelabáa ti' tac poolo'ob ma' jaajo'obi', ma' xan a xot kíintic u ti'al j quíimil le j ma' si'ipilo', tumen tene' ma' bíin in wa'al mina'an u si'ipil, máax yaan u si'ipil.

⁸Ma' a kamic u bo'olal ta'acunaj si'ipil, tumen le u bo'olal ta'acunaj si'ipile' cu ch'óopquintic wíinic, cu beetic xan u manba'alcunta'al ba'ax cu najmatic le máax mina'an u si'ipilo'.

⁹Ma' a yedzic le j táanxel lu'umilo' tumen te'exe' a beetmaje'ex a j táanxel lu'umile'ex ti' yaanal lu'um.

¹⁰Meyajt le lu'umo', mol u yich seis ja'abo'ob,

¹¹ba'ale' tu siete ja'abe' ma' a pakik: p'at u je'elel u ti'al ca u tzéentubáa yéetel u óotzil máaquilo'ob a wéet lu'umil, u yalabe' u ti'al u janal u ba'alche'ilo'ob káax. Bey xan bíin a beet yéetel u péet paakalilo'ob uva yéetel u paakalilo'ob olivo.

¹²Ich seis kiino'ob beet tuláacal ba'ax u najmal a beetic, ba'ale' je'elsabáa tu siete kiin, u ti'al xan u je'elel a wacax yéetel a burro, bey xan u ti'al u ch'a'a u jeel u muuko'ob a palitzil yéetel le j táanxel lu'umilo'.

¹³Dzo'ocbese'ex le ba'ax dzo'oc in wa'alic te'exo', yéetel mix bikin u najmal u jóokol ta chi'ex u kaaba' u láak kuob.

¹⁴Beet kiin kuj ti' in nojbe'enil óox téen ti' jun p'éel ja'ab.

¹⁵Kiinbes u kiin kujil waaj x ma' levadura je'el bix dzo'oc in tzolic techo', jaant le waaj x ma' levadura siete kiino'ob. Le kiin jóokesa'an u ti'alo' u mesil Abib, tumen ti' le winal je'elo' jóokech Egiptoo'. Mix máac bíin páatchajac u taal tin táan wa mix ba'al cu taasic.

¹⁶Kiinbes xan u kiin kujil jooch, u yáax icho'ob tuláacal le ba'ax ta pakaj te j káaxo', bey je'el bix u kiin kujil le quéen a láaj jooch le ba'ax a pakmajo'.

¹⁷Tuláacal wíinic u najmal u bin tu táan Yuumtzil óox téen ti' jun ja'ab.

¹⁸Le quéen a kub teen quíimsbil ba'alche'obe', ma' a kubic teen le ki'ik pa'ate'e' yéetel le waaj x ma' levadura, mix a ta'acbesic u tzaatzel u ti'al u láak kiin.

¹⁹U asab ma'alobil u yáax ich a paakalo'obe' u najmal a bisic tu kulnaj Yuumtzil a Ku. Ma' a chaquic le chan j taman yéetel u kab yiim u maama.

²⁰Ile tene' bíin in túuchi'it in ángel táanil ti' teech u ti'al u canantech te j bej yéetel u ti'al u bisech ti' le cúuchil in nu'ucbesmajo'.

²¹Ma' a náachtal ti', dzo'ocbes u t'aan ma' a beeticabáa j ma' tziiquil ti', tumen leti'e' cu meyaj tin kaaba', ma' bíin u sa'ates a kebane'exi'.

²²Ba'ale' wa tu jaajil ca dzo'ocbesic ba'ax cu ya'alic, ca beetic xan ba'ax in túuchi'it t'antmaje', quin beetiquinbáa aj p'eequil ti' a aj p'eeco'ob, yéetel quin dzáiquimbáa tu táan le máaxo'ob cu dzáicuba'ob ta táane'.

²³In ángele' bíin xi'ic táanil teech u ti'al u bisech tu lu'um le j amorreob, j hititaob, j ferezeob, j cananeob, j heveob yéetel jebuseob, máaxo'ob bíin in joc u mootzo'ob.

²⁴Ma' a beetic ba'ax ca wilic cu beetic le caajo'ob je'elo'. Ma' a xoltal tu táan u kuob mix a kultico'ob; ba'ale' láaj xiixcunt u kuob, bey u quili'ich tuunicho'ob.

²⁵Qui'iqui' t'ant a Yuumtzil a Ku u ti'al ca'a u qui' t'ant a wo'och waaj yéetel a wo'och ja'. Tene' bíin in náachcunt ti' teech le koja'anilo'obo',

²⁶yaan xan in canantic ma' a quíimil wa ma' kuchuc u kiinili'. Ma' bíin yanac ta lu'umil co'olel cu yéemel u yaal, mix co'olel x ma' aali'.

²⁷Tene' bíin in beet u ki'itpajal sajaquil tac xan awat okol ichil le caajo'ob ta táan tu'ux bíin máanaqueche', bey xan bíin in beet u yáalcabo'ob ta táan.

²⁸Bíin in beet u ki'itpajal x quiquil sajacquil le tu'uxo'ob bíin máanaqueche', u ti'al ca áalcabnaco'ob ta táan le j heveob, j hititaob, yéetel le j cananeobo'.

²⁹Ma' bíin in wáalcabanso'ob ta táan ichil jun p'éel ja'abi', u ti'al ma' u kastal le lu'umo', mix xan u ya'abtal u ba'alche'ilo'ob káax u ti'al ma' u beetico'ob teech loob.

³⁰Bíin in wáalcabanso'ob jujun p'íitil ta táan tac le quéen ya'abchajac a paalal yéetel quéen qui' ma'alob cajlajquech te j lu'umo'.

³¹U xu'ukilo'ob u jáal a lu'umile' dzo'oc in láaj dzáico'ob: Líikbal chac ka'anabe' tac tu ka'anab le j filisteobo', bey xan líikbal ti' le x tocoy lu'umo', tac tu yáalcab ja'il Éufrates. Tene' dzo'oc in kubic ta kab u cajnáalilo'ob le lu'umo', teche' bíin a tojolch'into'ob jujun p'íitil ta táan.

³²Ma' a beetic mix jun p'éel kax t'aan yéetelo'ob, mix yéetel u kuob,

³³Ma' xan a cha'ic u p'áatalo'ob ta lu'um yo'olal ma' u beetico'ob a kebantal tin táan. Je'el u kuchul u kiinil a kultic u kuob u ti'al u beetico'ob a kastale'.