Read Yucateco Éxodo 36 Bible Online

Éxodo 36 - Yucateco bible

Éxodo 36

¹Bey túuno' Bezaleel yéetel Aholiab, je'el bix tuláacal le máax yaan ti' u kabil u beetic jadzutz ba'alo'ob bey xan le máax dzo'oc u dza'abal kaj óolal yéetel na'atil ti' tumen Yuumtzil u ti'al u beetic tuláacal le ba'ax kabéet u ti'al le quili'ich najo', bíin u beeto'ob le ba'ax dzo'oc u túuchi'itic Yuumtzilo'.

²Moisese', tu t'anaj Bezaleel yéetel Aholiab, tu t'anaj xan tuláacal le máaxo'ob yaan u kabil u beetico'ob jadzutz ba'alo'obo', bey xan le máaxo'ob dza'an ca'ach ti'ob tumen Yuumtzil le páajtalil u beetico'ob jadzutz ba'alo'ob, tu juunal yóolo'ob tu ya'alajo'ob xan je'el u yáantajo'ob ti' le meyajo'.

³Leti'obe' tu kamajo'ob tu kab Moisés le ti'ibil óolalo'ob taasabo'ob tumen le j israelitaob u ti'al u cáajsa'al u beeta'al le ba'ax kabéet u ti'al u yúuchul kultaj ti' le quili'ich najo'. Ca'aliquil le j israelitaobo', xi'ic u bin u taasico'ob sáamsamal le ti'ibil óolalo'ob u káato'obe'.

⁴Le máaxo'ob táan u beetico'ob ca'ach le ba'alo'ob kabéet u ti'al le quili'ich najo', tu p'atajo'ob le meyajo' ca j bino'ob

⁵u ya'alo'ob ti' Moisés: Le máaco'oba' táan u píit máan u taasico'ob le ba'axo'ob kabéet u ti'al le meyaj tu túuchi'itaj Yuumtzil ca beeta'aco'.

⁶Moisese' tu beetaj u yáalcab u t'aanil ti' j xiibo'ob yéetel co'olelo'ob, ichil tuláacal le caajo', ca ch'éenec u beeta'al u meyajilo'ob ti'ibil óolalo'ob u ti'al le quili'ich najo'. Bey we'et'ic ti' le caaj u taasico'ob u láak ti'ibil óolalo'obo',

⁷tumen ma' chéen dzo'oc u chúucpajal u nu'ucul u beeta'al le meyajo', ba'ale' dzo'oc u tip' máan ya'abil.

⁸Le máaxo'ob píit máanja'an u yojelilo'ob u beeto'ob ba'alo'ob jadzutztac, ti' u chuca'an le aj meyajo'obo', leti'ob j beet le quili'ich najo'. Tu beetajo'ob yéetel diez u káasabilo'ob jaxbil lino, chacpuke'en nook, chacjome'en nook yéetel chac nooke', tu'ux tu but' chuytajo'ob ca'a túul j xiknal aj cuxa'ano'ob.

⁹Tu jujun p'éelil le káasabo'obo', cu p'isico'ob ca'ach doce metros ca tac táancoch u chowaquil yéetel ca'a p'éel u cóochil. Jun tacáalili' u p'iisilo'ob.

¹⁰Cinco káasabo'ob j chu'uyo'ob jun tacáalili', jun yáal yóokol u láak, bey xan beeta'abic yéetel u láak cinco.

¹¹Cu dzo'ocole' j dzaab u xiquino'ob yéetel chacpuke'en suum tu sáabchi' u yáax káasab nookil ti' jun jaatzi', bey xan tu dzo'oc u káasab nookil u láak jaatzo'.

¹²Je'el bix dza'abic cincuenta u xiquino'ob le yáax jaatz káasab nooko'obo', bey dza'abic ti' u ca'a jaatzo', ca j p'at u xiquino'ob jun jaatze', actáan ti' u láak jaatz.

¹³Beeta'ab xan cincuenta x jookobo'ob oro u ca'ajo'ob, u ti'al u léechel tu ca'a jaatzil le káasabo'ob yo'olal u p'áatal jun tacáalili' le quili'ich najo'.

¹⁴Bezaleele', tu beetaj xan once u káasabilo'ob u tzo'otzel j taman u ti'al u chuybil najil u piix le quili'ich najo'.

¹⁵Tu jujun p'éelil le káasabo'obo', cu p'isico'ob ca'ach trece metros ca tac táancoch u chowaquil yéetel ca'a p'éel u cóochil. Jun tacáalili' u p'iisilo'ob.

¹⁶Tu chuyaj cinco káasabo'ob jun tacáalili' ti' jun jaatze' ca tu chuyaj seis ti' u láaki'.

¹⁷Cu dzo'ocole' tu beetaj cincuenta u xiquino'ob u sáabchi' le káasab nup'ic u yáax jaatzo', ca xan tu dzáa u láak cincuenta tu sáabchi' u dzo'oc káasab nup'ic u ca'a jaatzo'.

¹⁸Tu beetaj xan cincuenta x jookobo'ob bronce u ca'ajo'ob u ti'al u nup'ic le chuybil naj ca p'áatac jun tacáalilio'.

¹⁹U ti'al le chuybil najo', Bezaleele' tu beetaj u piix yéetel u kéewelilo'ob j taman chac bona'anilo'ob, u ti'al u yóokole' tu beetaj u piix yéetel ma'alob kéewelo'ob.

²⁰Cu dzo'ocole', tu beetaj u bujbil che'ilo'ob acacia u ti'al le quili'ich najo', ca tu láaj dzáa ma'alob tojil.

²¹Tu jujun p'éelil le bujbil che'obo', tu p'iso'ob can p'éel metros ca tac táancoch u chowaquil yéetel sesenta yéetel cinco centímetros u cóochil,

²²yaan xan ca'a u p'éel bajbil che'ilo'ob u ti'al dzo'otol ti' u láak. Bey tu láaj beetilac u bujbil che'ilo'ob le quili'ich najo'.

²³Tu beetaj veinte bujbil che'ob u ti'al j noojol,

²⁴Tu dzáa xan cuarenta u nu'ucul u yedztalo'ob plata u ca'ajo'ob tu yáanalo'ob. Tu jujun p'éelil le bujbil che'obo', j dzaab ca'a p'éel u nu'ucul u yedztal u ti'al u ca'a p'éel bajbil che'ilo'ob u dzo'otol.

²⁵Bey xan u ti'al u láak jun tzéelil le quili'ich naj yaan j xamano', tu beetaj veinte bujbil che'ob

²⁶yéetel cuarenta u nu'ucul u yedztalo'ob, tu yo'olal u yantal ca'a p'éel yáanal ti' jujun p'éel u bujbil che'il.

²⁷U ti'al u paach najil le quili'ich naj yaan j chikino', tu beetaj seis bujbil che'ob,

²⁸bey xan u láak ca'a p'éel bujbil che'ob u ti'al u ti'itzilo'ob le paach najo'.

²⁹Le bujbil che'oba', nupa'ano'ob tac tu ca'ananil tu'ux yaan le yáax x dzipito'. Bey tu beetajil yéetel u ca'a p'éel bujbil che'ilo'ob le ca'a ti'itzilo'obo',

³⁰Bey túuno' tu pa'ate'ile', yaan ca'ach ocho bujbil che'ob yéetel dieciseís u nu'ucul u yedztalo'ob plata u caajo'ob, tu yáanal tu jujun p'éelil le bujbil che'obo' yaan ca'ach ca'a p'éel u nu'ucul u yedztal.

³¹Bezaleel xane', tu beetaj cinco x katáabilo'ob u ti'al jun tzéel le quili'ich najo',

³²cinco x katáabilo'ob u ti'al u bujbil che'ilo'ob u láak jun tzéel le quili'ich najo' yéetel u láak cinco u ti'al u paach najil yaan j chikino'.

³³Le x katáabil cu bin chúumuco', tu beetaj u káatal líikbal ti' jun tzéele', tac tu láak jun tzéel tu chúumuc le bujbil che'obo'.

³⁴Tu bonaj yéetel oro le bujbil che'obo', ca tu beetaj u x julubilo'ob u ti'al u ju'ulul u x katáabilo'ob bona'ano'ob xan yéetel oro.

³⁵Tu beetaj xan le x chuybil káasab yéetel chacpuke'en nook, chacjome'en nook, chac nook yéetel jaxbil linoe', ca tu jadzutz jit'taj ca'a túul xiknal aj cuxa'ano'obi.

³⁶Cu dzo'ocole', tu ch'uyquintaj yéetel jujun p'éel x jooko'obo'ob oro u ca'ajo'ob, ti' can p'éel u yocomilo'ob u che'il acacia bona'ano'ob yéetel oro, t'uchquinta'ano'ob yóokol u nu'ucul u yedztalo'ob plata u ca'ajo'ob.

³⁷U ti'al u jool le chuybil najo', tu beetaj jun p'éel u káasab nookil chacpuke'en nook, chacjome'en nook, chac nook yéetel jaxbil lino but' chuyta'an.

³⁸Tu beetaj xan cinco ocomo'ob yéetel u x jookobilo'ob, bey xan cinco u nu'ucul u yedztalo'ob bronce u ca'ajo'obe', ca tu bona'ataj yéetel oro tu ca'analil le ocomo'ob yéetel u x dzipitilo'ob.