Read Yucateco Job 3 Bible Online

Job 3 - Yucateco bible

Job 3

¹Le ca j t'aanaj Jobe', tu loolob t'antaj u kiinil síijic, ca tu ya'alaj:

³¡Loolob t'anta'ac u yáakabil úuchic in táakal! ¡Loolob t'anta'ac le áakab ca j a'ala'ab: dzo'oc u síijil jun túul chan j xi'ipal!

⁴¡Quexi' ca suunac ca'ach áakabil le kiinaco', Kue' dzo'oc ca'ach u beetic u p'áatal áakabile', ti'al ma' u sáastale'!

⁵¡Quexi' ca éekjoche'encunsa'ac ca'ach tumen jun p'éel nojoch bo'oye', wa quexi' ca ba'alac ca'ach tumen jun p'éel tatat múuyale', wa quex ca sajbe'encuusa'ac ca'ach tumen jun p'éel chi'ibal kiine'!

⁶¡Quexi' ca sa'atac ca'ach le áakab ichil le éekjoche'enilo', u ti'al ma' u xo'ocol ca'ach le kiino' ichil u chuucáan u kiinilo'ob u winalilo'ob le ja'abo'obo'!

⁷¡Dzo'oc u suut ca'ach jun p'éel áakab mix ba'al u biilale', u ti'al ma' u yáantal ca'ach u yawatilo'ob qui'imac óolal!

⁸¡Quexi' ca loolob t'anta'ac ca'ach tumen le j pulya'ajo'ob, le yaan u páajtalilo'ob tu yóokol le leviatano'![1]

⁹¡Quexi' ma' u juulo'ob ca'ach le eeko'ob, ti' le ja'atzcab kiino', mix u kuchul ca'ach le sáasil cu yaayanta'al ca kuchuco', mix u yila'al ca'ach u taal u sáastal!

¹⁰¡Loolob t'anta'ac le áakab tu cha'aj in síijilo', dzo'oc ca'ach u wet'ic teen le yajyaj óotzilila'!

¹¹¿Ba'ax ten ma' j quimen tu jobnel in maamai', wa quex jach táant in síijile'?

¹²¿Ba'axten j yanchaj píixo'ob u ti'al kamiquen, yanchaj xan iimo'ob u ti'al dzáic in chu'uch?

¹³wa ca quíimiquen ca'ache', bejela'a' táan ca'ach in qui' wenel jedzecnaque', bejela'a' táan ca'ach in qui' je'elel,

¹⁴yéetel le ajawo'ob pa'ate' yéetel u nuuquil u aj meyajo'ob cu beetico'ob u nucuch najilo'ob u mu'uculo'ob,

¹⁵wa yéetel le j méektáano'ob u chupmajo'ob u jalach najo'ob yéetel oro bey xan yéetel plata.

¹⁶¿Ba'axten ma' j mu'uquen je'el bix u mu'ucul le j éem síijil paalo'ob, je'el bix u mu'ucul le paalal cu quíimilo'ob ma'ili' u síijilo'ob?

¹⁷Te j mucnal cu xu'ulul u lik óolal le loolob máaco'obo', ti' xan cu je'elelo'ob le máaxo'ob ca'anano'obo';

¹⁸ti' cu chuquico'ob jéedzel le máaxo'ob kala'ano'obo', yéetel cu ch'eenel u yu'ubico'ob u yawat t'aan le j mayolo';

¹⁹jun tacáal yanilo'ob te'elo', le nojoch yéetel le chichano', le palitzilo', j p'áat jáalkabil ti' u dzuulil.

²⁰¿Ba'axten cu cha'ic Ku u yilic sáasil le máax cu mukyajo'? ¿Ba'axten cu dzáic cuxtal ti' le máac chuup yéetel yaayaj tuuculo',

²¹le máax yaayantic le quíimil ba'ale' ma' tu kuchul tu yicnal, quex ca u nuptáant je'el bix u caxta'al taakine'?

²²U qui'imac óolal le máaco' cu kuchul le éemec j mucnal.

²³Cu beeta'al u xíimbal mina'an u sáasilil u yich tumen Ku, cu ka'alal u beel tuláacal tu'ux.

²⁴In wokole', leti' in janal; u yáacamil in mukyaje', leti' in wukul,

²⁵Tumen tuláacal le ba'ax ti' sajaquen ca'ache' yéetel tuláacal ba'ax sajaccuntiquene', leti' j lúub tin wóokol.

²⁶Mina'an ti' teen je'elel mix toj óolal; mina'an ti' teen jéedzel, tumen chéen yaamyamilil yaan ti' teen.