Read Yucateco Job 27 Bible Online

Job 27 - Yucateco bible

Job 27

¹Jobe' jalach t'aanaj tu kaaba' le sen Aj Páajtalilo': ¡Leti' máax ma' tu yóoltic u beet ba'ax tu beel ti' teen, cu chupiquen xan yéetel yaayaj óolal,

³ca'aliquil cu dzáic ti' teen muuk u ti'al in múus iike',

⁴mix bikin bíin in ya'al tuuso'ob, mix bikin bíin in ya'al ba'alo'ob ma' jaajtaco'obi'!

⁵Ca'aliquil xi'ic u bin in cuxtale', bíin in babal a'al mina'an in si'ipil; ¡ma' bíin in éejemt a taquique'ex in pooli'!

⁶Ma' bíin jáawac in wa'alic utz in cuxtali', tumen mina'an mix ba'al yaan tin tuucul u ti'al u keyiquen.

⁷¡Tuláacal le máax cu ya'alic u aj p'eequene', bíin úuchuc ti' je'el bix u yúuchul ti' le j loolob máaco'!

⁸¿Ba'ax alab óolil yaan ti' le j ma' ocsaj óol le quéen xo'otoc u cuxtal tumen Kuo'?

⁹Le quéen u yilubáa ichil yaamyamilo'obe', ma' bíin táan óolta'ac u payalchi' tumen Kui'.

¹⁰Tumen leti'e' ma' tu qui'imaccuntic u yóol ti' le sen Aj páajtalilo', mix jun súutuc cu payalchi' ti'.

¹¹Bíin in ca'aj in we'es ti' te'ex u nojoch páajtalil Junab Ku, le ba'axo'ob cu tucultic u beetic le sen Aj Páajtalilo'.

¹²Wa tuláacale'ex dzo'oc a wilique'exe', ¿ba'axten ca wa'alique'ex ba'alo'ob talam tuuso'ob?

¹³[4]Lela' leti' le jaadz bíin u dzáa Ku le sen Aj Páajtalil ti' le sen j loolob máaco'obo':

¹⁴quex ya'ab u paalalo'obe', bíin quíimic ich ba'atel wa yéetel wi'ij.

¹⁵Le máaxo'ob bíin u jecho'ob le quíimilo', bíin quíimsaco'ob tumen báan quíimil, mix bíin okta'aco'ob tumen u yatano'obi'.

¹⁶Le j loolob máaco', quex ca u sen much'quint plata je'el bix le lu'umo', quex xan ca u sen ya'abcunt u nooko'obe',

¹⁷le nooko'obo', bíin búuquinta'ac tumen jun túul utzul máac, bíin yanac xan jun túul utzul máac u qui'imaccunt u yóol yéetel le platao'.

¹⁸U yotoch le j loolob máaco', p'uykalac, séeb u jóobol bey u ku' ch'i'iche', bey u pasel máac cu canantic coole'.

¹⁹Ayikal le quéen chilac j wenele', le quéen ajaque' mix ba'al yaan ti'.

²⁰Bíin ococ sajaquil ti', yéetel kiin, bíin bisa'ac tumen u yiikal áakab.

²¹U chac ikalil j lakin bíin jáanpaytic ichil u yotoch;

²²Ma' bíin ch'a'abac óotzilil ti' tumen le chac ikalo' quex ca u yaamyamt u jeche

²³Bíin ch'a'apachta'ac tumen u xóob le iiko'.