Read Yucateco Éxodo 34 Bible Online

Éxodo 34 - Yucateco bible

Éxodo 34

¹Yuumtzile' tu ya'alaj ti' Moisés: póol ta kabil ca'a p'éel jaajay tuunicho'ob jach je'el bix le yáax ca'a p'éele', u ti'al ca in dzíibt yóokolo'obe' le t'aano'ob in dzíibtmaj ca'ach ti' le yáax ca'a p'éel jaajay tuunicho'ob ta pa'aje'.

²Li'isabáa xan u ti'al a na'acal ja'atzcab sáamal tu witzil Sinaí, nadzabáa tin táan te tu jach ca'anlil le witzo'.

³Mix máac unaj u na'acal ta wéetel, mix unaj u yila'al mix máac ti' tuláacal le pu'uco'; mix unaj u yantal te'elo' j tamano'ob, wa aalako'ob táan u janalo'ob actáan ti' le pu'uco'.

⁴Moisese' tu póolaj ca'a p'éel jaajay tuunicho'ob jach je'el bix le yáax ca'a p'éele'. Jach tu ja'atzcabil u láak kiine' tu ch'a'a le ca'a p'éel jaajay tuunicho'obe' ca j na'ac tu witzil Sinaí, je'el bix a'ala'abic ti' tumen Yuumtzile'.

⁵Yuumtzil túune' j éem ti' jun p'éel múuyal, ti' anchaj yéetel Moisés te'elo', ca tu ya'alaj u kaaba'.

⁶J máan tu táan Moisés, táan u ka'am a'alic: ¡Leti' Yuumtzil! ¡leti' Yuumtzil! ¡Ku muun u pucsi'ikal cu ch'a'a óotzilil, chuca'an yóol, nojoch u yaacunaj bey xan u jaajil!

⁷Ti' mil ch'i'ibalo'obe' ma' t kexic u yaacunaj, cu sa'atsic le loobilo', le ko'ox óolalo' bey le kebano'; ba'ale' ma' bíin u p'at x ma' jaadzil le máax sipa'ano', maanaltza yaan u jadzic tu yo'olal u si'ipil le taataobo' le paalalo', le áabilo'obo', le ca'a áabilo'obo' tac le óox áabilo'obo'.

⁸Tu séeblaquil chinlaj Moisés, u táan jo'ole' cóoj tac lu'um, ca tu kultaj Yuumtzil

⁹táan u ya'alic: ¡Yuumtzil! ¡Yuumtzil! Wa jach tu jaajil quin lúubul utzil ti' teche', láakinto'oni'. Tu jaajile' le máaco'oba' jach ma' tu éejemtico'ob ba'ax jaaj, ba'ale' sa'ates c kebano'ob yéetel c loobilo'ob, kamo'on beyo'on a caajale'.

¹⁰Yuumtzile' tu ya'alaj: Ch'e'en xiquinte'ex: Tene', bejela'e' quin beetic jun p'éel nup t'aan tu táan tuláacal le caaja'. In ca'aj in beet jak óol ba'alo'ob mix jun téen beeta'ac ti' u caajilo'ob yóok lu'um, tuláacal le máaco'ob yano'ob ichile'exo' bíin u yilo'ob ba'axo'ob cu páajtal u beetic Yuumtzil, tumen jak óol ba'alo'ob bíin in beet ta wéetele'ex.

¹¹Dzo'ocbese'ex le ba'axo'ob dzo'oc in wa'alic te'ex ti' le kiina', teen bíin in tojolch'int ta táane'ex le j amorreobo', le j hititaobo', le j ferezeobo', le j heveobo' yéetel le j jebuseobo'.

¹²Ma' a beetique'ex mix jun p'éel nup t'aan yéetel máaxo'ob caja'ano'ob te j caajo'ob tu'ux ca bine'ex j oclo', u ti'al u beetico'ob a luubule'ex ti' u táabsajo'ob.

¹³Ba'ale' jute'ex u multuunil u kultajo'ob, láaj xiixcunte'ex u quili'ich tuunicho'ob yéetel u quili'ich chuun che'ob.

¹⁴Mix a kultique'ex u láak ku, tumen Yuumtzile' u p'eec u ke'exel, u kaaba'e', Junab Ku u p'eec u ke'exel.

¹⁵Ma' a beetique'ex mix jun p'éel nup t'aan yéetel u cajnáalilo'ob le lu'umo', le quéen u kulto'ob u kuob le quéen xan u kub janal ti'obe', ma' xan ca u t'ane'ex táacpajal ti' u janlil u kultajo'obi',

¹⁶wa cu dzo'ocsic u beel u x ch'upul paalal yéetel a j xibil paalale'ex, le kiin bíin u beeto'ob subtzil ba'alo'ob u ti'al u kultico'ob u kuob ca u beeto'ob u kebantal a paalale'ex.

¹⁷Mix bikin ca a beete'ex kuob fierro u ca'ajo'ob.

¹⁸Kiinbese'ex xan u kiinkujil waajo'ob x ma' levadura je'el bix in wa'almajil te'exe', buul siete kiino'ob jaante'ex waaj x ma' levadura. Jóokesa'an u mesil Abib u ti'al, tumen ti' le winal jóoke'ex Egiptoo'.

¹⁹Tuláacal yáax j xibil paal bíin yanac te'exe' in ti'al, bey xan u yáax j mejnil a wacaxe'ex, a j tamane'ex, a walak j yuuque'ex, wa j xiibil ba'alche'.

²⁰Wa cu yantal yáax jun túul x burrae', unaj a dzáique'ex jun túul chan j taman wa jun túul chan j yuuc u keexinte, ba'ale' wa ma' ta dzáique'exe', yaan a cachique'ex u chúuch caal. Unaj xan a dzáique'ex jun p'éel ti'ibil óolal u keexint tuláacal j yáax paal. Mix máac bíin taalac tin táan wa mix ba'al cu taasic.

²¹Meyajnene'ex seis kiino'ob, u siete kiine' u najmal a je'elscaba'ex, quex u kiinilo'ob pakal wa u kiinilo'ob jooch.

²²Kiinbese'ex u kiinkujil le semanaobo', le u yáax yich a pakal trigoex, yéetel u joochil u núup'ul ja'ab.

²³Tuláacal le j xiibo'obo' yaan u bino'ob tu táan Yuumtzil u Junab Kuil Israel óox téen jujun ja'ab

²⁴Tene' yaan in tojolch'intic ta táane'ex le u láak caajo'obo', yaan xan in cóochquintic a lu'ume'ex. Beyo' mix máac bíin jáanpaytic ti' te'ex a lu'ume'ex ca'aliquil ta bine'ex tu táan Yuumtzil a Kuex óox téen jun ja'ab.

²⁵Ma' a táanbesique'ex u ki'ikel le ba'alche'ob ca quíimsique'ex yéetel waaj x ma' levadurao', mix a p'atique'ex u yalab le ba'alche' ca quíimsique'ex tu kiinil Táadz máanbalo'.

²⁶Unaj a bisique'ex u sen ma'alobil u yich a pakale'ex tu yotoch Yuumtzil a Kuex. Ma' a takancunsque'ex mejen j taman yéetel u kab yiim u maama.

²⁷Yuumtzile' tu ya'alaj ti' Moisés: Dzíibt le t'aano'oba', tumen leti' u chuun le nup t'aan quin beetic ta wéetel bey xan yéetel le j israelitaobo'.

²⁸Moisese' j p'áat yéetel Yuumtzil te'elo' cuarenta kiino'ob yéetel cuarenta áakabo'ob, ma' j jaani' mix ukulnaji'. Te tu dzíibtaj ti' le jaajay tuunicho'obo' u t'aanilo'ob le nup t'aano', u káat ya'ale', le diez a'almaj t'aano'obo'.

²⁹Cu dzo'ocole' Moisese' j éem tu witzil Sinaí táan u bisic u ca'a p'éel jaajay tuunichilo'ob le a'almaj t'aano'; ba'ale' le ca j éem te j witzo' ma' tu yojéeltaj wa lenkalac u táan yich iquil t'aanajic yéetel Yuumtzili'.

³⁰Le ca tu yilajo'ob Aarón yéetel tuláacal le j israelitaob lenkalac u táan yich Moisese', tu ch'a'ajo'ob sajacquil, ma' xan j náadzo'ob ti'i'.

³¹Ba'ale' j t'aano'ob tumen Moisés, le ca j náadzo'ob Aarón yéetel u nuuquilo'ob le cajtalilo' suunajo'ob tu yicnal, Moisese' j t'aanaj yéetelo'ob.

³²Ma' j xáanchaj ca j náadzo'ob tuláacal le j israelitaobo', Moisés túune' tu kubaj tuláacal le tzolbe'en t'aano'ob j dzaab ti' ca'ach tumen Yuumtzil te tu witzil Sinaio'.

³³Cu dzo'ocol u t'aan yéetelo'obe' tu dzáa jun p'éel jaajay nook tu táan yich.

³⁴Le quéen ococ ca'ach Moisés tu táan Yuumtzil u ti'al j t'aan yéetele' cu lukesic ca'ach le jaajay nooko', bey ca'ach u p'áatal tac quéen jóokoco'. Cu ya'alic túun ti' le j israelitaob le tzolbe'en t'aano'ob j dzaab ti' tumen Yuumtzilo'.

³⁵Le quéen ila'ac tumen le j israelitaob lenkalac ca'ach u yich Moisese', leti'e' cu ca'a dzáic le jaajay nook tu táan yicho', bey u p'atico' tac quéen ca ococ j t'aan yéetel Yuumtzil.