Read Yucateco Éxodo 40 Bible Online

Éxodo 40 - Yucateco bible

Éxodo 40

¹Yuumtzile' tu t'anaj Moisese' ca tu ya'alaj ti':

²Le quili'ich naj, u noj Paselil Much'talo', unaj a wa'alcuntic ti' u yáax kiinil yáax winal,

³Oques ichile' u ba'asche'il le nup t'aano', pix yéetel le káasabo'.

⁴Oques xan ichile' le táasche' yéetel le x t'uchub sáaso'. Ma'alob edzcunt le táasche'o, dzáa xan u sáaso'ob le x t'uchub sáaso'.

⁵Dzáa tu táan le ba'asche'o', le u multuunil kultaj beeta'an yéetel oro u ti'al u tóocal poomo', ch'uyquint xan u káasabil u jool le quili'ich najo'.

⁶Cu dzo'ocole' dzáa u multuunil kultaj u ti'al le ba'alo'ob cu láaj tóocalo'obo' tu jool le quili'ich naj, u noj Paselil Much'talo',

⁷Cu dzo'ocole', dzáa le nojoch cáat chúumuc ti' le quili'ich naj yéetel ti' le u multuunil kultajo', ca chup yéetel ja'

⁸Wa'alcunt túun le x péet paach tu bak paacho', ca ch'uyquint le káasab tu jool le x péet paacho'.

⁹Cu dzo'ocole', ch'a'a u aceiteil le jun páaycunajo', ca wec yóokol le quili'ich najo', bey xan tu yóokol tuláacal u nu'uculo'ob. Beyo' ca jun páaycuntic pa'ate'e' yéetel u nu'uculo'obo', cu p'áatal sen quili'ich.

¹⁰Wec xan u aceiteil jun páaycunaj yóokol u multuunil kultaj u ti'al le ba'alo'ob láaj tóocbilo', bey xan yóokol tuláacal u nu'uculo'ob. Beyo' ca jun páaycuntic u ti'al u p'áatal sen quili'ich.

¹¹Wec aceite yóokol le nojoch cáat yéetel u nu'ucul u yedztalo', ca jun páaycunte.

¹²Cu dzo'ocole', bis Aarón yéetel u paalal naadz ti' u noj Paselil Much'tal, beet u yichquilo'ob

¹³Aarone' u búuquint le nook beeta'an chéen u ti'alo'. Cu dzo'ocole' wec le aceite tu yóokolo', ca jun páaycunte bey in aj kiine'.

¹⁴Cu dzo'ocole' nadz u paalalo'ob, dzáa u suyemo'ob

¹⁵Wec aceite yóokolo'ob je'el bix ta beetaj ti' Aarono', ca p'áatco'ob in aj kiino'ob. Le quéen a wec le aceite yóokolo'obo', cu chúunul jun p'éel aj kiinil u ti'al tuláacal ja'abo'ob.

¹⁶Moisese', tu láaj beetaj je'el bix a'ala'abic ti' tumen Yuumtzile'.

¹⁷Bey túuno', le ca j chúun u ca'a p'éel ja'ab jóokoco'ob Egipto tu yáax kiinil yáax mese', wa'alcunta'ab le quili'ich najo'

¹⁸Moisese' tu wa'alcuntaj le quili'ich najo', tu t'alcuntaj u nu'ucul u yedztalo'ob, tu nup'aj u bujbil che'ilo'ob, tu dzáa u x katáabilo'ob, tu wa'alcuntaj u yocomilo'ob,

¹⁹tu xit'aj le pasel tu bak paach le quili'ich najo', tu dzáa xan u piix tu yóokol je'el bix tu ya'alajilac Yuumtzil ca beeta'aco'.

²⁰Cu dzo'ocole' Moisese' tu ch'a'a u póolbil tuunichilo'ob le nup t'aano' ca tu dzáa ichil le ba'asche'o'; bey xan tu dzáa u x katáabilo'ob yéetel u maac le ba'asche'o', ca tu bisaj ichil le quili'ich najo'; cu dzo'ocole' tu ch'uyquintaj le x káasabo', ca tu balaj le ba'asche' je'el bix tu ya'alajil Yuumtzilo'.

²²Cu dzo'ocole' tu dzáa le táasche' ichil u noj paselil much'tal tu j xaman le quili'ich najo', ba'ale' tu paach le x káasabilo'.

²³Tu ma'alob tzolaj u waajil u táan Yuumtzil yóokol le táasche', je'el bix u ya'almajil Yuumtzilo'.

²⁴Tu t'alcuntaj xan le t'uchub sáas, ichil u noj Paselil Much'tal, actáan ti' le táasche' tu j noojol le quili'ich najo',

²⁵tu t'abaj le sáaso'ob je'el bix u ya'almajil Yuumtzilo'.

²⁶Le u multuunil kultajo' beeta'an yéetel oro', tu dzáa ichil le u noj Paselil Much'tal tu táan le x káasabo',

²⁷ca tu tóocaj le qui'iboc poom jach je'el bix u ya'almajil Yuumtzilo'.

²⁸Cu dzo'ocole' Moisese' tu ch'uyquintaj le x káasab u ti'al u jool le quili'ich najo';

²⁹tu dzáa xan le u multuunil kultaj u ti'al ba'alo'ob cu láaj tóocal tu jool le quili'ich najo', u noj Paselil Much'talo', ca tu tóocaj ba'alche'ob yéetel jejeláas janalbe'en neeko'ob bey ti'ibil óolalo'ob yóokol le u multuunil kultaj je'el bix ya'almajil ca'ach Yuumtzilo'.

³⁰Le nojoch cáato' tu dzáa chúumuc ti' le u multuunil kultajo' yéetel ti' u noj Paselil Much'talo', ca tu chupaj yéetel ja' u ti'al p'o' kab yéetel p'o' ooc.

³¹Ichil le nojoch cáat cu jóokesico'ob ca'ach ja' Moisés yéetel Aarón u ti'al u p'o'ic u kabo'ob yéetel u yooco'ob

³²Cu p'o'ico'ob ca'ach u kabo'ob yéetel u yooco'ob le quéen oojco'ob tu noj Paselil Much'talo', bey xan le quéen u nadzuba'ob tu multuunil le kultaj, je'el bix tu ya'alajil Yuumtzil ti' Moiseso'.

³³Tu dzo'ocbale' Moisese' tu wa'alcuntaj le x péet paach tu bak paach le quili'ich naj yéetel u multuunil le kultajo', ca tu ch'uyquintaj u káasabil u jool le x péet paacho'. Le ca j dzo'oc u wa'alcunta'al u noj Paselil Much'talo',

³⁴le múuyalo' tu balaj u noj Paselil Much'talo', ca j chu'up túun yéetel u nojbe'enil Yuumtzil le quili'ich najo'

³⁵Moisese' ma' tu páajtal ca'ach u yocol tu noj Paselil Much'talo', tumen le múuyalo', jéedz ca'ach yóokol, ca tu chupaj yéetel u nojbe'enil Yuumtzil le quili'ich najo'.

³⁶Le quéen líikic ca'ach le múuyal yóokol le quili'ich najo', le j israelitaobo', cu wach'ico'ob u paselo'obe', cu jo'op'ol u bino'ob,

³⁷ba'ale' wa ma' tu líikil ca'ach le múuyalo', leti'obe' ma' tu péeco'ob, tumen cu pa'atico'ob u líikil le múuyalo'

³⁸Ti' tuláacal u kiinil táan u bin le israelitaobo', tu táan yicho'obe, ti' yaan u múuyal Yuumtzil yóokol le quili'ich naj buul kiino', yéetel jun p'éel káak buul áakab.