Read Yucateco Job 28 Bible Online

Job 28 - Yucateco bible

Job 28

¹Yaan u áactunilo'ob tu'ux cu jóokesa'al plata yaan xan u cúuchilo'ob tu'ux cu jo'oyol oro.

²Le fierroo' tu dzu'u' lu'um cu jóokesa'al, le quéen yíibic le tuunicho'obo' cu suut cobreil.

³Wíinique' cu suuctal u paacat ich éekjoch'e'enil: cu yéemel tu taamil le cúuchilo'obo', cu caxantic tuunicho'ob ichil le éekjoch'e'enilo'.

⁴Cu yúumbal ch'uyucbal ti' jun p'éel suume' cu jolic taamtam cúuchilo'ob tu yáanal lu'um tu'ux ma' tu kuchul mix máac, náach ti' le caajo'ob.

⁵Le lu'um cu dzic trigo tu yóokol, tu dzu'e', táan u looc yéetel káak.

⁶Ti' yaan ya'abcach zafiro'obi', ti' yaan xan oro xa'akpaja'an yéetel lu'umi'.

⁷Te'elo' ma' tu páajtal u kuchul le j ch'oomo', mix le j ch'úuyo'obo' ma' u yilmajo'ob u beelo'obi'.

⁸Ma' tu máan dzíidzic ba'alche'obi', mix tu kuchul leóno'obi'.

⁹Wíinique' cu meyajtic tac le tok tuunicho', cu pa'ic tac le witzo'ob líikbal tu chuuno'ob.

¹⁰Cu je'ic bejo'ob tu yaanal witzo'ob cu caxtic u jejeláasil co'ocoj ba'alo'ob.

¹¹Cu xakal caxtic u sayabilo'ob le áalcab ja'obo' cu jóokesic tu yóok cabil tuláacal u jejeláasil ba'alo'ob ta'acbeschajano'obi'.

¹²¿Ba'ale', tu'ux u taal le kaj óolalilo'? ¿Tu'ux u taal le ojéelajilo'?

¹³Wíinique' ma' u yojel buca'aj u kabéetili', ma' xan tu nuptáantic way yóokolcaabe'.

¹⁴Le nojoch ka'anabo' cu ya'alic: Waye' mina'an le ka'anabo' cu núuquic Ma' ti' teen yani'

¹⁵Ma' tu páajtal u ma'anal yéetel oro mix tu páajtal u ma'anal yéetel plata.

¹⁶Ma' tu páajtal u bo'ota'al tu yéetel u asab qui'ichquelmil oro, mix tu yéetel cornalinaob wa tu yéetel zafiro.

¹⁷Asab co'oj ti' oro yéetel ti' qui'ichquelem néen; ma' tu páajtal u ke'exel tu yéetel ba'alo'ob beeta'ano'ob tu yéetel chéen oro.

¹⁸Le ojéelalilo' asab qui'ichquelem ti' coral, yéetel ti' qui'ichquelem néen, yéetel ti' perlaob.

¹⁹Ma' tu páajtal u que'etel yéetel u crisólitoil Eti'opía, ma' tu páajtal u bo'ota'al yéetel u asab ma'alobil oro.

²⁰¿Tu'ux túun u taal le kaj óolalo'? ¿Ti' ba'ax cúuchilil yaan le ojéelajilo'?

²¹Bala'an tu yich le j dzíidzic ba'alche'obo', ma' chica'an u yila'al tumen le ch'íich'o'obo'.

²²Tac le quíimil yéetel u cúuchilo', cu ya'alico'ob: C ojele', chéen tumen c u'uymaj u ya'ala'al.

²³Ba'ale' Junab Kue' u yojel tu'ux u taal le kaj óolalilo'; chéen leti' u yojel tu'ux cu páajtal u caxta'al,

²⁴tumen leti'e' sáasil u pactic tac tu naklil yóokolcaab bey tuláacal ba'ax yaan tu yáanal ca'an.

²⁵Le ca tu tucultaj Ku u dzáic u muuk le iiko' tu dzaj xan tu'ux bíin náacac le ja'o',

²⁶le ca tu ya'alaj bix bíin káaxac le ja'o', tu ya'alaj xan tu'ux bíin xi'ic le ka'amcach iiko',

²⁷Tu yilaj xan le kaj óolalo', tu yilaj buca'aj u ka'abéetil, tu xakal ilaje' ca tu ya'alaj sen ma'alo'.

²⁸Ca tu ya'alaj Ku ti' le wíinico'obo': U meyajta'al Yuumtzil tu yéetel chuca'an o'olale': lelo' leti' le kaj óolalo'; u náachtal wíinic ti' le kaaso': leti' le ojéelajilo'.