Read Yucateco Job 11 Bible Online

Job 11 - Yucateco bible

Job 11

¹Zofar j naamatita túune' tu núucaj beya' Tuláacal le ma' beelal t'aano' cu páajtal u núuca'al, tumen ma' tumen u sen úuchul t'aane' ca tuculta'ac no'oja'an ba'ax cu ya'ala'al.

³¿Táan wa a tucultic tumen suuc a p'u'up'u'uchic a waake' bin a ca'aj a beet maquic c chi' mix máac bíin páatchajac u núuquic a p'a'as t'aano'ob?

⁴Teche' ca wa'alic tojtac ba'axo'ob ca ca'anbesic, teech xane' ca tuculticabáa utz a cuxtal.

⁵¡Quexi' wa ca t'aanac Ku u ti'al ca u núuc ba'ax ca wa'alic!

⁶Leti'e' je'el u ca'anbesiquech u muculil le kaj óolalo', le ba'axo'ob sen talamo'ob u ti'al j ojéelta'al. Beyo' je'el a wilic ma' u jadzech Ku je'el bix a najmatique'.

⁷¿Ca tucultic wa a kuchul a wojéelt u talamilo'ob u kaj óolal Junab Ku u ti'al ca yanac a na'at je'el bix leti'e'?

⁸¿Ba'ax cu páajtal a beetic, wa u asab ca'anal ti' le ca'ano'obo'? ¿Ba'ax a wojel teech wa asab taam ti' u dzu' le lu'umo'?

⁹Asab nuuctaco'ob ti' le lu'umo' yéetel asab cóochtaco'ob ti' le ka'anabo'.

¹⁰Wa cu taal Ku u mach wa máax u ti'al u p'is óolte', ¿Máax bíin táabac u toc tu kabe'?

¹¹Leti'e' u yojel máax cu tuus; leti'e' cu yilic le kaasa'anilo', ¿Ca tucultic wa ma' tu yilic?

¹²Le kiin bíin suucac u burroil káaxe', le j ma' na'ato' bíin u ya'al bey ti' ba'ax no'oja'an.

¹³Utzquint a cuxtale', káat óolnen túun ti' Ku.

¹⁴Wa sen ya'ab a kebano'obe', náachcuntabáa ti'ob; ma' a cha'ic u yáantal kasa'anil ta wotoch.

¹⁵Beyo' bíin páatchajac a líikesic a wich x ma' kebanile', ma' bíin a ch'a'a' sajaquili', bíin xan yanac ti' teech jéedzel óolal;

¹⁶bíin a tu'ubes a mukyajo'ob; bey je'el bix u tu'ubul ti' teech le ja' cu máano'.

¹⁷A cuxtale', bíin jóopbalnac je'el bix le kiin tu chúumuc ca'ano'; u súutuquilo'ob a éekjoch'e'enile' bíin béeyaco'ob u jóom sáasilil u taal u sáastale'.

¹⁸Bíin yanac ti' teech alab óolal, beyo' bíin cuxlaquech x ma' sajaquil; bíin qui'iqui' wenequech tumen Ku a aj canan.

¹⁹Mix ba'al bíin ja'asic a wóol ca'aliquil táan a je'elel. ya'ab máaxo'ob bíin taalaco'ob u káato'ob teech áantaj.

²⁰Ba'ale' le loolob máaco'obo', chéen cunel bíin u caxto'ob áantaj; ma' bíin yanac tu'ux u ta'acbesicuba'obi', u alab óolo'obe', chéen quíimil.