Read Yucateco Job 30 Bible Online

Job 30 - Yucateco bible

Job 30

¹Ba'ale' bejela'e' le táaquelemo'obo' cu che'ejtiqueno'ob le asab paalo'ob ti' teen, u taataobe' ma' tin in dza'ob j meyaj yéetel le peeko'ob cu canantico'ob ca'ach in waalako'ob.

²¿Ba'ax biilal ca'ach ti' teen u muuk kabo'ob? Leti'obe', xuupul ca'ach u muuko'ob

³tu yo'olal wi'ijil yéetel nakan óotzilil. Yéetel áakabe', te x tocoy lu'um tu'ux mix máac caja'ane', yaan ca'ach u jaantico'ob u mootz tiquin che'ob;

⁴cu joquico'ob ca'ach káakaj xíiwo'ob te j cabal káaxo', tac u mootz xa'an cu jaantico'ob ca'achi.

⁵Leti'obe' óolta'ano'ob tumen le caajo', cu ch'a'apachtalo'ob yéetel awato'ob je'el bix u ch'a'apachta'al le j oocolo'obo';

⁶yaan ca'ach u cajtalo'ob ich áactuno'ob, ti' le ko'opo'ob yéetel tu cáap tuunicho'ob;

⁷ti' cu yawat okolo'ob ca'ach ich ki'ixo'obe', mulucbalo'ob tu yáanal cabal káax.

⁸Máaco'ob mix ba'al u biilalo'ob, j ma' taataob, ma' tu najmatico'ob u cajtalo'ob ti' caajo'ob.

⁹Ba'ale', bejela'e' cu p'a'astiqueno'ob cu ya'alico'ob ba'al u ti'al ca che'ejta'aquen.

¹⁰Tu yo'olal u ch'a'a p'ectmajeno'obe', cu náachtalo'ob ti' teen, tac in wich cu túubico'ob.

¹¹Bejela'e', mix ba'al yaan ti' teen yéetel caabal in wóole', mix ba'al u yiliqueno'ob.

¹²Cu much'talo'ob tin wicnale', cu puliqueno'ob j lu'um, cu pulicuba'ob tin wóokol, tu yóoltajo'ob u quíimseno'ob.

¹³Cu kalico'ob in beel u ti'al u quíimsiqueno'ob, mina'an mix máac kalic u beelo'ob.

¹⁴Je'el bix u chokicubáa le aj ba'atelo'ob tu joolil u pakil le tuulumo', bey u pulicuba'ob tin wóokol tu jaajil u yóolo'ob.

¹⁵Sajbe'entzil j ooc teen: in tzicbe'enile' sa'at bey u máan iike'; j sa'at in ayikalil bey u samkajal jun p'éel múuyale'.

¹⁶Bejela'e', ma' taac in cuxtali'; nojoch yaj óolal dzo'oc u chupic in cuxtal.

¹⁷In ki'inamilo'ob dzo'oc u kuchul tac tin baaquelo'ob; ma' tu je'elel u beetic in mukyaj yéetel áakab.

¹⁸Kue' tu ch'a'ajen tin pachcabe', ca tu ch'úuyajen tin nook yéetel u muuk.

¹⁹Tu pulajen ich luuk je'el bix u ma'ay lu'um yéetel u ta'anil káake'.

²⁰In Ku, quin káatic áantaj ti' teech, ba'ale', ma' ta núuquic ti' teen, quin káat óoltic ti' teech, ba'ale' ma' ta wu'uyic in t'aan.

²¹Dzo'oc a dzu'uyquinticabáa ti' teen, ca ch'a'apachtiquen tu jaajil a wóol.

²²Ca beetic in bisa'al tumen iik, ca beetic in jíilta'al tumen chac ikal.

²³Tene' in wojel, teche' taac a bisiquen tu chi' quíimil, tu cúuchil tu'ux bíin xi'ic tuláacal j lu'umcabil.

²⁴¿Ca tucultic ma' in káat in wáant le óotzil dzo'oc xan in dzáic ba'al kabéet ti'o'?

²⁵¿Ma' wa j okolnaquen tu yéetel máax cu mukyaji'? ¿mix wa in ch'a'amaj óotzilil ti' máax nakan óotzil?

²⁶Tene', táan ca'ach in pa'atic le qui'imac óolo', ca j kuch le yaayaj óolalo' Táan ca'ach in pa'atic le sáasilo', ca j kuch le éekjoch'e'enilo'.

²⁷In pucsi'ikale', táan u cuculanquil x ma' je'elelil; chéen u kiinil mukyajo'ob pa'atiquen.

²⁸Jach sen yaj cuxliquen mina'an ti' teen u sáasilil kiin; quin káatic áantajil ti' tuláacal máac.

²⁹Beyen jun túul ba'alche' xúunp'atta'ane', beyen jun túul peek mina'an u yuumile'.

³⁰Dzo'oc u booxtal in woot'el, táan u yelel in wíinclil tu yéetel chocwil.

³¹U paax le arpaob yéetel le flautaobo', suunaj okolil yéetel ki'inamil in ti'al.