Read Yucateco Job 18 Bible Online

Job 18 - Yucateco bible

Job 18

¹Bildad suhitae', tu núucaj: ¿Ba'ax kiin u ch'éenel u t'aan le máaca'? Wa tu beel ba'ax cu ya'alique', je'el u páajtal c t'aane'.

³¿Ba'axten cu t'anico'on beyo'on ba'alche'e' yéetel cu ya'alic j ma' na'ato'on?

⁴¿Táan wa a tucultic je'el u tocoychajal u lu'um, bíin kexpajac xan le nucuch tuunicho'ob tu yo'olal a dzíidzic t'aane'?

⁵Le j loolob máaco', bíin tu'upuc u sáasil, ma' bíin tóoch'banac u kaak tu ca'a te'eni'.

⁶Bíin tu'upuc u sáas; ma' bíin ca'a jóopbalnac tu yotochi'.

⁷Bíin lúubuc u muuk u píixo'ob, bíin lúubuc ti' le léech u dzaamajo'.

⁸Bíin dza'abac u káanil caybal tu beel, ti' le u káanil caybalo' ti' bíin léechpajaqui'.

⁹Bíin léechpajac u yooc, tu caal yooc bíin káaxac u mooquil.

¹⁰Le léecho', ti' bíin ta'acbesa'ac te j bej tu'ux bíin máanaco'.

¹¹Tuláacal tu'ux bíin sajbesa'ac; cu tucultic mantadz táan u ch'a'apachta'al.

¹²Cu lúubul u muuk tu yo'olal le wi'ijo'; le loobo' chéen ta'itac u lúubul tu yóokol.

¹³Le quíimilo' utz u bisicubáa yéetel le koja'anilo', leti' xupic u wíinclil jujun p'íitil

¹⁴Cu jóokesa'al ti' u jéedzelil u yotoch, cu jíilta'al u ti'al j bisa'al tu táan u ajawilil sajaquil.

¹⁵Cu tóoca'al u yotoch; cu to'osol asufre tu yóokol u ba'aluba'ob.

¹⁶Bey jun cúul che', tiquin u mootzo'ob yéetel chuchul u kabo'obe'.

¹⁷Bíin tu'ubsa'ac way j lu'ume' ma' bíin ka'ajsa'ac u kaaba' tu ca'a téeni'.

¹⁸Bíin lukesa'ac ichil sáasil u ti'al ca pu'uluc ich éekjoche'enil; bíin tojolch'inta'ac ti' le yóokolcaaba'

¹⁹Ma' bíin yanac u ch'i'ibal tu caajali'; mix jun túul ti' u yotochnáalo'ob bíin p'áatac cuxa'an.

²⁰Le quéen ojéelta'ac tumen le j lakinilo'ob yéetel le j chikinilo'ob ba'ax úuch ti'o', bíin ja'akac u yóolo'ob yéetel nojoch sajaquil.

²¹Bey u xu'ulul u cuxtal le j loolob máaco', le máax kex óoltic Kuo'.