Read Yucateco Éxodo 8 Bible Online

Éxodo 8 - Yucateco bible

Éxodo 8

¹Yuumtzile' tu ya'alaj ti' Moisés: Xeen a wil le faraono' ca a wa'al ti': Bey cu ya'alic Yuumtzila': Cha'a u jóokol in caajal u ti'al u kulten.

²Tumen wa ma' ta cha'ic u jóokole', tene' bíin in jadz tuláacal u lu'umil Egipto yéetel muucho'ob.

³Yaan u báan ya'abtal muucho'ob ti' le áalcab ja'o', le quéen jóokco'obe' bíin oojco'ob ta jalach naj, tu cúuchil a wenel, ta kaan, tu yotoch u nuuquil a aj meyajo'ob yéetel tu yotocho'ob a caajal, ta chujcabo'ob yéetel tu'ux cu ya'ach'ta'al u sacanil a wo'och waaj.

⁴Le muucho'obo' bíin síit'naco'ob ta wóokol, tu yóokol u nuuquil a aj meyajo'ob yéetel tu yóokol tuláacal a caajal.

⁵Yuumtzile' tu t'anaj Moisese' ca tu ya'alaj ti': A'al ti' Aarón ca u tich' u xóolte' tu yóokol áalcab ja'o', beel ja'ob yéetel yóokol xéel ja'o', u ti'al ca báanac muucho'ob ca u chupo'ob Egipto.

⁶Aarone' tu tich'aj u xóolte' yóokol u ja'ilo'ob Egiptoe', ca j chu'up tuláacal le lu'um yéetel muucho'ob.

⁷Ba'ale' le aj meeno'obo' tu queto'ob yéetel u pulya'ajo'obe' ca xan tu taaso'ob muucho'ob tu yóokol u lu'umil Egipto.

⁸Faraón túune' tu túuchi'itaj t'anbilo'ob Moisés yéetel Aarone' ca tu ya'alaj ti'ob: Káat óolte'ex ti' Yuumtzil ca u lukes to'on le muucho'ob ti' teen yéetel ti' in caajale', ca in cha'a u bin a caajal u kubo'ob quíimsbil ba'alche'ob ti' Yuumtzil.

⁹Moisese' tu núucaj ti' faraón: A'alten ba'ax kiin a káat ca páayalchi'inaquen ti' Yuumtzil ta wo'olal, tu yo'olal u nuuquil a aj meyajo'ob yéetel tu yo'olal a caajal u ti'al ca náachchajaco'ob le muucho'ob ti' teech yéetel ti' a jalach naj, ca p'áatco'ob chéen te áalcab ja'o'.

¹⁰Faraone' tu ya'alaj Sáamal: Moisés túune' tu núucaj: Bey bíin c beeto', ca páatchajac a wojéeltic mina'an u láak Yuumtzil je'el bix c Kue'.

¹¹Le muucho'obo' yaan u jóokolo'ob ta jalach naj u ti'al ca p'áataco'ob chéen ti' le áalcab ja'o'. Ma' bíin u chi'ichnaccunte'exi, mix teech mix u nuuquil a aj meyajo'ob mix a caajal.

¹²Moisés yéetel Aarone' jóoko'ob ti' u jalach naj faraón. Cu dzo'ocole' Moisese', tu káataj ti' Yuumtzil ca u náachcunt le muucho'ob u túuchi'itmaj yóokol faraono'.

¹³Yuumtzile' tu beetaj le ba'ax cu káatic ca'ach Moiseso', ca j quíim tuláacal le muucho'ob yaan ti' le najo'ob, ti' le táancabo'ob, yéetel ti' le coolo'obo'.

¹⁴Le máaco'obo' cu molico'ob ca'ach le j quimen muucho'obo', cu much'quintico'ob, let o'olale' j tu'uchaj ca'ach tuláacal tu'ux.

¹⁵Ba'ale' le ca tu yilaj faraón dzo'oc u ch'éenel le chi'ichnaquilo', tu pechubáa ma' tu cha'aj u jóokol le j israelitaob je'el bix u ya'almajil Yuumtzilo'.

¹⁶Yuumtzile' tu t'anaj Moisese' ca tu ya'alaj ti': A'al ti' Aarón u tich' u xóolte', ca u kol u mamayquil le lu'umo', u ti'al ca suunac koxolil tu yóokol tuláacal Egipto.

¹⁷Bey tu beetilaco'obo'. Aarone' tu kolaj le ma'ay lu'umo' ca j suunaj koxolil tuláacal u ma'ay lu'umil Egipto, u ti'al u báanal yóokol máaco'ob yéetel yóokol ba'alche'ob.

¹⁸Le aj meeno'obo', tu yóoltajo'ob u queto'ob xan u beetico'ob u báanal koxolo'ob yéetel u pulya'ajo'ob', ba'ale' ma' páatchajo'obi'. Ca'aliquil le koxolo'obo' táan u báanalo'ob yóokol máaco'ob yéetel yóokol ba'alche'ob.

¹⁹Le aj meeno'ob túuno' tu ya'alajo'ob ti' faraón: ¡Le ba'ala' ti' Ku u taal! Ba'ale' faraone', tu pechubáa ma' tu táan óoltaj ba'ax a'ala'ab ti'i', jach je'el bix u ya'almajil Yuumtzilo'.

²⁰Yuumtzile' tu ya'alaj ti' Moisés: Le faraono' yaan u bin piknal u sáastal ti' le áalcab ja'o', let o'olale' líiken ma'ayli' sáaschajque', ca xi'iquech a wa'al ti': Bey cu ya'alic Yuumtzila': P'at u bin in caajal u ti'al u kulten.

²¹Tumen wa ma' ta cha'ic u bine', bíin in túuchi'it áacacho'ob ta wóokol, tu yóokol u nuuquil a aj meyajo'ob, tu yóokol a caajal yéetel tu yóokol u yotocho'ob. Bíin chu'upuc yéetel áacacho'ob u najilo'ob Egipto, bey xan u lu'umil.

²²Ba'ale' le quéen úuchuc le je'elo' yaan in jun páaycuntic u lu'umil Gosén, tu'ux yaan in caajal, te'elo' ma' bíin yanac mix jun túul áacachi'. Beyo' bíin a wojéelt teen Yuumtzil, ti' yanen ti' le lu'uma'.

²³Yaan in jun páaycuntic in caajal ti' a caajal. Lelo' sáamal bíin úuchuc.

²⁴Bey tu beetilac Yuumtzilo', jun p'éel u sen éekjoch'e'enil áacacho'ob j báano'ob tu jalach naj faraón, tu yotoch u nuuquil u aj meyajo'ob, yéetel tuláacal u lu'umil Egipto. Le áacacho'obo' tu láaj óotzilcunto'ob le lu'umo'.

²⁵Faraón túune' tu túuchi'itaj t'anbil Moisés yéetel Aarone' ca tu ya'alaj ti'ob: Xeene'ex a kube'ex quíimsbil ba'alche'ob ti' a Kuex ba'ale' ma' jóokole'ex ti' le lu'uma'.

²⁶Moisese' tu núucaj: Ma' ma'alob ca c beet beyo', tumen le ba'alche'ob bíin c kub u ti'al quíimsbilo', j quili'ich ba'al u ti'al le j egipciobo'. Wa le j egipciob ca kuchco'ob u yilo'ob c quíimsic le ba'alche'ob cu kultico'obo', je'el u quíimsico'on yéetel ch'iine'.

²⁷Yaan c náachtal óox p'éel kiin u xíimbalil tac te x tocoy lu'umo', ca c kub quíimsbil ba'alche'ob ti' Yuumtzil c Ku je'el bix bíin u ya'al to'one'.

²⁸Faraón túune' tu ya'alaj: Je'el in cha'ic u bine'ex te x tocoy lu'um a kube'ex quíimsbil ba'alche'ob ti' Yuumtzil a Kuex wa ma' ta náachtale'exe'. Páayalchi'inene'ex xan tin wo'olal.

²⁹Moisés túune' tu núucaj: Le quéen jóokquen waye' quin páayalchi' ti' Yuumtzil ca náachchajac ti' teech, ti' u nuuquil a aj meyajo'ob yéetel ti' a caajal le áacacho'obo', wa tumen teech cu xu'ulul a tusico'on yéetel ma' ta pechicabáa u ti'al ma' u bin le j israelitaob u kubo'ob quíimsbil ba'alche'ob ti' Yuumtzilo'.

³⁰Le ca j jóok Moisés tu jalach naj faraone', j payalchi'inaj ti' Yuumtzil,

³¹Yuumtzil xane' tu beetaj le ba'ax tu káataj Moiseso': Le áacacho'obo' j náachachjo'ob ti' faraón, ti' u nuuquil u aj meyajo'ob yéetel ti' u caajal.

³²Ba'ale', faraone' tu ca pechubáe' ma' tu p'ataj u jóokol le j israelitaobo'.