Read Yucateco Job 2 Bible Online

Job 2 - Yucateco bible

Job 2

¹Le ca j kuch u kiinil u bino'ob tu táan Yuumtzil le u aj meeyjulo'ob ca'ane', j ooc tu yéetelo'ob u ángelil tacpool.

²Yuumtzile' tu káat chi'itaj ti': ¿Tu'ux a taal? Le aj tacpoolo' tu núucaj: Dzo'oc in máan in láaj xíimbalt yóokol lu'umo'.

³Yuumtzil túune' tu káat chi'itaj ti': ¿Ta qui'iqui' ilaj wa Job in palitzil? Mina'an u láak máac je'el bix leti'e', ca u meyajten yéetel chuca'an óolal, toj u cuxtal yéetel x ma' si'ipilil, cu cananticubáa ma' u beetic kaas ti' mix máac. Quex tumen ta beetaj in wóotzilcuuntic quex tumen mina'an u si'ipile', leti'e' chuca'an u yóol u ti'al u toj cuxtal.

⁴Ba'ale', le aj tacpoolo', tu núucaj ti' Yuumtzil: Ca'aliquil ma' tu xe'ep'a'al u yoot'el jun túul wíinique', tuláacal utz u ti'al. Wíinique', je'el u kubic tuláacal ba'ax u ti'al, tu yo'olal ma' u quíimsa'al.

⁵Ba'ale', beet wa ba'ax ti' u cuxtal ca wila'a wa ma' tu kaakas t'antiquech tu táan a wich.

⁶Yuumtzile', tu núucaj ti' le aj tacpoolo': Ma'alob, beet je'el ba'axac a káat tu yéetele', chéen ba'ale' bic a beet ba'al ti' u cuxtal.

⁷Le aj tacpoolo', j luk tu táan Yuumtzile', ca tu beetaj u búucbesa'al u wíinclil Job yéetel jun p'éel yaayaj koja'anil.

⁸Job túune' j bin cutal tu'ux cu muulquinta'al u ta' míise', ca tu ch'a'a' jun xéet' cum u ti'al u la'achticubáa.

⁹Ba'ale', j a'ala'ab ti' tumen u yatan: ¿Láili' ch'iquilech a beet ba'al wutze'? ¡Kaakast'ant Kue', ca quíimiquech!

¹⁰Jobe' tu núucaj ti': ¡Co'olel, ma' wa'alic ba'al ma' tu beeli'! Wa c éejemtic le uztilo'ob cu túuxtic to'on Kuo', ¿ba'ax o'olal ma' bíin c éejemt le kaaso'obo'? Bey túuno' Jobe', quex bey úuchic ti'o', ma' j kebanchaj mix ti' u t'aani'.

¹¹Ba'ale' Jobe' yaan ca'ach óox túul u yéet bisajbáilo'ob: Elifaz j temanitail, Bildad j suhitail, yéetel Zofar j namatitail. Le ca tu yojéeltajo'ob le loobo'ob dzo'oc u yúuchul ti' Jobo', tu tucultajo'ob kabéet u bino'ob u dza'ob u yóol, yéetel u láakinto'ob ichil u yaj óol.

¹²Le ca tu líikesajo'ob u yicho'ob ca'aliquil náach yano'obe', óoli' ma' páatchaj u kaj óoltico'obi', ca jo'op' u yawat okolo'ob, Yajchaj tu yóolo'ob, ca tu jatajo'ob u nooko'ob yéetel tu tóos lu'umtajo'ob u poolo'ob.

¹³Cu dzo'ocole', j culajo'ob tu yicnal, siete kiino'ob yéetel siete áakabo'ob ti' j yanchajo'ob tu tzéel x ma' t'aanil, tumen tu yilajo'ob sen nojoch u ki'inamil.