Read Yucateco Éxodo 3 Bible Online

Éxodo 3 - Yucateco bible

Éxodo 3

¹Moisese' cu canantic ca'ach u j tamano'ob Jetro u suegro, u aj kiinil Madián; jun p'éel u kiinile' tu ch'actaj le x tocoy lu'um iquil tu bisajilac le j tamano'obo', ca j kuch tac tu witzil Ku cu kaaba'intic Horeb.[1]

²Te'elo' u ángel Yuumtzile' j chíicpaj ti' ichil jun p'éel tóoch'bal káak, chúumuc ti' jun cúul x cojquéej.[2] Moisese' tu pactaj ma'alob le x cojquéej cu tóoch'bal yéetel le káako' ba'ale' ma' tu jáabal.

³Ca túun tu tucultaj: ¡jach jela'an le ba'ala'! Bin in ca'aj in wila'a ba'axten ma' tu jáabal le x cojquéeja'.

⁴Ca tu yilaj Yuumtzil táan u náadzal Moisés u ti'al u yil ba'ax cu yúuchule', ca tu t'anaj ichil le x cojquéej beya': Moisés, Moisés. Moisese' tu núucaj: Je'elena'

⁵Ku túune' tu ya'alaj ti': Ma' a náadzal. Pit a xanab, tumen le cúuchil ca pe'echaktica' quili'ich.

⁶Tu ya'alaj xan: Teen u Ku a j máanja'an ch'i'ibalo'ob. Teen u Ku Abraham, Isaac yéetel Jacob. Moisese' tu pixaj u yich tumen tu ch'a'a sajacquil u pactic Ku,

⁷ba'ale' Yuumtzile' j bin u ya'alic: Dzo'oc in ma'alob ilic bix u mukyaj in caajal yaan tu lu'umil Egiptoo'. Dzo'oc in wu'uyic u jajak iiko'ob iquil u loobilta'alo'ob tumen u j mayolo'ob, jach ma'alob in wojelil ba'ax cu mukyajtico'ob.

⁸Let o'olale' dzo'oc in wéemel in toco'ob ti' u páajtalil le j egipciobo'; bin in ca'aj in jóokeso'ob ti' le múuch' caajo', u ti'al ca in biso'ob ti' jun p'éel nojoch yéetel ma'alob lu'um tu'ux cu yáalcab leche yéetel caab, bey u yáalcab ja'e'. Lela' leti' le múuch' caaj tu'ux cajacbalo'ob le j cananeob, j hititaob, j amorreob, j ferezeob, j heveob yéetel j jebuseob.

⁹Ile dzo'oc in wu'uyic u jajak iiko'ob le j israelitaobo', dzo'oc xan in wilic cu sen loobilta'alo'ob tumen le j egipciobo'.

¹⁰Let o'olale' líiksabáa, tumen bin in ca'aj in tu'ux teech tu táan le faraono', u ti'al ca jóokes in caajal le j israelitaob tu lu'umil Egiptoo'.

¹¹Moisés túune' tu ya'alaj ti' Ku: ¿Máaxen teen u ti'al ca xi'iquen tu táan faraón, u ti'al xan ca in jóokes le j Israelitaob tu lu'umil Egiptoo'?

¹²Ca j núuca'ab ti' tumen Ku: Tene' yaan in wantal ta wéetel, u chíiculal teen túuxtiqueche' leti' lela': Le quéen dzo'ococ a jóoksic in caajal tu lu'umil Egiptoe', yaan a kultiquene'ex te j witza'.

¹³Ba'ale' Moisese' tu núucaj ti': U talamile', wa quin bin in wa'al ti' le j israelitaob: U Ku a máanja'an ch'i'ibale'exe' dzo'oc u túuxtiquen ti' te'ex, leti'obe' bíin u káato'ob teen: ¿Bix u kaaba'? Bey túuno' ¿Ba'ax bíin in wa'al ti'ob?

¹⁴Kue' tu núucaj ti': TEENE' TEEN MÁAXEN. Ca wa'alic ti' le israelitaobo': TEENE' TEEN tu túuxtajen ti' te'ex.

¹⁵Tu ya'alaj xan Ku ti' Moisés: A'al xan ti' le j israelitaobo': Yuumtzil u Junab Ku a máanjan ch'i'ibale'ex, U Ku Abraham, u Ku Isaac u Ku xan Jacobe', dzo'oc u túuxtiquen ti' te'ex. Lela' leti' in kaaba' u ti'al mantadz yéetel tuláacal ja'abo'ob mina'an u xuul.

¹⁶Xeen a much'quint u nuuquilo'ob Israele' ca a wa'al ti'ob: Le Yuumtzil u Junab Ku a máanja'an ch'i'ibale'ex, u Ku Abraham, u Ku Isaac, u Ku xan Jacobe', j chíicpaj ti' teen, ca tu ya'alaj dzo'oc bin u dzáic u táan óolal ti' te'ex, dzo'oc u yilic ba'ax cu beeta'al te'ex tu lu'umil Egipto.

¹⁷Tu ya'alaj xan teen bin u ca'aj u toque'ex ti' le mukyajo'ob tu lu'umil Egiptoo', bíin u bise'ex xan tu múuch' caajal le j cananeob, j hititaob, j amorreob, j ferezeob yéetel j jebuseob, ti' jun p'éel lu'um tu'ux cu yáalcab leche yéetel caab bey u yáalcab ja'e'.

¹⁸Le u nuuquilo'obo', yaan u éejemtico'ob ba'ax can a wa'ale; yaan túun a bin tu yéetelo'ob a wil u ajawil Egipto, ca a wa'al ti': Yuumtzil u Ku le hebreobo' dzo'oc u jóokol u nuptáanto'on. Let o'olale' cha'a c bin te x tocoy lu'um, míin yaan óox p'éel kiin u xíimbalil, u ti'al ca c kub quíimsbil ba'alche'ob ti' Yuumtzil c Ku.

¹⁹Chéen ba'ale' tene' jach ma'alob in wojelil u ajawil Egiptoe', ma' bíin u cha'a a jóokole'ex wa ma' yéetel máactzilo'ob.

²⁰Let o'olale' bíin in we'es in páajtalil, bíin in loobilto'ob ti' quíimil le j egipciobo', yéetel tuláacal jak óol ba'alo'ob quin in beet ti' u múuch' caajo'ob; cu dzo'ocol lelo' yaan u cha'ic a jóokole'ex.

²¹Tu yóokol lelo', yaan in beetic u lúubul utzil le j israelitaob u ti'al u najmatico'ob u ma'alob óolal le j egipciobo' tu yo'olal ma' u jóokolo'ob chéen x pikil kabil.

²²Tu jujun túulil le co'olelo'obo' yaan u káatico'ob ti' le máaxo'ob caja'ano'ob tu tzéelo'obo', wa ti' je'el máax co'olelil caja'ano'ob yéetelo'obe', ca dza'abac ti'ob u ba'alilo'ob plata, oro yéetel búuco'ob u ti'al a j xibil paalale'ex yéetel a x ch'upul paalale'ex, tu yo'olal beyo' ca lukesique'ex ba'axo'ob yaan ti' le egipciobo'.