Read Yucateco Éxodo 26 Bible Online

Éxodo 26 - Yucateco bible

Éxodo 26

¹Beet le quili'ich naj yéetel diez u káasabilo'ob jaxbil lino, chacpuke'en nook, chacjope'en nook yéetel chac nook; jadzutz but' chuyt ca'a túul xiknal aj cuxa'ano'obi.

²Tuláacal le káasabilo'oba' unaj u beeta'alo'ob jun p'éelili' u p'iisil: Doce metros ca tac táancoch u chowaquil, yéetel ca'a p'éel metros u cóochil.

³Chuy jun tacáalili' cinco káasabilo'ob, jun p'éel yóokol u láak, beet xan láili' u láak cinco',

⁴dzáa dze'edzec u xiquino'ob yéetel chacpuke'en jaxbil kuch tu sáabchi' u yáax káasabil jun jaatzo', bey xan tu sáabchi' u dzo'oc u káasabil u ca'a jaatzo'.

⁵Yaan a beetic cincuenta u xiquino'ob je'el bix le yáax jaatzo' bey le ca'a jaatzo', ca yanaco'ob actáanil.

⁶Beet xan cincuenta x léechebo'ob yéetel oro u ti'al u le'echel jun jaatz le káasabilo'ob ti' u láak jun jaatzo', ca p'áatac jun tacáalili' tuláacal.

⁷Beet xan once káasabilo'ob yéetel u chowac tzo'otzel j yuuc u ti'al a beetic u nookil najil a pixic le quili'ich najo'.

⁸Tuláacal le káasabilo'obo', unaj jun tacáalili' u p'iisil: Trece metros ca tac táancoch u chowaquil yéetel ca p'éel metros cóochil.

⁹Chuy cinco káasabilo'ob ti' jun jaatzi', cu dzo'ocole' chuy seis ti' u láak jaatze', ca cha'a u páacal tu táanil le quili'ich naj jun p'éel u káasabil le jaatz yaan seis ti'o'.

¹⁰Cu dzo'ocole' beet cincuenta xiquino'ob tu sáabchi' le káasabil nup'ic le yáax jun jaatzo', ca xan a beet u láak cincuenta tu sáabchi' u ca'a jaatzo'

¹¹Beet xan cincuenta x jookobo'ob yéetel bronce u ti'al a léech ti' le xiquino'ob, ca p'áatac jun tacáalili' tuláacal le x chuybil najo'.

¹²Tu yo'olal u káasabilo'ob le x nookil naj jach chowactaque', táancoch ti' u tip'a'anilo', bíin p'áatac paachil ti' le quili'ich najo'.

¹³Bey túuno' le quili'ich najo', cu p'áatal pixa'an tumen u yalab le káasab cu p'áatal chojtal tu ca'a tzéelilo'obo': cuarenta yéetel cinco centímetros ti' jun tzéeli' yéetel cuarenta yéetel cinco centímetros ti' u láak jun tzeli'.

¹⁴Beet jun p'éel piix yéetel u kéewelilo'ob, j taman chac bona'anil u ti'al le chuybil najo', yéetel u láak jun p'éel u pixibil ma'alob kéewelo'ob u ti'al yóokol.

¹⁵Jaajay buj dze'edzec u che'ilo'ob acacia u ti'al le quili'ich najo'.

¹⁶Le jaajay bujbil che'obo', unaj u p'isco'ob, cuatro metros ca tac táancoch u chowaquil, yéetel sesenta yéetel cinco centímetros u cóochil,

¹⁷yaan u yantal ca'a p'éel bajbil che'ob u ti'al u ba'ajal jun p'éel jaajay bujbil che' ti' u láak. Láaj beet bey u jaajay bujbil che'ilo'ob le quili'ich najo'.

¹⁸Le quéen a beete', buj veinte jaajay che'ob u ti'al j noojol,

¹⁹ca dzáa cuarenta u nu'ucul yedztalo'ob plata u ca'aj. Tu jujun p'éelil le jaajay bujbil che'obo' unaj u yantal ca'a p'éel u nu'ucul yedztal yáanal u ti'al u jéedzel tu ca'a p'éelil u bajbil che'ilo'ob.

²⁰U ti'al xan u tzéelil le quili'ich naj yaan j noojolo', yaan a bujic veinte jaajay che'ob,

²¹yéetel cuarenta u nu'ucul yedztal plata u ca'aj, u ti'al ca yanac ca'a p'éel u nu'ucul u yedztal tu jujun p'éelil le jaajay che'obo'.

²²U ti'al u paach naj le quili'ich naj tu tzéelil yaan j chikino', buj seis jaajay che'ob,

²³yéetel u láak ca'a p'éel jaajay bujbil che'obe', u ti'al le ti'itz yaan paachilo'.

²⁴Le ca'a p'éel jaajay bujbil che'oba' unaj u páajtal u nu'up'ul tu ca'analil tac tu yáax chan x julubil. Bey unaj u beeta'al yéetel u ca'a p'éel jaajay bujbil che'ilo'ob le u láak ca'a p'éel ti'itzilo'obo'.

²⁵Bíin yanac túun ocho jaajay bujbil che'ob yéetel dieciseís u nu'ucul u yedztalo'ob plata u ca'aj, ca'a p'éel u nu'ucul u yedztal u ti'al tu junjun p'éelil u jaajay bujbil che'ilo'ob.

²⁶Beet cinco x katáabilo'ob u ti'al u jaajay bujbil che'ilo'ob jun tzéel le quili'ich najo',

²⁷cinco x katáabilo'ob u ti'al u láak jun tzéel yéetel u láak cinco x katáabilo'ob u ti'al le paach naj yaan te j chikino',

²⁸Le x katáabil yaan chúumuco', yaan u máan ti' jun tzéel u ti'al u láak jun tzéel tu chúumuc le jaajay bujbil che'obo'.

²⁹Cu dzo'ocole' badz yéetel oro le jaajay bujbil che'obo', ca a dzáa u x julubilo'ob u ti'al u ju'ulul u x katáabilo'ob to'ano'ob xan yéetel oro.

³⁰Tu pachalile' beet le quili'ich naj jach je'el bix le j e'esa'ab teech te j witzo'.

³¹Beet jun p'éel káasabe', ca but' chuyt ca'a túul xiknal aj cuxa'anobi'.

³²Cu dzo'ocole' yéetel jujun p'éel x léechebilo'ob oroe', léecho'ob ti' can p'éel u yocomilo'ob u che'il acacia to'ano'ob yéetel oro, t'uchquinta'ano'ob yóokol u nu'ucul u yedztalo'ob plata u ca'aj.

³³Ch'uyquint túun le káasab tu yáanal le x léechebo'obo', ca a dzáa ichil le cúuchil bala'an tumen u káasabo', u ba'as che'il le nup t'aano'. Bey le káasab cu meyaj te'ex u ti'al u káastic le j quili'ich cúuchil ti' le sen quili'ich cúuchilo'.

³⁴Cu dzo'ocole', t'alcunt le maac yóokol u ba'asche'il le nup t'aan ti' ichil le sen quili'ich cúuchilo'.

³⁵Dzáa le táasche' paachil ti' le cúuchil bala'an tumen le káasab tu j xaman le quili'ich najo', ca xan a dzáa le x t'uchub sáas tu tzéelil j noojol actáan ti' le táasche'o'.

³⁶Beet xan u ti'al u jool najil le chuybil najo' jun p'éel u káasabil, chacpuke'en nook, chacjome'en nook, chac nook yéetel jaxbil lino, jadzutz but' chuya'anil.

³⁷Beet xan u yocomilo'ob yéetel u che'il acacia to'ano'ob yéetel oro, dza'an u x jookobilo'ob oro u ca'ajo'ob, u ti'al le j káasabo', ca xan a yib bronce u ti'al u nu'ucul u yedztalo'ob.