Read Yucateco Éxodo 28 Bible Online

Éxodo 28 - Yucateco bible

Éxodo 28

¹Ichil le j israelitaobo', p'at a sucu'un Aarón naadz ta wicnal, bey xan Nadab, Abiú, Eleazar yéetel Itamar u paalal u ti'al u beeto'ob u aj kiinilo'ob ti' teen.

²Beet nook chéen u ti'alint a sucu'un Aarón ma'alob nooko'ob, tu yo'olal u yantal sáas jope'enil yéetel qui'ichquelemil ti'.

³T'aanen yéetel tuláacal máaxo'ob yaan u kabil meyaj ti'ob, le dzo'oc in chupico'ob yéetel u na'atil u beeta'al jadzutz ba'alo'obo', ca u beeto'ob u nooko'ob Aarón beyo' ca jun páaycunta'ac u ti'al u beet u aj kiinil.

⁴Je'el ba'ax nookilo'ob u najmal u beetico'oba': U pix tzeem, u efod, u suyem, u yáanal búuc but' chuya'an, u pix jo'ol lino u ca'aj, yéetel u kax nak. Bey túuno' bíin beeta'ac u ti'al a sucu'un Aarón yéetel u paalalo'ob ma'alob nooko'ob chéen u ti'alinto'ob u ti'al u beetico'ob u meeyjul aj kiinil.

⁵Le máaxo'ob bíin beetic le nooko'obo', u najmal u beetico'ob yéetel oro, chacpuke'en nook, chacjome'en nook, chac nook yéetel jaxbil lino.

⁶Le efodo' yaan u beeta'al yéetel oro, chacpuke'en nook, chacjome'en nook chac nook yéetel jaxbil lino, ca beeta'ac x but' chuybil

⁷dzáa xan ca'a p'éel u x kaxabilo'ob tu tzéelilo'ob.

⁸Le kax nak cu máan yóokol le efod u ti'al pedzico', yaan u p'áatal jun tacáalili' yéetel, yaan xan u beeta'al yéetel oro, chacpuke'en nook, chacjome'en nook, chac nook, yéetel jaxbil lino.

⁹Cu dzo'ocole', ch'a'a ca'a p'éel u jadzutz cornalina tuunich, ca dzáa yóokolo'obe', u kaaba'ob u paalal Israel,

¹⁰tu tzoolol sijnalilo'ob; seis kaaba'ob ti' jun p'éele', seis kaaba'ob ti' jun láak.

¹¹Le kaaba'ob bíin a dzáa yóokol le jadzutz tuunichobo', bíin beeta'ac tumen jun túul u aj meeyjul oro je'el bix u beeta'al x dzalabe'. Cu dzo'ocole' pedz le ca'a p'éel jadzutz tuunicho'ob yéetel u x t'ilcunajilo'ob oro u ca'ajo'.

¹²Dzáa yóokol u x kaxabilo'ob le efod bey u jadzutz tuunichilo'ob u ka'ajsajil u paalal Israele'. Beyo' Aarone' bíin u lechcúunt tu queléembal u kaaba'obe', tu táan Yuumtzil u ti'al u ka'ajsa'alo'ob.

¹³U x t'ilcunajilo'obe' beet yéetel oro;

¹⁴cu dzo'ocole' beet yéetel ma'alob oro jun p'éel x jóoken jook, bey xan ca'a p'éel suum, ca dzáa tu bak paach le x t'ilcunajilo'obo'.

¹⁵Le x pix tzeem yéetel u nu'uculo'ob u yojéelta'al le si'ipilo'obo' yaan u beeta'al je'el bix but' chuyta'anil le efodo', u káat ya'ale' qui'ichquelem beetbil. Beet yéetel oro, chacpuke'en nook, chacjome'en nook, chac nook, yéetel jaxbil lino.

¹⁶Ca'a yáal, can ti'itz xan, ca u p'is veinte yéetel cinco centímetros tu jujun ti'itzil u can ti'itzil.

¹⁷Tak can tzoolil jadzutz tuunicho'ob yóokol. U yáax tzole' unaj u ta'akal jun p'éel rubí, jun p'éel crisólito yéetel jun p'éel esmeralda;

¹⁸u ca'a tzole', jun p'éel granate, jun p'éel safiro, yéetel jun p'éel jade;

¹⁹u yóox tzole', jun p'éel jacinto, jun p'éel ágata yéetel jun p'éel amatista;

²⁰u can tzole', jun p'éel topacio, jun p'éel cornalina yéetel jun p'éel jaspe. Le jadzutz tuunicho'obo' unaj u t'ilkajal ti' u x t'ilcunajilo'ob oro u ca'ajo'ob,

²¹u najmal doce le tuunicho'obo', tumen doce u kaaba'ob u paalal Israel. Tu jujun p'éelil le jadzutz tuunicho'ob bíin dza'abac u kaaba'ob u doce ch'i'ibalilo'ob, bey je'el bix u beeta'al x dzalabe'.

²²Beet u ti'al le x pix tzeemo' jun p'éel x jóoken jook yéetel ma'alob oro, ch'ota'an bey suume'.

²³Beet xan ca'a p'éel x julubilo'ob oro u ca'aje', ca a dza'ob tu ca'a tzéelil le x pix tzeemo';

²⁴cu dzo'ocole', dzáa ca'a p'éel x jokenjooko'ob ti' le ca'a p'éel x julubo'ob yaan tu ca'analil u ca'a ti'itz le x pix tzeemo',

²⁵ca xan a dzáa u xuul le x jokenjooko'ob yóokol tu'ux taka'an le jadzutz tuunicho'obo', ca a ma'alob kalo'ob tu nu'ucul tu'ux t'ilcuna'an le efod tu táanilo'.

²⁶Beet u láak ca'a p'éel x julubo'ob oro u caaje', ca a dzáa tu xuul u caablil le pix tzeemo', tu yóokol le sáabchi' yaan ichil cu p'áatal tu tzéel le efodo'

²⁷Beet u láak ca'a p'éel x julubo'ob oro u caaje', ca dza'ob táanil ti' u x kaxabilo'ob le efodo', tu yáanal u tzéel u chuuyilo'ob jun p'íit ca'analil ti' u kax nakil le efodo'.

²⁸Cu nu'upul túun u x julubilo'ob le pix tzeem yéetel u x julubilo'ob le efod yéetel jun p'éel chacpuke'en suum tu yo'olal u p'áatal le x pix tzeemo' jun p'íit ca'analil ti' u kax nakil le efodo', u ti'al ma' u p'áatal náach ti'.

²⁹Beyo' le quéen ococ Aarón ti' le kulnaj u búuquintmaj le x pix tzeem yéetel u nu'uculo'ob p'is óolo', bíin u bis xan yóokol u tzeem u kaaba'ob u paalal Israel tu táan Yuumtzil, u ti'al ca ka'ajac ti' tuláacal kiin.

³⁰Dzáa le Urin yéetel Tumin u nu'ucul u yojéeta'al le si'ipilo'obo', ca bisa'aco'ob tumen Aarón yóokol u tzeem tu táan Yuumtzil. Beyo' tuláacal kiin bíin u bis Aarón yóokol u tzeem u nu'ucul u yojéelta'al le si'ipilo', tu táan Yuumtzil.

³¹Beet láaj chacpuke'en nook u suyem nookil le efodo',

³²yéetel jun p'éel u caalil chúumuc u ti'al u pool. Tu sáabchi' u caalilo', unaj u pa'acal je'el bix yaan ti' le búuco'ob beeta'ano'ob yéetel kéewelo', u ti'al ma' u jáatal.

³³Dzáa u jadzutzilo'ob u sáabchi' le j suyem nook yéetel u wóolis ba'alilo'ob, chacpuke'en nook, chacjome'en nook yéetel chac nook, xa'akbesa'an yéetel mejen campanaob oro u caajo'ob ti' tuláacal u sáabchi'.

³⁴Bíin dza'abac jun p'éel chan campana oro u ca'aj, cu dzo'ocole' jun p'éel wóolis ba'al, u láak chan campana, u láak wóolis ba'al, bey bíin beeta'ac tuláacal u sáabchi' le j suyem nooko'

³⁵Aarone' unaj u búuquintmaj le j suyem nook le quéen u beet u aj kiinile', yo'olal le quéen ococ wa le quéen jóokoc tu quili'ich naj Yuumtzile', cu yu'uba'al u tzilin le chan campana u ti'al ma' u quíimilo'.

³⁶Beet jun p'éel xamach oro u caaje', ca dzáa je'el bix u dza'abal dzalab, le t'aanoba': Jun páaycuna'an u ti'al Yuumtzil.

³⁷Kax le xamach tu táan le pix jo'ol yéetel chacpuke'en suum yo'olal ma' u péec.

³⁸Beyo' bíin yanac mantadz kiino'ob tu táan jo'olal Aarón, Aarón túune' cu cuchic u si'ipilo'ob le j israelitaob, ti' le quili'ich ba'alo'obo', bey xan le quéen u jun páaycunto'ob u ti'ibil óolalo'obe'; ba'ale' le xamacho', bíin u beet u ka'amal tumen Yuumtzil le ti'ibil óolo'obo'.

³⁹Beet le búuc nook but' chuya'an yéetel lino', beet xan yéetel lino le pix jo'olo'. Le kax nako' bíin but' chuya'ac xan.

⁴⁰Beet xan u ti'al u paalal Aarón búuco'ob, kax nako'ob yéetel pix jo'olo'ob yo'olal u yantal sáas jome'enil yéetel qui'ichquelemil ti'ob.

⁴¹Bey unaj a dzáic u búuco'ob a sucu'un Aarón yéetel u paalal, cu dzo'ocole' ca wequic aceite tu poolo'ob u ti'al a dzáic noj páajtalil ti'ob, ca a jun páaycunto'ob bey in aj kiino'obe'.

⁴²Beet u xut' eexo'ob u ti'al u pixico'ob líikbal u nako'obe' tac tu muuk yooco'ob,

⁴³Aarón yéetel u paalale' unaj u búuquintico'ob le quéen j ococo'ob tu noj Paselil Much'tal, wa le quéen náadzaco'ob tu chuun u multuunil le kultaj u ti'al u meyajo'ob bey aj kiino'ob tin quili'ich naj yo'olal ma' u yantal u si'ipilo'ob ca quíimico'ob. Lela' jun p'éel a'almaj t'aan u ti'al tuláacal kiino'ob ti' Aarón yéetel u paalal.