Read Yucateco Éxodo 37 Bible Online

Éxodo 37 - Yucateco bible

Éxodo 37

¹Bezaleele' tu beetaj jun p'éel ba'as che', yéetel u che'il acacia, cu p'isic ca'ach jun metro yéetel diez centímetros u chowaquil, sesenta yéetel cinco centímetros u cóochil, sesenta yéetel cinco centímetros u ca'anlil.

²Ca tu to'aj yéetel chéen oro ichil yéetel tu bak paach, ca tu tu súut kaxtaj yéetel oro.

³Tu beetaj xan can p'éel x julubo'ob yéetel chéen oro u ti'al u can dzíit yooc, ca'a p'éel u ti'al jun tzéeli', yéetel ca'a p'éel u ti'al u láak jun tzéel.

⁴Tu beetaj xan u x katáabilo'ob yéetel u che'il acacia ca tu bonaj yéetel oro,

⁵cu dzo'ocole', tu julaj tu x julubilo'ob yano'ob ca'ach tu tzéelo'ob le ba'asche'o', u ti'al u páajtal u bisa'al.

⁶Tu beetaj xan u maac chéen oro u ca'aj, u chowaquile' jun metro yéetel diez centímetros, u cóochile' sesenta yéetel cinco centímetros,

⁷yéetel ca'a túul xiknal aj cuxa'ano'ob oro u ca'ajo'ob póola'ano'ob yéetel x bajab tu ca'a xul u maac.

⁸Le maac yéetel le ca'a túul xiknal aj cuxa'ano'obo' jun tacáalilo'ob, jun túule' tip'a'an ti' jun p'éel u xuul u láak jun túule' ti' u láak u xuul,

⁹bey túuno' j p'áat actáan jun túul ti' u láak, ba'ale' u táan yicho'obe' j p'áat tu tojil u maac, u xiiko'obe' u xit'majo'ob yóokol le maaco' u ti'al pixico'ob.

¹⁰Bezaleel tu beetaj xan jun p'éel táasche', yéetel u che'il acacia, u chowaquile' noventa centímetros, u cóochile' cuarenta yéetel cinco centímetros, u ca'anlile' sesenta yéetel cinco centímetros.

¹¹Tu to'aj u bak paach yéetel chéen oro, ca tu súut kaxtaj yéetel oro;

¹²Tu beetaj yéetel jun yáal siete centímetros u cóochil u ti'al u mu'uka'antal, ca tu súut kaxtaj yéetel oro.

¹³Tu beetaj xan can p'éel u x julubilo'ob yéetel oro, ca tu dzáa tu can ti'itz tu tojil u yooco'ob,

¹⁴ca p'áatac taakal ti' u jáal tu'ux cu ch'a'ic muuko', u ti'al u ju'ulul ti'ob u x katáabilo'ob u ti'al ca páatac u bisa'al le táasche'o'.

¹⁵Le x katáabilo'ob u ti'al u bisa'al le táasche'o', tu beetaj yéetel u che'il acacia, cu dzo'ocole' tu to'aj yéetel oro.

¹⁶Tu beetaj xan yéetel chéen oro le nu'uculo'ob cu bin j dzaabil ca'ach yóokol le táasche'o', leti' le nu'uculo'oba': jay laco'ob, x jo'opo'ob, x pichelo'ob, yéetel u nu'uculo'ob ukul, u ti'al le ti'ibil óolalo'ob ja'il u ca'ajo'.

¹⁷Bezaleele' tu beetaj xan póolbil yéetel x bajab le x t'uchub sáas yéetel chéen oro. U x t'uchubil, u chuun, u chúujilo'ob, u nicte'ilo'ob láaj jun tacáalilo'ob;

¹⁸tu tzéelilo'obe' cu síijil seis u kabo'ob, óox p'éel tu jujun tzéelil.

¹⁹Ti' jujun dzíit u seis kabo'ob sijnalo'ob tu chuun, yaan ca'ach óox p'éel u chúujilo'ob chíica'an ti' almendra, yéetel jun dzíit u jalalil yéetel u nicte'ilo'ob,

²⁰chéen tu chuune' yaan can p'éel u chúujil láili' beyo'ob almedrae' yéetel u chúujil bey xan u nicte'ilo'ob.

²¹Tu jujun dzíitil u seis kabo'ob cu síijilo'ob ti' le x t'uchub sáaso' yaan u chúujilo'ob yáanal.

²²U chúujilo'ob yéetel u kabo'obe' jun p'éelili'ob yéetel le x t'uchub sáaso', lela' beeta'an ca'ach yéetel chéen oro póola'an yéetel x bajab.

²³Tu beetaj xan u siete mejen sáaso'ob chéen yéetel oro, u x machab chúuquilo'ob, yéetel u jayacsáal laco'ob.

²⁴U ti'al u beetic le x t'uchub sáas yéetel u nu'uculo'obo', kabéetchaj treinta yéetel óox p'éel wuudzo'ob chéen oro.

²⁵Bezaleel tu beetaj u multuunil kultaj u ti'al u tóocal poom yéetel u che'il acacia can ti'itz ca'achi cuarenta yéetel cinco centímetros u chowaquil, cuarenta yéetel cinco centímetros u cóochil, noventa centímetros u ca'anlil. U baaco'obe' jun p'éelili' yéetel le multuunil kultajo'.

²⁶Cu dzo'ocole' tu bonaj yéetel chéen oro yóokol, tu can tzéelilo'ob bey u baaco'ob, ca tu súut kaxaj yéetel oro.

²⁷Tu dzáa xan yáanal u súut kaxabilo'ob wa jay p'éel x julubo'ob oro u ca'ajo'ob, ca'a p'éel u ti'al u jujun ti'itzil, ca'a p'éel u ti'al u láak u jun ti'itzil, u ti'al u ju'ulul u katáabilo'ob beyo' cu páajtal u cúuch queléembalta'al le u multuunil kultajo'.

²⁸U x katáabilo'obe' j beeta'abo'ob yéetel u che'il acacia, cu dzo'ocole' ca j bo'on yéetel oro.

²⁹Bezaleele' tu beetaj xan u quili'ich aceiteil u ti'al jun páaycunaj, tu máakantaj xan le poom chéen yéetel qui'iboc ba'alo'ob je'el bix u beetico'ob le j beetaj qui'iboc ba'alo'obo'.