Read Yucateco Éxodo 4 Bible Online

Éxodo 4 - Yucateco bible

Éxodo 4

¹Moisés túune' tu núucaj: Leti'obe' bíin u tuuculo'ob táan in tusico'ob, ma' bíin u táan óolteno'obi'. Ba'ale' bíin u ya'alo'ob: Yuumtzile' ma' chíicpajac techi'.

²Yuumtzil túune' tu káat chi'itaj ti': ¿Ba'ax le yaan ta kabo'? Moisese' tu núucaj: Jun p'éel Xóolte'.

³Yuumtzile' tu ya'alaj ti': Pul te j lu'umo'. Moisese' tu pulaj te j lu'umo', tu séeblaquil suunaj jun túul caan le xóolte'o'. Moisese' j lacchaj u yáalcab u ti'al u náachtal ti',

⁴ba'ale' Yuumtzile' tu ya'alaj ti': Tich' a kabe' ca mach tu nej. Moisese' tu tich'aj u kab, le ca tu machaj le caano', j suunaj xóolte'il tu ca'a téen.

⁵Tu ya'alaj Yuumtzil: Lela' u ti'al ca u yocsaj óolto'ob dzo'oc u chíicpajal teech Yuumtzil u Junab Ku a j máanjan ch'i'ibalo'ob, u Ku Abraham, u Ku Isaac, u Ku xan Jacob.

⁶Yuumtzile' tu ya'alaj ti': Bejela'e' oques a kab ta tzeem. Moisese' tu yocsaj u kab tu tzeem, ba'ale' le ca tu jóokesaje', tu yilaj yaan u koja'anil jáaway ti', sac bey bate'.

⁷Ku túune' tu ya'alaj ti': Oques tu ca'a téen a kab ta tzeem. Moisese' tu beetaj beyo', le ca tu jóoksaj tu ca'a tene', dzo'oc u yutztal je'el bix tuláacal u wíinclile'.

⁸Cu dzo'ocole' j a'ala'ab ti' tumen Yuumtzil: Wa yéetel le yáax chíiculalal ma' tu táan óoltique'echo'ob mix tu yu'ubico'ob ba'ax ca wa'alique', je'el túun u táan óoltiquecho'ob yéetel le ca'a chíiculalo';

⁹Ba'ale' wa ma' tu yocsaj óoltiquecho'ob mix tu táan óoltiquecho'ob mix yéetel le ca'a p'éel chíiculala', jóokes u ja'il le áalcab ja'o', wec te j lu'umo'. Le quéen cóojoc le ja' te j lu'umo', cu suut ki'ikil.

¹⁰Moisese' tu núucaj: ¡Waay! In Yuumtzil, tene' ma' t'áalcab in t'aani', cu dzo'ocole' lela' ma' jo'olojbe'eni', mix táantac yúuchul teen iquil a t'aan yéetel a palitzila', le ba'ala' jun p'éel ba'al úuchben. Je'el jay téen ca t'aanaquene' cu t'i'ilil in waak.

¹¹Ba'ale' Yuumtzile' tu núucaj: ¿Máax dzáamail u chi' le máaco'? ¿Ma' wa teen le máax beetic u toottal, u cóoctal, u ch'óoptal wa ca paacatnac?

¹²Bey túuno', xeen, tumen teen bíin yanaquen ta wéetel, le quéen t'aanaqueche' bíin in ca'ans teech ba'ax unaj a wa'alic.

¹³Moisese' tu pechajubáa u ya'al: ¡Waay! Yuumtzil, beet utz a túuxtic u láak wa máax.

¹⁴Yuumtzil túune' j kuuxilnaj yéetel Moisés ca tu ya'alaj ti': ¡Te'elo' ti' yaan a sucu'un Aarón j levita! in wojel jach ma'alob u t'aan. U láak ba'ale' táan u taal u nactáantech, yaan u sen qui'imacchajal u yóol le quéen u yilech.

¹⁵T'aanen yéetel, tzol ti' tuláacal le ba'ax yaan a wa'ale'; teen xane' yaan in wantal ta wéetele'ex le quéen t'aananque'exe', bíin in nu'ucte'ex ba'ax unaj a beetique'ex.

¹⁶Teche' yaan a wa'alic ti' Aarón le ba'ax bíin in wa'al teche', Aarone' yaan u ya'alic ti' le caaj le ba'ax bíin a wa'al ti'e'.

¹⁷Bis le xóolte'a', tumen yéetel bíin a beet jak óol ba'alo'ob.

¹⁸Moisese' j suunaj tu yotoch Jetro u suegroe' ca tu ya'alaj ti': Yaan in suut Egipto tu'ux yaan in láako'ob in wéet ki'ikelo'ob. In káat in wila'a wa láili' cuxa'ano'obe'. Jetroe' tu núucaj: Xi'ic teech utzil.

¹⁹Ca'aliquil ti' yaan ca'ach Moisés tu lu'umilo'ob Madiane', Yuumtzile' tu ya'alaj ti': Suunen Egipto tumen dzo'oc u láaj quíimil le máaxo'ob u káato'ob u quíimsecho'ob ca'acho'.

²⁰Moisés túune' tu ch'a'a u yatan yéetel u paale',[3] ca tu na'acsajo'ob yóokol jun túul burro, ca j suunaj Egipto. Tu bisaj xan tu kab u xóolte' Ku.

²¹Cu dzo'ocole' Yuumtzile' tu ya'alaj ti' Moisés: Le quéen kuchquech Egiptoe', qui' il a wil a beetic tu táan faraón le máactzilo'ob dzo'oc in dzáic teech u páajtalil a beetica'. Tene' yaan in beetic u pechicubáa u ti'al ma' u cha'ic u jóokol le j israelitaobo'.

²²Teech túune' bíin a wa'al ti' faraón: Bey u ya'alic Yuumtzila': Israele' u nojochil in paal.

²³Dzo'oc in wa'alic teech ca cha'a' u jóokol in paal u ti'al ca xi'ic u kulten; ba'ale' tu yo'olal ma' a cha'a' u jóokole', bin in caaj in quíims a nojoch a paal.

²⁴Ti' jun p'éel cúuchil te j bejo' tu'ux ca'ach cun u máans áakab Moisés yéetel u yatan bey xan u paale', j jóok Yuumtzil u nactáant Moisés ca j máan u quíimsic.

²⁵Séfora túune', tu ch'a'a jun p'éel tuunich yaan u yeje' ca tu xotaj u yoot'el u j xiibil u paal; cu dzo'ocole' tu machaj u yoot'el u j xiibil le chan xi'ipalo' tu cu'ultaj tu yooc Moisés ca tu ya'alaj ti': Tu jaajile' jun túulech ki'ikel íicham in ti'al.

²⁶Yuumtzil túune' tu p'ataj u bin Moisés. Séfora xane' tu ya'alaj j ki'ik íichamil ti' Moisés tu yo'olal le súut kuptajo.

²⁷Ca'aliquil Yuumtzile' dzo'oc u ya'alic ti' Aarón: Xeen a nactáantabáa yéetel Moisés te x tocoy lu'umo'. Aarone' j bine' ca tu nactáantaj Moisés tu witzil Ku. Te'elo' tu te'escuntaj yéetel jun p'éel dzu'udz

²⁸Moisés túune' tu tzicbaltaj ti' Aarón tuláacal le ba'ax tusbelta'ab ti' tumen Yuumtzil ca u ya'ale', bey xan le nucuch jak óolal ba'alo'ob a'ala'ab ti' ca u beete.

²⁹Cu dzo'ocole' j bino'ob tu ca'a túulilo'ob u much'quinto'ob u nuuquilo'ob Israel,

³⁰Aarone' tu tzicbaltaj tuláacal le ba'ax tu ya'alaj Yuumtzil ti' Moisese', tu beetaj xan tu táan le máaco'ob le jak óolal ba'alo'ob tu ya'alaj Ku ca u beeto'.

³¹Le máaco'obo' tu táan óolto'ob. Le ca tu yojéeltajo'ob xan dzo'oc u táan óolta'alo'ob tumen Yuumtzil, yéetel dzo'oc u yila'al bix u mukyajo'obe', j chinlajo'ob u kulto'ob Ku.