Read Yucateco Job 12 Bible Online

Job 12 - Yucateco bible

Job 12

¹Job túune' tu núucaj: ¡Jach tu jaajile', te'ex u aj ojéelajilo'ob le caajo', le quéen quíimique'exe', bíin xu'uluc xan le ojéelajilo'!

³Ba'ale' tene' xane' yaan in na'at je'el bix te'exe'. ¿Máax ma' u yojel le ba'axo'oba'?

⁴Quex tumen mina'an in si'ipil yéetel toj in cuxtale', quex tumen cu yu'uba'al xan ca'ach in payalchi' tumen Kue', in wéet bisajba'obe', cu che'ejtiqueno'ob.

⁵Le máax utz u bin ti' u cuxtale', cu dzáic jun tzéelil le máax kaas u bin ti'o'; ma' yaj tu yóol u léench'intic le máax ta'itac u lúubulo'.

⁶Tu yotoch le j oocolo'obo', yaan jéedzel; le máaxo'ob cu ya'alaj ba'alo'ob ti' Kue, ma'alob yanilo'ob, cu tucultico'ob ti' yaan Ku tu kabo'obe'.

⁷Káat chi'inen ti' le ba'alche'ob wa ti' le ch'íicho'obo': cu páajtal u ca'anbesiquecho'obe'.

⁸Bey xan ti' le lu'um yéetel u cayilo'ob le ka'anabo' cu páajtal a káatic ti'ob ca u ca'anbesecho'obe'.

⁹¿Yaan wa máax ma' u yojéel wa Ku beetmail tu kabil tuláacal ba'ali'?

¹⁰Tu kab yaan u cuxtal tuláacal ba'ax yaan cuxtal ti'.

¹¹Le xiquino' cu yu'ubic tu beel ba'axo'ob cu ya'ala'al, le chi' xano' cu yu'ubic ba'ax qui' wa ma' qui'.

¹²Le nuxibo'obo' ya'ab ba'ax u yojelo'ob, u ja'abilo'ob dzaamil u ojéelajo'ob.

¹³Ba'ale' Junab Kue yaan u na'at yaan xan u páajtalil; leti'e' cu nu'uctic ba'ax bíin u beete, yojel xan bix yúuchac u beete.

¹⁴Le ba'ax cu pa'ic Junab Kue, mix máac cu páajtal u yutzquintic; le máax cu ka'alal tumen Kue', mix máac cu páajtal u jáalkabtic.

¹⁵Wa cu kalic u beel u káaxal ja'e', tuláacal cu tijil; wa cu beetic u káaxale' cu láaj bulic cu bulic le lu'umo'.

¹⁶U páajtalil leti' beetic u béeytal mantadz. tu kab yaan le máax cu tu'usulo' bey le máax cu tuso'.

¹⁷Leti' beetic u p'áatal mix ba'al yoojel le máaco'ob jach canbalnaja'ano'obo' cu beetic xan u sa'atal u yóolo'ob le j u'uyaj tacpoolo'obo'.

¹⁸Cu lukesic u méektáanil ajawo'obo', cu beetic u ma'achalo'ob cuxa'ano'ob ich ba'atel u ti'al u bisa'alo'ob chacnulo'ob.

¹⁹Cu tzelic le aj kiino'ob tu cúuchil u meyajo'obo', cu pa'ic u muuk le máaxo'ob yaan u páajtalilo'obo'.

²⁰Cu maquic u chi' le aj tzol xiquino'obo', cu lukesic u na'anat tuucul u nucuch wíiniquilo'ob le caajo'.

²¹cu beetic u p'áatal x ma' tziiquil le dzuulo'obo', cu beetic u p'áatal x ma' muukil le mu'uka'ano'obo'.

²²Cu dzáic ojéeltbil ba'axo'ob asab ta'acbesa'ano'ob, cu beetic u sáasiltal tac ba'axo'ob asab éekjoch'e'entaco'ob.

²³Leti'e' cu nuucquintic le caajo'obo' cu xu'ulsico'ob xan, cu ki'itbesico'ob cu much'quintico'ob xan tu ca'a téen

²⁴Cu beetic u p'áatal j ma' ojéelajilo'ob u nuuquilo'ob jun p'éel múuch' caaj u ti'al u sa'atalo'ob ti' jun p'éel x tocoy lu'um x ma' bejil,

²⁵tu'ux cu máano'ob t'at'alkabil tu yo'olal éekjoch'e'en, bey calano'ob cu tacchalanquilo'obe'.