Read Yucateco Job 20 Bible Online

Job 20 - Yucateco bible

Job 20

¹Zofar naamatitae', tu núucaj: Teche' ca beetic in chi'ichnactal ca beetic xan u náacal in wóol; let o'olal in káat in núuc ba'ax ca wa'alic.

³A taquic in poole' cu poch'iquen, ba'ale' tene' in wojel bix bíin in núuc a t'aan.

⁴Teche' a wojel ba'ax cu yúuchul ti' le wíinic líikbal le ti' u kiinil beeta'abic way j lu'ume':

⁵u qui'imac óolal le j loolob máaco'; séeb u xu'ulul; u qui'imac óolale' chéen u ti'al jun su'utuc.

⁶Quex ca kuchuc u nonojbáil tac ca'ane' ca kuchuc u pool tac ichil múuyale',

⁷bíin xu'uluc bey u ta'e', ma' bíin ojéelta'ac tumen u yéet bisajba'ob tu'ux dzo'oqui.

⁸Bíin samkajac bey wayake', bey jun p'éel náay cu yila'al yéetel áakabe' mix máac bíin páatac u nuptáantic,

⁹Ma' bíin ca ila'ac tumen máaxo'ob ilmaili'.

¹⁰Le ba'ax u yocoltmaj ca'ach ti' le óotzilo'obo', bíin su'utuc ti'ob tumen u paalalo'ob.

¹¹Jach tu táanquelemil bíin xi'ic tu mucnal.

¹²Sen utz tu t'aan u beetic ba'ax kaas, bey qui'iqui' janal u ti'ale';

¹³bey jun p'éel qui'iqui' janal cu jaanta'al jujun p'íitil u ti'al u yu'ubic u qui'ile'.

¹⁴Ba'ale' le quéen kuchuc tu tzuuquele', cu suut bey u ki'inam u chi'ibal caane'.

¹⁵Cu xéic le ayikalilo'ob tu much'quintaj ca'ache', tumen Ku toquic ti'.

¹⁶Tumen táan ca'ach u chu'uchic u kaab u chi' caan, let o'olal bíin quíimsa'ac tumen.

¹⁷Ma' bíin xaanac u yu'ubic u qui'il u kaab yiim le x wacaxo'ob yéetel le caab cu yáalcab bey ja'e'.

¹⁸Tuláacal ba'ax tu náajaltaje', yaan u láaj sutic; ma' bíin páatac u qui'imaccuntic u yóol yéetel u ayikalilo'obi'.

¹⁹Le ca tu xupaj u muuk le óotzilo'obo' tu xúunp'attajo'ob; tu ch'a'a' u ti'alinte le najo'ob ma' leti' j beetmaile'.

²⁰Ma'atech u na'ajtal tu yo'olal u poochil, mix tu p'áatal ma' u ti'altic ba'ax cu poochiltic;

²¹Mix ba'al jechic u poochil. Let o'olal ma' bíin xáanchajac u qui'imac óolali'.

²²Je'el bix bíin ya'abac u ayikalile', bey bíin xu'uluc u qui'imac óolalil; bíin u pulubáa loolob máaco'ob tu yóokol.

²³Le quéen u yóolt u na'ajcuntubáe', bíin ja'adzac tumen Ku: bíin u jedz u pu'ja'anil tu yóokol.

²⁴Wa bíin u jech jun p'éel u nu'ucul ba'atel fierro u ca'aje', bíin chu'ucuc tumen jun p'éel x p'unche' bronce u ca'aj.

²⁵Bíin póot lomta'ac u wíinclil tumen le x julubo', u ni' le julubo' bíin u lom u táamnel. Leti' bíin u beet u ch'a'ic sajaquil;

²⁶bíin láaj to'oboc tumen éekjoche'enil. jun p'éel káak ma' kabéet u picta'al u ti'al ca tóoch'banac bíin tóoquic pa'ate' yéetel u yotoch.

²⁷Bíin e'esa'ac u keban tumen le ca'ano', bíin ta'acac u pool tumen le lu'umo'.

²⁸Le quéen bu'uluc tumen u p'uja'anil Junab Kue', bíin sa'atac tuláacal u ayikalilo'ob.

²⁹Bey u ya'almajil Ku ca úuchuc ti' le loolob máaco'; bey nu'ucbesa'anil u beel tumen leti'o'.