Read Yucateco Éxodo 33 Bible Online

Éxodo 33 - Yucateco bible

Éxodo 33

¹Yuumtzile' tu ya'alaj ti' Moisés: Péecsabáa xeen, bis le caaj ta jóokesaj Egiptoo', Xeene'ex te j lu'um tin séeb chi'itaj ti' Abraham, ti' Isaac yéetel ti' Jacob, bíin in dzáa ti' u ch'i'ibalo'obo'.

²Tene' bíin in túuchi'it in ángel u nu'ucbes te'ex le bejo', bíin xan in láaj tzel ti' le lu'um le j cananeob, le j amorreob, le j hititaob, le j ferezeob, le j heveob yéetel le j jebuseob.

³Xeene'ex te j lu'um tu'ux cu yáalcab bey ja' leche yéetel caab. Ba'ale' tene' ma' bíin xi'iquen ta wéetele'exi', tumen ma' xan ca in xu'ulse'ex te j bejo', te'exe' ma' ta éejemtique'ex ba'ax jaaj.

⁴Le caajo' j óotzilchaj yóol le ca tu yu'ubaj le t'aano'ob beya', mix máac tu dzáa u co'ocoj ba'alo'ob,

⁵tumen Yuumtzile' dzo'oquili' ca'ach u ya'alic ti' Moisese': A'al ti' le j israelitaob beya': Te'exe', máaque'ex ma' ta éejemtique'ex ba'ax jaaj. ¡Wa ti' yanen ichile'exe' quex chéen jun súutuque', je'el in xu'ulsique'exe'! Bejela'a' túune', lukese'ex a co'ocoj ba'ale'ex, ca in wila'a ba'ax quin in beet ta wéetele'ex.

⁶Líikbal tu pu'uquil Horebe', le j israelitaobo', jáaw u dzáico'ob u co'ocoj ba'alo'ob.

⁷Moisese', tu ch'a'aj le noj Paselo' ca tu dzáa chan náach te tu'ux jelecbal le caajo', ca tu dzáa u kaaba'int, nuptáanbalil yéetel Ku. Wa yaan máax u káat t'aan yéetel Ku ca'ache', cu bin te noj pasel yaan ca'ach tu paach le tu'ux jelecbal le caajo'.

⁸Le quéen jóokoc Moisés u binbal ca'ach te tu'ux jelecbal le caajo', tuláacal le máaco'obo' cu p'áatalo'ob wa'alacbalo'ob tu jool u paselo'ob u ti'al u pactico'ob u bin Moisés tac u yocbal ti' le noj paselo'.

⁹Chéen p'el ca'ach u yocol Moisés ichile', le jun t'o'ol múuyalo' cu yéemel yéetel cu je'elel tu jool le noj Paselo', ca'aliquil táan u t'aan Yuumtzil yéetel Moisés.

¹⁰Le quéen u yila'a' ca'ach le máaco'ob u je'elel le jun t'o'ol múuyal tu jool le noj Paselo', tu jujun túulilo'obe', cu xoltalo'ob u kulto'ob Ku tu jool u paselo'ob.

¹¹Kue' cu t'aan ca'ach yéetel Moisés táan u paaclan ilicuba'obo' je'el bix u t'aan máac yéetel u yéet bisajbae', cu dzo'ocole' cu sut ca'ach te tu'ux jelecbal le caajo'. Ba'ale' Josué u paal Nun j táanquelem xi'ipal máax áantic Moisese', ma' teech u jóokol ca'ach ichil le noj Paselo'.

¹²Moisese' tu ya'alaj ti' Yuumtzil: Ile teche' táan a wa'alic teen ca in nu'uct u beel le caaja', ba'ale' ma' a wa'al teen máax bíin áantiquen. Táan xan a wa'alic ca wocsic a wóol ti' teen, bey xan dzo'oc in lúubul utzil ti' teech.

¹³Wa jaaj beyo', dzáa in wojéelt ba'ax bíin a beete, ca páatchajac xan in wocsic in wóol ti' teech, u ti'al ma' u xóot'ol in kamic a wutzil. Ka'ajac teche', le caaja', a caajal.

¹⁴Yuumtzile' tu ya'alaj Teen bíin in láakintech yéetel bíin in beet a je'elel.

¹⁵Ba'ale' Moisese' tu núucaj: Wa ma' bíin xi'iquech t éetele', ma' beetic c jóokol waye'.

¹⁶Tumen wa ma' ta láakintico'one', ¿bix túun je'el páajtal u yojéelta'al to'one' a caajalo'on, c xoc xan yéetel a wutzil? Chéen beyo', a caajal tin wéetele' je'el u páajtal u yila'al c jela'anil ti' u láak caajo'ob yóok lu'ume'.

¹⁷Tu ya'alaj Yuumtzil: Le ba'ax dzo'oc a wa'alica' bin in ca'aj xan in beete, tumen quin wocsic in wóol ti' teech, yéetel ca lúubul utzil ti' teen.

¹⁸Moisese' tu káat óoltaj: ¡Cha'a in wilic a nojbe'enil!

¹⁹Ba'ale' Yuumtzile' tu núucaj: Bíin in beet u máan ta táan tuláacal in wutzil, ta táan xane' bíin in wa'al in kaaba'. Bíin in ch'a'a óotzilil ti' le máax in káat in ch'a'a óotzilile', bey xan bíin okom óolnac in pucsi'ikal le je'el máax in káate'.

²⁰Ba'ale' quin dzáic a wojéelt ma' bíin páatchajac a wilic u táan in wichi', tumen mix máac je'el u páajtal u yilic u táan in wich, wa ma' yaan u quíimil.

²¹Tu ya'alaj xan Yuumtzil: Ile, way tin tzéele', yaan jun p'éel cúuchil. Wa'alen tu yóokol le nojoch tuunicha'.

²²Le quéen máanac in nojbe'enile', quin dzáiquech ti' jun p'éel u jool le nojoch tuunicha', quin baliquech yéetel in kab tac u dzo'ocol in máan.

²³Cu dzo'ocole', quin lukesic in kabe', cu páajtal a wilic in paach; Ba'ale' u táan in wiche', ma' unaj u yila'ali'.