Read Yucateco Éxodo 38 Bible Online

Éxodo 38 - Yucateco bible

Éxodo 38

¹Bezaleele' tu beetaj yéetel u che'il acacia u multuunil kultaj u ti'al u yúuchul láaj tóoco'. Can ti'itz tu beetilac, ca'a p'éel metros yéetel veinte yéetel cinco centímetros u tzéelilo'ob, jun p'éel metro yéetel veinte cinco centímetros u ca'anlil.

²U ti'al u can ti'itzilo'obe', tu beetaj can dzíit u baaco'ob, lelo'oba' beeta'abo'ob jun p'éelili' yéetel le u multuunil kultajo' tuláacalo'ob to'ano'ob yéetel bronce.

³Tuláacal u nu'uculo'ob le u multuunil kultajo' tu beetaj xan yéetel bronce, le u nu'uculo'ob u ta'anil káako', le x jo'opo'obo', le nucuch laco'obo', le x jup'ubilo'obo' bey le x machab káako'.

⁴Tu beetaj xan yéetel bronce u nu'ucul u káabta'al bak ca tu dzáa yáanal le u multuunil kultajo', chúumuc ti' u ca'anlil

⁵Tu beetaj xan can p'éel x julubo'ob u ti'al u can ti'itz u nu'ucul u káabta'al le bako', u ti'al u ju'ulul u x katáabilo'ob.

⁶Cu dzo'ocole' tu beetaj u x katáabilo'ob le u multuunil kultaj yéetel u che'il acacia, ca tu to'aj yéetel bronce,

⁷ca tu julaj tu x julubilo'ob le yano'ob tu tzéelo'ob le u multuunil kultajo', u ti'al u páajtal u cúuch queléembalta'alo'ob. Le u multuunil kultajo' tu beetaj jóojochil, yéetel che' tu beetilac.

⁸Bezaleele' tu beetaj le u nu'ucul ja' bey le tu'ux cu t'uchquinta'alo' yéetel u néen[13] le co'olelo'ob cu meyajo'ob ca'ach tu noj Paselil much'talo'.

⁹Bezaleele' tu beetaj u káasabilo'ob u péet paach le quili'ich najo', tu tzéel j noojole' yaan ca'ach cuarenta yéetel cinco metros u chowaquil, tu beetaj yéetel jaxbil lino.

¹⁰U veinte yocmalo'ob yéetel tu'ux cu yedztalo'obe' tu beetaj yéetel bronce, u x léechebilo'ob yéetel u mejen x julubilo'obe' tu beetaj yéetel plata.

¹¹Tu j xamane' yaan ca'ach káasabo'ob cuarenta yéetel cinco metros u chowaquil, u veinte yocmalo'ob yéetel tu'ux cu yedztalo'obe', bronce u ca'ajo'ob, u x léechebilo'ob yéetel u mejen x julubilo'obe' beeta'ano'ob ca'ach yéetel plata.

¹²Tu j chikine' yaan ca'ach veinte yéetel ca'a p'éel metros ca'a tac táancoch u káasabil, yéetel u diez ocomo'ob bey u diez nu'ucul u yedztalo'ob, u x léechebilo'ob bey u mejen x julubilo'obe' beeta'abo'ob yéetel plata.

¹³Tu tzéel j lakine' yaan xan ca'ach veinte yéetel ca'a p'éel metros ca'a tac táancoch u káasabil.

¹⁴Tu tzéel tu'ux cu yúuchul ocbale', yaan ca'ach siete metros u káasabil, yéetel óox p'éel u yocmal, yéetel u yóox p'éel u nu'ucul u yedztal;

¹⁵ti' u láak jun tzéel yéetel tu ca'a tzéelil tu'ux cu yúuchul ocbal ichil u péet paach, yaan ca'ach míin siete metros u káasabil, óox p'éel u yocmal yéetel u nu'ucul u yedztalo'ob.

¹⁶Tuláacal u káasabilo'ob tu bak paach le x péet paacho' beeta'ano'ob yéetel jaxbil lino.

¹⁷U x t'uchubilo'ob u ti'al le ocomo'ob beeta'ano'ob ca'ach yéetel bronce, u x léechebilo'ob yéetel u mejen x julubilo'obe' j beeta'abo'ob yéetel plata, u ni' le ocomo'obo' to'ano'ob ca'ach yéetel plata. Tuláacal u yocmalo'ob le péet paacho' láaj yaan ca'ach u mejen x julubilo'ob beeta'ano'ob yéetel plata.

¹⁸U dzoocbale', le káasab u yocbalil te x péet paacho' but' chuyta'an yóokol yéetel chacpuke'en nook, chacjome'en nook chac nook yéetel jaxbil lino, nueve metros u chowaquil, ca'a p'éel metros veinte yéetel cinco centímetros u ca'anlil, bey beeta'abic u káasabilo'ob le x péet paacho'.

¹⁹Yaan ca'ach can dzíit u yocmalo'ob yéetel can p'éel u nu'ucul u t'uchtalo'ob beeta'ano'ob yéetel bronce, u x léechebilo'ob yéetel u mejen x julubilo'ob, tu ni' u yocmilo'obe' tu to'aj yéetel plata.

²⁰Tuláacal u ba'aluba'ob le quili'ich naj yéetel u x péet paach káastique', beeta'ano'ob yéetel bronce.

²¹Je'el bix tu ya'alajilac Moisés, je'el bix xan tu nu'uctajilac Itamar u paal aj kiin Aarone', le j levitaobo' tu yilajo'ob buca'aj máascab taakin meyajnaj iquil beeta'abic u quili'ich najil nup t'aan.

²²Bezaleel, u paal Uri u yáabil Hur ti' u taalbal ti' u ch'i'ibalo'ob Judae', tu beetaj tuláacal ba'ax tu ya'alaj ca'ach Yuumtzil ti' Moisés ca beeta'ac.

²³Áanta'ab tumen Aholiab, u paal Ahisamac, ti' u taalbal ti' u ch'i'ibal Dane': j meen máascab, aj jit', aj but' chuuy ti' chacpuke'en nook, ti' chacjome'en nook, ti' chac nook yéetel ti' lino.

²⁴Tuláacal le oro meyajnaj u ti'al u beeta'al tuláacal ba'ax kabéetchaj u ti'al le quili'ich najo', u oroil ti'ibil óolal j taasa'ab ti' Yuumtzil, tu pa'ate'ile' kuchpaj novecientos sesenta yéetel cinco wuudzo'ob, treinta gramos, je'el bix u p'iisil le quili'ich najo'.

²⁵Le plata j mo'ol iquil xo'oquic u cajnáalilo'obe', tu chucaj tres mil trecientos diecinueve wuudzo'ob yéetel quinientos veinte yéetel cinco gramos, je'el bix u p'iisil le quili'ich najo'

²⁶Tuláacal le j ch'a'ab u kaaba'ob maanal veinte u ja'abilo'obe' tu chucaj seis cientos tres mil quinientos cincuenta wíinico'ob, tu jujun túulil ti'obe' tu dzáa cinco gramos ca'a tac táancoch plata, je'el bix u p'iisil quili'ich naje'.

²⁷Yaan ca'ach xan tres mil tres cientos wuudzo'ob plata u ti'al u beeta'al u x t'uchubilo'ob u ti'al quili'ich naj yéetel le x t'uchubo'ob u ti'al le káasabo'. Tuláacal le plata j meyajnaj u ti'al le cien x t'uchubo'obo', tu bisaj treinta yéetel óox p'éel wuudzo'ob plata tu jujun p'éel u x t'uchubil.

²⁸Yéetel tuláacal le plata j dzaab tumen le j cajnáalo'obo', Bezaleele' tu beetaj u x léechebil le ocomo'obo', u piixil u ni' le ocomo'obo', bey u mejen x julubilo'ob.

²⁹Le bronce ti'ibil óolta'ab ti' Yuumtzile' tu chucaj dos mil trecientos diez yéetel seis wuudzo'ob yéetel cuatro cientos gramos,

³⁰yéetel le bronceo' j beeta'ab u x t'uchubilo'ob u jool u noj Paselil much'tal, u multuunil kultaj bronce u ca'ajo', u x póocobilo'ob bronce u ca'aj, yéetel tuláacal u nu'uculo'ob le u multuunil kultajo',

³¹bey xan le x t'uchubo'ob yéetel u x bajabilo'ob le u káasabil le x péet paach cu súut pachtic le quili'ich najo', bey le x t'uchubo'ob u ti'al u jool le x péet paacho'.