Read Yucateco Job 16 Bible Online

Job 16 - Yucateco bible

Job 16

¹Jobe' tu núucaj: Lelo' dzo'oc a sen babal a'alique'ex ti' teen. Te'exe' ma' j taale'ex a qui'imaccunte'ex in wóoli', j taale'ex a asab beete'ex in mukyaj.

³¿Mina'an wa u xu'ulul ti' le t'aano'ob mix ba'al u biilalo'oba'? ¿tu'ux u taal u suuquil a káakat núuctique'ex in t'aan?

⁴Wa te'ex mukyajtic le ba'ax quin mukyajtica', bejela'a' xan quin t'aan je'el bix a t'ane'exa'; je'el in yúuntic in pool u ti'al in p'a'astique'exe', je'el xan in wa'alic te'ex ya'abcach t'aano'obe',

⁵Je'el in muumun t'anique'ex u ti'al in beetic u yáantal a wóole'ex yéetel u ti'al ca yanac a muuke'exe'.

⁶Ba'ale' quex wa ca t'aanaquene' ma' tu jáawal in ki'inamili', mix táan in wutztal wa ca in mac in chi'.

⁷Kue', dzo'oc u xupic in muuk, dzo'oc u toquic ti' teen in wéet bisajba'ob

⁸dzo'oc u dzáiquen ich x kalab naj. Ya'ab t'aano'ob u tucquintmaj tin wóokol; yaan tac poolo'ob beetmaj tin wo'olal ma' jaajtaqui'.

⁹Yuumtzile', cu ch'a'apachtiquen cu tzi'ictiquen xan, cu sajbesiquen bey jun túul dzíidzic ba'alche'e', cu ch'iquic u paacat tin wóokol óoli' bey jun túul in aj p'eeque'.

¹⁰Cu much'tal p'enquech máaco'ob u ti'al u p'a'asteno'ob, cu mama' lajiqueno'ob u ti'al u pajico'ob in subtal.

¹¹Kue' dzo'oc u kubiquen tu kab j loolob máaco'ob, j quíimsaj wíinico'ob.

¹²Tene' jéedzel ca'ach in wanil, ca tu cháach machajen tin caal; tu p'uchajen, ca tu xe'exe'et'ajen. tu ch'inaj tin tojil u x julubo'ob.

¹³Ti' tuláacal in bakpach cu chi'inch'inquen; ma' tu ch'a'ic óotzilil u póopot lomic in wíinclil, cu ki'itbesic in jobnel j lu'um.

¹⁴Cu sen kilbesic in wíinclil, cu pulicubáa tin wóokol bey jun túul aj ba'atele'.

¹⁵Sen okom in wóol, tin búuquintaj to'och nooko'ob, tin jupaj in pool ich lu'um.

¹⁶Dzo'oc u chu'uplajal in wicho'ob iquil in wokol; budzucnac in paacat bejela'e'

¹⁷quex tumen mix jun téen in beetmaj loob ti' mix máac, quex tumen mina'an ba'ax kascuntic in payalchi'.

¹⁸Le loob cu beeta'al ti' tena', cu tzáic ca beeta'ac ba'al tu beel tin wo'olal ¡lu'um, ma' a muquic in káat óol!

¹⁹Tumen te j ca'ano', yaan u yáantal máax dzáiquen utzil,

²⁰ca u ya'al tu beel ba'axo'ob quin tuuculo'ob tu táan Ku, u ti'al ca u yil u yáalcab u ja'il in wich;

²¹jun túul máax ca t'aanac u ti'al u dzáiquen utzil tu táan Ku, je'el bix u dza'abal utzil jun túul máac tu táan u láak máaque'.

²²Le dze'edzec ja'abo'ob p'áatalo'ob ti' in cuxtala', táan u bin u sa'atalo'ob, séeba'an bíin xi'iquen te j cúuchil tu'ux ma' bíin ca'a suunaqueno'.