Read Yucateco Job 24 Bible Online

Job 24 - Yucateco bible

Job 24

¹¿Le sen Aj Páajtalilo', ba'axten ma' tu ya'alic ba'ax kiin quéen meyajnac u ti'al ca ila'ac tumen u yéet aj bisajbáil?

²Le j loolob máaco'obo' cu kexico'ob u xu'ukilo'ob le káaxo'obo', cu yocoltico'ob j tamano'ob u ti'al u ya'abcuntico'ob u j yaalako'ob,

³cu toquico'ob u yalak ba'alche'ob le j ma' taataob bey ti' le x quimen íichamo'obo'.

⁴Cu yáalcabansico'ob ti' le bej le óotzilo'obo', cu dzo'ocole' le j cabal óolo'obo' yaan u ta'acbesicuba'ob.

⁵Le óotzilo'obo', cu jóokolo'ob bey u burroilo'ob x tocoy lu'um, istiquiaj u caxantico'ob u jaanto'ob, te x tocoy lu'umo' ti' cu caxantico'ob ba'al u jaant u paalali'

⁶Cu bino'ob j joch tu coolo'ob yaanal máaco'ob wa cu bino'ob j meendzul tu coolo'ob j loolob máaco'ob.

⁷Cu máansico'ob áakab x ma' teep'il, mina'an mix ba'al u pixicuba'ob ti' que'el

⁸Cu sulbancunta'alo'ob tumen u cháaquilo'ob le witzo'obo', cu takicuba'ob ti' tuunicho'ob u ti'al u ta'acbesicuba'ob.

⁹Cu toquico'ob ti' le x quimen íichamo'ob u paalo'ob táant u síijilo'obe', cu tzáico'ob u chíiculal p'aax ti' le óotzilo'obo'.

¹⁰Le óotzilo'obo', o'oli' chacnul u máano'ob, táan u quíimilo'ob yéetel wi'ij quex tumen u cuchmajo'ob trigo.

¹¹Cu juuch'o'ob u ti'al u jóokesico'ob aceite; cu yedzico'ob uvaob u ti'al u t'ial u beetico'ob vino, ba'ale' táan u quíimilo'ob yéetel ukaj.

¹²Náach yanilo'ob ti' caaj le máaxo'ob táan u quíimilo'obo', táan u yóokolo'ob táan u yáacamo'obo', ba'ale' Kue' ma' tu yu'ubic u payalchi'ob.

¹³Yaan wa jay túulo'obe' u p'ectmajo'ob le sáasilo', ma' tu yóoltico'ob ca sáasilcunta'ac u beelo'ob.

¹⁴Le quíimsaj wíinico', áakab u líikil u ti'al u bin u quíims le óotzilo', le quéen áakabchajaque' cu suticubáa j oocolil.

¹⁵Le aj nupkebano', cu p'áatic u yéekjoch'e'ental, cu ma'alob pixic u yich ca'aliquil táan u tucultic: Beya' mix máac bíin iliquen.

¹⁶Le j oocolo' cu pa'atic yáakabtal u ti'al u dzoticubáa ichil le najo'obo'. Yéetel kiine' cu láaj kalicuba'ob; u p'eeco'ob u sáasil kiin.

¹⁷U sáasilil le kiino', éekjoch'e'enil u ti'alo'ob; ba'ax utz tu yóolo'obe' u sajbe'entzililo'ob le áakabo'.

¹⁸[2]Le j loolob wíinico' cu jíilta'al tumen ja'. U lu'umo'obe' loolob t'anta'ano'ob, mix máac bíin ca'a meyaj ichil u pakal uvaob.

¹⁹U yooxow le yáax kiino', cu yibic le bato', le aj kebano' ich mucnal cu samkajal.

²⁰Bíin tu'ubsa'ac tac tumen u maama; bíin xu'upsa'ac tumen x nookolo'ob, mix máac bíin ca'a ka'ajsic u kaaba'. Le loolob wíinico', bíin lúubuc bey ch'acbil che'e'.

²¹Le co'olelo'ob x ma' paalo'obe', bey x quimen íichamo'obo', loolob máacchaj ti'ob ma' xan tu dzaj áantaj ti'obi'.

²²Ba'ale' Kue', bíin u lúubes yéetel u muuk le aj páajtalilo'obo'; le quéen u beet wa ba'axe', mix máac bíin páatac u cuxtal.

²³Kue' cu cha'ic u cuxtalo'ob ich jéedzel, ba'ale' cu ch'úuctic u xíimbalo'ob.

²⁴Le loolob wíinico' cu téec líikil, ba'ale' séeb u quíimil. Cu tijil bey jocbil xíiwe', cu p'úunul bey yi'ij nale'.

²⁵Wa ma' bey le ba'ala', ¿máax je'el u páajtal u ye'esic ti' teen ma' jaaje' yéetel u ya'al ti' teen in tusminbáa?