Read Yucateco Éxodo 27 Bible Online

Éxodo 27 - Yucateco bible

Éxodo 27

¹Beet jun p'éel u multuunil kultaj can ti'itz u ca'aj, yéetel u che'il acacia ca'a p'éel metro yéetel veinticinco centímetros u cóochil u can ti'itzil, yéetel jun p'éel metro yéetel veinticinco centímetros u ca'analil.

²Beet can p'éel u baaco'ob u ti'al u can ti'itzil jun tacáalili' yéetel le multuuno', ca to'olanto'ob yéetel bronce le multuuno'.

³Tuláacal u nu'ucul le multuuno' yaan u beeta'al yéetel bronce: u nu'uculo'ob ta'anil káak, u x jo'opobilo'ob, u nucuch laco'ob, u x jup'ubo'ob yéetel u x machab káako'ob.

⁴Beet xan yéetel bronce u nu'ucul u káabta'al bak, ca a dzáa can p'éel u x julubilo'ob tu can ti'itzil.

⁵Cu dzo'ocole' dzáa u nu'ucul u káabta'al le bak tu yáanal le u multuunil kultajo', chúumuc ti' u ca'anlil

⁶beet xan dze'edzec x katáabilo'ob yéetel u che'il acacia u ti'al u multuunil kultajo', ca tu to'olanto'ob yéetel bronce,

⁷Le x katáabilo'obo' unaj u dzo'otolo'ob tu x julubilo'ob u ti'al u p'áatal tu tzéelo'ob le u multuunil kultajo', u ti'al u páajtal u cúuch queléembalta'alo'ob.

⁸Le u multuunil kultajo' unaj jóojochil, beeta'an yéetel che' je'el bix le ta wilaj ti' le witzo'.

⁹Beet u x péet paach le quili'ich najo'. Tu j noojol le péet paacho', unaj u beeta'al u káasabilo'ob yéetel jaxbil lino sina'ano'ob cuarenta yéetel cinco metros u chowaquil.

¹⁰U veinte yocomilo'ob yéetel u veinte u nu'ucul u yedztalo'obe', bíin beeta'aco'ob yéetel bronce. U x léechebilo'ob, yéetel u x julubilo'obe', bíin beeta'aco'ob yéetel plata.

¹¹Tu tzéelil j noojole', unaj u yantal xan u x káasabilo'ob sina'ano'ob cuarenta yéetel cinco metros u chowaquil dza'an veinte u yocomilo'ob yéetel veinte u nu'ucul u yedztalo'ob bronce u ca'ajo'ob, bey xan u x léechebilo'ob yéetel u x julubilo'obe' plata u ca'ajo'ob.

¹²Tu tzéelil j chikine', bíin yanac veinte yéetel ca'a p'éel ca tac táancoch káasabilo'ob sina'ano'ob tu cóochil le x péet paacho', bey xan diez u yocomilo'ob yéetel diez u nu'ucul u yedztalo'ob.

¹³Tu tzéelil j lakin tu cóochil le x péet paacho', bíin yanac xan veinte yéetel ca'a p'éel ca tac táancoch káasabilo'ob.

¹⁴Ti' jun tzéelil le jool najo' bíin yanac siete metros káasabo'ob dza'an óox p'éel u yocomilo'ob, yéetel óox p'éel u nu'ucul u yedztalo'ob;

¹⁵tu láak jun tzéelo', u láak siete metros x káasabilo'ob dza'an xan óox p'éel u yocomilo'ob yéetel óox p'éel u nu'ucul u yedztalo'ob.

¹⁶Te tu yocbalo' unaj u yantal xan nueve metros u káasabilo'ob, chacpuke'en nook, chacjome'en nook, chac nook, yéetel jaxbil lino, jadzutz but' chuyta'an, bey xan dza'an can p'éel u yocomilo'ob yéetel can p'éel u nu'ucul u yedztalo'ob.

¹⁷Tuláacal u bak paach le x péet paacho', unaj u yantal u mejen x julubilo'ob yéetel u x léechebilo'ob plata u ca'ajo'ob, bey xan u nu'ucul u yedztalo'ob bronce u ca'ajo'ob.

¹⁸Le x péet paacho', bíin u p'is cuarenta yéetel cinco metros chowaquil, veinte yéetel ca'a p'éel ca tac táancoch cóochil yéetel ca'a p'éel metro yéetel veinticinco centímetros ca'analil. Le x káasabilo'obo', bíin beeta'aco'ob yéetel jaxbil lino, le u nu'ucul u yedztalo'obo', bíin beeta'aco'ob xan yéetel bronce.

¹⁹Tuláacal le ba'axo'ob kabéet u ti'al u yúuchul kultaj ti' le quili'ich najo', unaj bronce u ca'ajo'ob, bey xan tuláacal u dzop che'ilo'ob le x péet paacho'.

²⁰A'al ti'ob le israelitaob ca u taaso'ob u ma'alob aceiteil oliva u ti'al u p'áatal mantadz t'aba'an le sáaso'obo'.

²¹Aarón yéetel u paalalo'obe' leti'ob bíin ilic ma' u tu'upul le sáaso'ob tu táan Yuumtzil tuláacal le áakab tu noj Paselil Much'tal yéetel Ku, tu paach le káasab yaan tu yicnal u ba'asche'il le a'almaj t'aano'. Le a'almaj t'aana' u ti'al dzo'ocbesbil tumen le israelitaob yéetel u ch'i'ibalo'ob tuláacal kiino'obo'.