Read Yucateco Job 31 Bible Online

Job 31 - Yucateco bible

Job 31

¹Tene' tin dzaj tu juunal in wóol ma' in dzíiboltic mix le x ma' íichamo'obo'.

²¿Ba'ax bo'olal cu dzáic le sen Aj páajtalilo' líikbal tu ca'anile' ti' u jujun túul wíinic?

³¿Ma' wa ti' le j loolob máac yéetel ti' le j keban wíinic u najmal u bin kaasil ti'ob?

⁴¿Ma' wa tu yilic Ku ba'ax quin beetic mix tu táan óoltic tu'uxo'ob quin máan?

⁵Quin jalach t'antic mix jun téen yanac ti' teen kaakas tuucul, mix táabac ti' teen in tuus mix máaqui'.

⁶¡U p'isen Ku ti' jun p'éel ma'alob x ch'uyub p'iis!

⁷Wa dzo'oc in kéechel ti' u tojil cuxtale', wa dzo'oc in dzíiboltic in toquic ba'ax ma' in ti'ale', wa yaan ba'al ma' in ti'al dzo'oc u nactáanta'al tin wotoche',

⁸jaanta'ac tumen yaanal máaco'ob ba'axo'ob in pakmaj jo'ococ tac tu mootz in pakalo'ob.

⁹Wa dzo'oc in cha'ic in táabsa'al tumen jun túul co'olele' wa tumen tin dzajinbáa in ch'úuct u yatan in wéet caajale',

¹⁰bisa'ac in watan u ti'al x paliltzilta'an tumen yaanal máaco'ob ca chilaco'ob tu yéetel.

¹¹Tumen subtzil ba'axo'ob quin beetic; tumen ba'axo'ob quin beetique' cu najmatic jaadz.

¹²Tumen beyo'ob tóoc cu beetic loobe' je'el u kascuntic tuláacal ba'axo'ob yaan ti' tene'.

¹³Wa yaan ba'ax cu tzáico'ob ti' teen ca'ach palitzilo'obe', tene' quin táan óoltic ca'ach ba'axo'ob cu káatico'ob.

¹⁴¿Wa ma' beyo', bix bíin p'a'atac náadzal tu táan Ku? ¿Ba'ax bíin in núuc ti' le quéen u káat ti' teen ba'ax ti' beetaje'?

¹⁵tumen jun túulili' Junab Ku j beeto'on ich jobnel, je'el bix tu dzajilac cuxtal ti' leti'obe', bey tu dzajilac ti' teen xan.

¹⁶Le óotzilo'obo' mix jun téen tin p'atajo'ob x ma' áantajil ti' u yóotzilo'ob, mix tin cha'aj u máansico'ob wi'ij le x quimen íichamo'obo'.

¹⁷Mix jun téen tin juunal wa ma' yaan in dzáic ba'al u jaant le j ma' taataobo'.

¹⁸Ma' tin p'ataj in wáantic le j ma' taata, je'el bix u yáantaj jun túul taatae'; ma' tin p'ataj in wáantic le x quimen íichamo'obo'.

¹⁹Le quéen in wila'a ca'ach wa yaan máax táan u quíimil tu yo'olal mina'an u búuque', wa yaan jun túul óotzil mina'an u búuque',

²⁰yéetel u tzo'otzel in j tamano'obe' quin kíicuntic, leti' xane' cu dzáic ti' teen u nib óolalil.

²¹Mix jun téen tin sajbesaj jun túul j ma' taata chéen tumen quin bisiquimbáa yéetel le aj ilaj tacpoolo'obo'.

²²Wa ma' jaaj ba'ax quin wa'alique', ca cáachla'ajac u baaquelo'ob u muuko'ob in kab; ca quimpajac in queléembalo'ob.

²³¡Tene' sajaquen ca'ach ti' u jaadz Ku; ma' bíin páatac ca'ach in mukyajtic u jaadz u nojbe'enili'!

²⁴Mix jun téen in kub in alab óolal ti' le oroo'.

²⁵Mix jun téen in tucultmaj wa le ya'abcach ayikalilo'ob cu taasic ti' teen qui' óolal. wa in náajaltic ya'abcach taakin.

²⁶In wilmaj u juul le kiino' yéetel u ch'aacat le uj yéetel tuláacal u qui'ichpamil,

²⁷ba'ale' mix jun téen tin x mucul kultajo'ob, mix xan tin túuxtaj ti'obi' dzu'udzo'ob yéetel in kabi'.

²⁸Tumen le ba'alo'ob beya' cu najmatico'ob jaadz; ¡tumen wa ca in beet ba'al beyo', óoli' bey ca in wa'al mina'an u Kuil ca'ane'!

²⁹Mix jun téen utzchaj tin wóol u bin kaasil ti' in aj p'eec, mix wa ca taalac ca'ach jun p'éel loob tu yóokol.

³⁰Jach mix jun téen tin loolob t'antaj, mix xan ca in dzíibolt ca quíimic.

³¹Wa yaan ca'ach in wéet ich najilo'ob, ca u yóolto'ob u beetico'ob kaas ti' jun túul j táanxel lu'umile',

³²tene', ma' tin cha'ic u máansic áakab chéen j bej. jach mix jun téen j p'áat ma' in je'ic u jool in wotoch ti' u'ula'ob.

³³Mix jun téen in mucultmaj in si'ipilnaja'ano'ob, je'el bix u beetico'ob u chuucáano'obe', mix xan tin ta'acbesajo'ob

³⁴tu yo'olal in sajaquil ti' le caajo'. Mix jun téen xan tin macaj in chi' tu yo'olal in sajaquil ti' u kex óol in láako'ob.

³⁵¡Quexi' ca ch'en xiquinta'aquen tumen wa máaxe'! Yéetel in dzíibe' je'el in jajcuntic le ba'ax dzo'oc in wa'alica'; bejela'e', ¡Núuca'ac ti' teen tumen le sen Aj Páajtalilo'! Tuláacal tacpool cu beeta'alo'ob ti' dzi'ibtbile',

³⁶bíin in bis tin wéetel x ma' subtalil; bíin in dzáa tin pool bey péet jo'ole'.

³⁷Teen bíin in cáant ti' Ku tuláacal ba'axo'ob quin beetic, bíin in nadzinbáa x ma' subtalil tu táan.

³⁸In lu'umo'obe', ma' tu taquico'ob in pool j ca'an, mix u t'óolol le pakalo'ob cu yokolo'ob yéetel yaj óolal.

³⁹Ba'ale', wa yaan máax dzo'oc in wocoltic u yich u meyaj, wa xan dzo'oc in yedzic u muuk le j col náalo'obo',

⁴⁰Jóokoc ki'ixo'ob tu'ux in pakmaj trigo, yéetel j loolob xíiwo'ob tu'ux in pakmaj cebada.