Read Yucateco Éxodo 25 Bible Online

Éxodo 25 - Yucateco bible

Éxodo 25

¹Yuumtzile' tu t'anaj Moisese' ca tu ya'alaj ti':

²A'al ti' le j israelitaob ca u molo'ob jun p'éel ti'ibil óolal in ti'al. Unaj u molico'ob ichil máaxo'ob taac u dzáico'ob yéetel jaaj óolal bey xan yéetel tuláacal pucsi'ikal;

³Unaj u much'quintco'ob oro, plata, cobre,

⁴chacpuke'en nook, chacjope'en nook, chac nook, jáaytzile'en lino, u tzo'otzel j taman,

⁵u kéewel j taman chac bona'anil, ma'alob kéewelo'ob,[10] u che'il acacia,

⁶aceite u ti'al sáaso'ob, qui'iboc ba'al u ti'al u beeta'al u aceiteil jun páaycunaj yéetel u ti'al u beeta'al qui'iboc poom,

⁷u tuunichilo'ob cornalina yéetel u láak jadzutz tuunicho'ob, u ti'al t'ilcuntbil tu efod yéetel u pix tzeem nojoch aj kiin.

⁸Beete'ex teen jun p'éel quili'ich naj u ti'al in cajtal ichilo'ob.

⁹Ba'ale' le cúuchil pa'ate'e' yéetel u nu'uculo'ob tu'ux bíin cajlaqueno', yaan a beetic jach je'el bix le bíin in we'es techo'.

¹⁰Beet jun p'éel ba'asche' yéetel u che'il[11] acacia jun p'éel metro yéetel diez centímetros chowaquil, sesenta yéetel cinco centímetros u cóochil, sesenta yéetel cinco centímetros u ca'anlil.

¹¹Pix yéetel ma'alob oro ichil yéetel u bak paach, súut kaxt yéetel oro u bak paach.

¹²Beet xan can p'éel u x julubo'ob yéetel oro, dzáa tu can dzíit u yooco'ob, ca'a p'éel ti' jun tzéeli' yéetel ca'a p'éel ti' u láak jun tzéel.

¹³Beet xan u x katáabilo'ob yéetel u che'il acacia, ca to'olant u bak paacho'ob xan yéetel oro,

¹⁴ca a julo'ob ti' le x julubo'ob yaan tu tzelo'ob le ba'asche'o' u ti'al u kóoch queléembalta'al,

¹⁵ma' a ca'a lukesico'ob, p'ato'ob tu x julubilo'ob le ba'asche'o',

¹⁶cu dzo'ocole', dzáa ichil le ba'asche' le a'almaj t'aan quin in dzáa techo'.

¹⁷Beet xan u maac le ba'asche' yéetel chéen oro jun p'éel metro yéetel diez centímetros chowaquil, sesenta yéetel cinco centímetros cóochil;

¹⁸póola'ant yéetel x bajab ca'a túul aj cuxa'ano'ob[12] yaan u xiiko'ob, dzáa tu ca'a jo'olal.

¹⁹Le maac yéetel le ca'a túul aj cuxa'ano'ob yaan u xiiko'obo', unaj u beeta'al jun tacáalil; jun túul ti'obe' ti' jun jo'ol le maaco', u láak jun túule' tu láak jun jo'ol,

²⁰jun túul actáan ti' u láak, ba'ale' u táan icho'obe' unaj u p'áatalo'ob actáan ti' le maaco', u xiiko'ob xane' unaj u p'áatal xíit'ilo'ob yóokol, u ti'al u láaj balico'ob yéetelo'ob.

²¹Dzáa u maac le ba'as che'o', dzáa ichil xan le a'almaj t'aan bíin in dzáa techo'.

²²Ti' bíin in nuptáantech tu yóokol le maac, tu chúumuc le ca'a túul aj cuxa'ano'ob yaan u xiiko'ob yano'ob yóokol u ba'asche'il le nup t'aan, u ti'al ca in dzáa a wojéelt tuláacal in túuchi' t'aano'ob u ti'al le j israelitaobo'.

²³Beet jun p'éel táasche' yéetel u che'il acacia noventa centímetros u chowaquil, cuarenta yéetel cinco centímetros u cóochil, cuarenta yéetel cinco centímetros u ca'anlil.

²⁴To'o' yéetel chéen oro, súut kaxt yéetel oro u bak paach.

²⁵Beet jun yáal tu'ux u ch'a'ic u muuk, siete centímetros u cóochil, súut kaxt yéetel oro u bak paach;

²⁶beet xan can p'éel u x julubilo'ob oro u ca'aj, dzáa tu can ti'itzilo'ob tu'ux yaan u can dzíit yooco'ob,

²⁷ca p'áatac tu tzéel u yáalal tu'ux cu ch'a'ic u muuko', u ti'al u ju'ulul u x katáabilo'ob u ti'al ca páatac u kóoch queléembalta'al le táasche'o'.

²⁸Beet yéetel u che'il acacia u x katáabilo'ob le táasche'o', badz pachto'ob yéetel oro, kabéeto'ob u ti'al u kóoch queléembalta'al le táasche'o'.

²⁹Beet yéetel chéen oro u laquilo'ob, u x jo'opobilo'ob, u nu'ucul u dza'abal ukul yéetel u chúujilo'ob ukul u ti'al u ti'ibil óolalil ukulbil ba'alo'ob.

³⁰Dzáa mantadz tin táan u waajil le táanbesajo'.

³¹Beet xan yéetel chéen oro jun p'éel x t'uchub sáas póola'an yéetel x bajab. U nu'ucul yedztal, u chuun, chúujilo'ob yéetel u nicte'ilo'obe', ca p'áataco'ob láaj jun tacáalili'ob,

³²tu tzéelilo'obe' bíin jóokoc seis u kabo'ob, óox p'éel ti' jun tzéel yéetel óox p'éel ti' u láak jun tzel.

³³Tu jujun p'éelil le seis kabo'ob cu jóokol ti' le x t'uchub sáaso', unaj u yantal óox p'éel u chúujilo'ob bey u nicte'ilo'ob yaan tu chúujilo'ob yéetel u nicte'ilo'obo',

³⁴tu chuun xane' bíin yanac can yáal ti' bey u loolo'ob almendroe', u chúujilo'ob yéetel u nicte'ilo'ob,

³⁵Tu jujun dzíitil u seis kabo'ob yano'ob tu ca'a tzéelil cu jóokol ti' le x t'uchub sáaso', yaan u yantal u chúujilo'ob yáanal.

³⁶U chúujilo'ob yéetel u kabo'obe', yaan u jun tacáalili'ob yéetel le x t'uchub sáaso', bíin beeta'ac yéetel chéen oro póola'an yéetel x bajab.

³⁷Beet xan siete sáaso'obe', ca a dzáa tu'ux ca páatac u sáasilcunajo'ob actáan,

³⁸u x machab t'aba'an chúuquilo'ob yéetel u laquilo'obe' unaj xan beeta'an yéetel chéen oro.

³⁹Meyajnac teech treinta yéetel óox p'éel wuudz oro u ti'al a beetic le x t'uchub sáaso' yéetel u nu'uculo'ob,

⁴⁰cu dzo'ocole' beet jach je'el bix le tin we'esaj teech te j witzo'.