Read Yucateco Job 14 Bible Online

Job 14 - Yucateco bible

Job 14

¹Le j xiib sijnal ti' co'olele', jach cóom u cuxtal chuup xan tu yéetel mukyajilo'ob.

²Bey je'el bix le lool cu séeb tijil chéen p'el u xíitile'; cu máan cu dzo'ocole' cu sa'atal bey bo'oye'.

³¿Cu dzo'ocol a pactic jun túul j xiibe' ca t'anic u ti'al u cáant u si'ipil ta táan?

⁴Mix máac je'el u páajtal u jóokesic ba'ax utz ichil ba'ax ma' utz yanile'.

⁵Wa teech a'alic jay p'éel kiin bíin cuxlac jun túul wíinique', ca dzáic xan u xuul u kiinilo'obe',

⁶tzel a wich tu tojil, ma' a chi'ichnaccunsic; ¡cha'a u qui' jaantic u tojol u náajal bey jun túul j meyaj beete'!

⁷Le quéen ch'a'acac jun cúul che'e', cu pa'atal cu dzáa ku'uk ma'atech u p'áatal x ma' ku'ukil.

⁸Quex dzo'oc u la'abal u mootze' u chuunche'il táan u kastal j lu'ume',

⁹le quéen ch'áajac u síisil le ja'o', bíin tóop'oc u ya'axil; bíin ca'a búucpajac bey táanquelem che'e'.

¹⁰Ba'ale', le j xiibo', ma' bíin u jech le quíimilo'; cu dzo'ocole', ¿le quéen quíimique' tu'ux bíin xi'ic?

¹¹Je'el u sa'ap'al u ja'il le ka'anabo', je'el u tijil u ja'il le áalcab ja'obo';

¹²Ba'ale', ca'aliquil dzaca'an le ca'ano', le wíinico', ma' bíin líikic tu mucnali', ma' bíin u p'il u yich ti' u weneli.

¹³¡Quexi' wa ca páatchajac in ta'acbesiquinbáa tu dzu' le lu'um ca'aliquil in p'áatic u ch'éenel a p'uja'anilo', bíin a wa'al ba'ax kiin in ka'ajal ti' teech!

¹⁴¿Bíin ca'a cuxlac wa le j xiib cu quíimilo'? Je'el in p'áatic loobal tuláacal u kiinilo'ob in cuxtale' tac quéen kuchuc u kiinil in wutztal yéetel u máan in yaj óolalo'ob.

¹⁵Teche' bíin a t'anen, teen xane' bíin in núuc a t'aan; bíin wal a pacten yéetel yaacunaje', tumen teech beetmajilen.

¹⁶Wa ca ch'úuctic bejela'a' in xíimbal, ma' bíin a sen pact in kebano'obi'

¹⁷Je'el a láaj tu'ubesic in si'ipilo'obe', je'el xan a láaj p'o'iquen ti' in kebano'obe'.

¹⁸Tac le witzo'obo', cu jéenelo'ob, le nucuch tuunicho'obo', cu kexpajal u cúuchilo'ob.

¹⁹Je'el bix u xu'upsa'al le tuunich tumen le ja'o', je'el bix u bisa'al xan le lu'um tumen le ja' cu káaxalo', bey u bin a xu'ulsic u alab óolal le j xiibo'.

²⁰Ca pa'ic u muuk jun puli', ca luksic xan tu yóokol lu'um, leti'e' cu bin jelpajal u yich.

²¹U paalale' cu ayikaltalo'ob, leti'e' ma' tu yojéeltic; wa cu lúubulo'ob ich óotzile', ma' tu yojéeltic;

²²leti'e' chéen cu mukyajtic u ki'inamilo'ob u wíinclil, u mukyajilo'ob u cuxtal.