Read Yucateco Job 10 Bible Online

Job 10 - Yucateco bible

Job 10

¹¡Dzo'oc u náacal in wóol ti' le cuxtala'! Bin in ca'aj in babal a'al ba'ax cu yúuchul ti' teen.

²¡Ku ma' a wa'alic si'ipilnaja'anen! ¡A'al ti' teen ba'ax o'olal ca taquic in pool!

³Wa bey ta beetilaqueno', ¿Utz wa wilic a loobiltiquen yéetel a kex óoltiquen, u ti'al a we'esic utz ba'ax cu beetic le j loolob máaco'obo'?

⁴U káat wa ya'ale', ¿je'el bix u pactic le ba'alo'ob le wíinico'obo' bey a pactic teech?

⁵¿U káat u ya'al cóom a cuxtal je'el bix u cuxtal jun túul wíinique'?

⁶¿Ba'ax teen túun táan a máan a caxant in si'ipilo'ob yéetel in kebano'ob,

⁷quex tumen a wojel ma' si'ipilnaja'anene' mix máac xan cu páajtal u toquiquen ti' a kab?

⁸Teche' jach ta kabil ta beetajen, ¡Ba'ale' bejela'e', a káat a xu'ulsen!

⁹Ka'ajac ti' teech yéetel kat a beetmajen: ¿Bin a ca'aj a suten ma'ay lu'umil tu ca'a téen?

¹⁰Ta beetaj in wíinclil bey u pa'atal leche jo'ole';

¹¹ta to'aj yéetel bak bey xan yéetel oot'el, ta kaxla'antaj in baaquelo'ob yéetel in xiich'elo'ob;

¹²Ta dzáa ti' teen cuxtal yéetel yaacunaj, cu dzo'ocole' ta canantajen u ti'al ma' in quíimil.

¹³Ba'ale' bejela'e', quin kuchul in wojéelt yaan ba'ax a ta'acmaj ca'ach ta pucsi'ikal:

¹⁴Táan ca'ach bacáan a sen ilic wa je'el in kebanchajal u ti'al ca a xot kinten tu yo'olal in si'ipil.

¹⁵Wa yaan in si'ipile', kaas in wanil; wa mina'an in si'ipile', chéen tu yo'olal jun p'íit ba'al cu páajtal u qui'imactal in wóol, tumen a jach t'onquintmajen yéetel a wóotziltmaj in wóol.

¹⁶Wa quin beetic in nonojbáile', teche' beyech jun túul leóne', ca ch'a'apachtiquen, ca beetic tac máactzilo'ob u ti'al a xu'ulsiquen.

¹⁷Ma' tu bineltic máax a'alic ba'al tin wo'olal; sen p'u'ujech ti' teen; ¡beyech aj ba'atelo'obe' ca ba'ateltiquen x ma' je'elelil!

¹⁸¿Ba'axten ta cha'aj in síijil? Unaj ca'ach in quíimil ma'ili' ila'aquen tumen mix máaque',

¹⁹Dzo'oc ca'ach in bin tin mucnal p'elac jóokiquen tu jobnel in maamae'; quin p'áatal ca'ach bey ma' j síijene'.

²⁰Bey tumen sen cóom in cuxtala', ¡ma' a sajbe'encunsiquen! Cha'a u yáantal ti' teen jun p'íit qui'imac óolal

²¹ma'ili' in bin j xíimbal tu'ux mix bikin bíin lukuquene', tu lu'umilo'ob éekjoche'enil yéetel éekjome'enil,

²²tu lu'umilo'ob éekjoch'e'enil yéetel sat óolal, tu'ux tac le sáasilo' éejoch'e'en.