Read Yucateco Éxodo 5 Bible Online

Éxodo 5 - Yucateco bible

Éxodo 5

¹Cu dzo'ocol lela', Moisés yéetel Aarone', j bino'ob u ya'alo'ob ti' faraón: Bey dzo'oc u ya'alic Yuumtzil u Ku Israela': P'at u bin in caajal ti' le x tocoy lu'um u ti'al u beeto'ob teen jun p'éel kinbesaj tin nojbe'enil.

²Ba'ale' faraone' tu núucaj: ¿Máax túun le Yuumtzil, u ti'al ca in dzo'ocbes u t'aan tu yo'olal in cha'ic u bin le israelitaobo'? Mix in kaj óol Yuumtzili', mix bíin in cha'a u jóokol le j israelitaobo'.

³Leti'ob túune' tu ya'alajo'ob: U Ku le hebreobo' dzo'oc u taal u nuptáanto'on; let o'olale' yaan c bin ti' jun p'éel bej cu xíimbalta'al óox p'éel kiin te x tocoy lu'um u ti'al c kub quíimsbil ba'alche'ob ti' c Ku, ma' xan ca u quíimso'on ti' báan quíimil wa yéetel u ch'aac máascabi'.

⁴Ba'ale' u ajawil Egiptoe' tu ya'alaj ti'ob: Moisés, Aarón, ¿Ba'ax teen ca náisique'ex u yóol le máacob ti' u meyajo'obo'? ¡Xeene'ex meyaj tu ca'a téen!

⁵J a'ala'ab ti'ob xan tumen faraón: Bejela'e' ya'ab israelitaob caja'ano'ob ti' le lu'uma', ¿bin a ca'aje'ex a beete'ex u ch'éenel u meyajo'ob?

⁶Ti' le kiino', faraone' tu túuchi'itaj a'albil ti' u j mayolo'ob yéetel ti' u nuuquil u múuch'ul le j meyajo'obo':

⁷Ma' a dzáique'ex su'uc ti' le j israelitaob u ti'al u beetico'ob le paklu'um je'el bix suuquilo', ¡xi'ico'ob leti'ob u molo'ob le su'uco'!

⁸láili' tza'ex ti'ob ca u beeto'ob le buca'aj paklu'um suuc u beetico'ob tac bejela'o'. ¡Ma' u bineltic mix jun p'éel paklu'um! Ma' óolalo'ob let o'olal cu yawat a'alico'ob: ¡Co'one'ex c kub quíimsbil ba'alche'ob ti' c Ku!

⁹Beete'ex u asab chich meyaj le máaco'obo'; dza'ex ba'al u beeto'ob tu yo'olal ma' u táan óoltico'ob tuuso'ob.

¹⁰Le j mayolo'ob yéetel u nuuquilo'ob le j meyajo', j jóoko'ob ca j bino'ob u ya'alo'ob ti' le máaco'obo': Faraone' dzo'oc u ya'alic ma' u dza'abal te'ex su'uc.

¹¹Bejela'e' te'ex bíin xi'ique'ex a mole'ex je'el tu'uxe'. Ba'ale' ma' bíin c jun p'íitcunte'ex le paklu'um suuc a beetique'exo'.

¹²Le j israelitaobo' j ki'itpajo'ob tuláacal Egipto u ti'al u caxtico'ob sakab u meyajtico'ob bey su'uque'.

¹³Sáamsamal cu tza'abal ti'ob tumen u j mayolo'ob faraón ca u kubo'ob le buca'aj pak lu'um suuc u beetico'ob le táan ca'ach u dza'abal su'uc ti'obo'. Tu yóokol lelo' cu ko'olol u nuuquil u j meyajo'ob le j israelitaobo', táan u ya'ala'al ti'ob: ¿Ba'ax o'olal mix jo'olji'ac, mix bejela'a' ta chúucbese'ex le paklu'um suuc a beetique'ex ca'ache'?

¹⁵U nuuquilo'ob u j meyajilo'ob le j israelitaobo', j bino'ob u ye'eso'ob u chi'ichnaquilo'ob tu táan le faraono' ca tu ya'alajo'ob ti': ¿Ba'ax teen cu beetic a tzicbe'enil bey ti' u palitzilo'oba'?

¹⁶Xo'ot' u dza'abal to'on su'uc, ba'ale' cu tza'abal to'on ca c beet paklu'um, tu yóokol lelo' c ko'olol. ¡Lelo' u si'ipil u j meyajo'ob a tzicbe'enil!

¹⁷Ba'ale' faraone' tu núucaj ti'ob: ¡Te'exe' chéen j ma' óole'ex! Let o'olal ca máan a wa'ale'ex: Co'one'ex c kub quíimsbil ba'alche'ob ti' c Yuumtzil.

¹⁸¡Xeene'ex j meyaj! Quex ma' bíin dza'abac te'ex su'uqui', yaan a kubique'ex le buca'aj paklu'um suuc a kubique'exe'.

¹⁹U nuuquil u j meyajo'ob le j israelitaobo' tu yilajo'ob talam le ca a'ala'ab ti'ob ma' bíin jun p'íitcuunsa'ac le buca'aj u meen paklu'umo'ob cu beetico'ob sáamsamal.

²⁰Le ca j jóoko'ob cu dzo'ocol u t'aano'ob tu táan le faraono' tu nuptáantajo'ob Moisés yéetel Aarón, máaxo'ob pá'atico'obe',

²¹ca tu ya'alajo'ob ti'ob: U yila'a Yuumtzil ba'ax dzo'oc a beetique'ex ca u jadze'ex. Tumen a si'ipile'ex ca u kaakas pacto'on u j nuuquilo'ob u j meyajo'ob faraón. Te'ex ta dzáaje'ex máascab tu kabo'ob u ti'al u quíimsico'on.

²²Moisés túune' tu ya'alaj ti' Yuumtzil, ichil u payalchi': Yuumtzil, ¿Ba'ax teen ca beetic bey ti' le caaja'? ¿Ba'ax o'olal ta túuchi'iten?

²³P'elac taaliquen j t'aan yéetel faraón ta kaaba'e', leti'e' dzo'oc u sen beetic u mukyaj a caajal, ba'ale' teche' ma' a beet mix ba'al u ti'al a toquiqui'.