Read Yucateco Éxodo 31 Bible Online

Éxodo 31 - Yucateco bible

Éxodo 31

¹Yuumtzile' tu t'anaj Moisese' ca tu ya'alaj ti':

²Ti' u ch'i'ibalo'ob Judae' dzo'oc in yéeyic Bezaleel u paal Uri, u yáabil Hur,

³dzo'oc xan in chupic yéetel u pixan Ku, bey yéetel ojéelalil, na'atil, kaj óolalil yéetel u páajtalil u beetic túumben ba'alo'ob,

⁴bey je'el bix nu'uc dzíibil, yéetel u meyajtic oro, plata, bronce,

⁵u jadzutz t'óoja'al qui'ichquelem tuunich yéetel u meyajta'al, u ti'al u jadzutz t'óoja'al che', yéetel je'el ba'alac u láak jadzutz meyajile'.

⁶Dzo'oc in dzáic Aholiab u paal Ahisamac sijnal tu ch'i'ibalo'ob Dan u ti'al áantic. Cu dzo'ocole', ti' tuláacal le aj ojéelajo'obo', dzo'oc in dzáic na'at ti'ob u ti'al u beetico'ob tuláacal le ba'ax dzo'oc in wa'alic techo':

⁷U noj Paselil Much'tal, u ba'asche'il a'almaj t'aan, u maac le ba'asche'o' yéetel tuláacal u nu'uculo'ob u noj Paselil Much'talo',

⁸u táasche'il yéetel u nu'uculo'ob, le x t'uchub sáas chéen oro u ca'aj, yéetel u nu'uculo'ob, u multuunil kultaj tu'ux cu tóoca'al poom,

⁹u multuunil kultaj tu'ux cu ti'ibil óolal láaj tóocbil yéetel u nu'uculo'ob, u cáatil yéetel u nu'ucul u yedztal,

¹⁰u jit'bil jadzutz nook Aarón, yéetel u nook u paalal u ti'al u beetico'ob u aj kiinilo'ob,

¹¹u aceiteil u ti'al jun páaycunaj, yéetel qui'iboc poom u ti'al le quili'ich najo'. Leti'obe' unaj u láaj beetico'ob je'el bix tin tzolaj techo'.

¹²Yuumtzile' tu t'anaj Moisese', ca tu ya'alaj ti':

¹³T'aanen teech ta chi'il yéetel le j israelitaobo', ca a wa'al ti'ob: Unaj a tziquique'ex in kiinilo'ob u ti'al u yúuchul je'elel, tumen lelo' a chíiculale'ex tin wéetel u ti'al tuláacal ja'abo'ob, u ti'al u kaj óolta'al teen Yuumtzil máax j yéeye'ex.

¹⁴Sábado, bíin quili'ichajac a ti'alte'ex, u najmal a tziquique'ex. Le máax ma' tu tziquique', yaan u xot kinta'al yaan u quíimil. Le máax bíin meyajnac xan ti' le kiino', yaan u tze'elel ichil u caajal.

¹⁵Bíin páatchajac u yúuchul meyaj seis kiino'ob, ba'ale' u siete kiine', sábado jun páaycuna'an u ti'al Yuumtzil. Je'el máaxac bíin meyajnac sábadoe', yaan u xot kíinta'al, yaan u quíimil.

¹⁶Bey túuno' le j israelitaobo', bíin u tzico'ob sábado bey jun p'éel a'almaj t'aan u ti'al tuláacal ja'abo'obe'.

¹⁷Lelo' jun p'éel chíiculal u ti'al tuláacal le j israelitaob yéetel teno'. Tumen Yuumtzile' tu beetaj ca'an yéetel lu'um seis kiino'ob, ba'ale' u siete kiine' tu p'ataj u ti'al je'elel.

¹⁸Le ca j dzo'oc u t'aan Yuumtzil yéetel Moisés tu pu'uquil Sinaie', tu kubaj ca'a p'éel jaajay tuunicho'ob ti', tu'ux dzíibta'an a'almaj t'aano'ob tumen u yaal u kab Ku.