Read Yucateco Job 32 Bible Online

Job 32 - Yucateco bible

Job 32

¹Le ca tu yilaj le óox túul j xiibo'ob xi'ic u bin u ya'alic Job ma' sipilnaja'ane', tu xulajo'ob u babal t'aano'ob tu yéetel.

²Jun túul j xiib túun cu kaaba'intic Eliú, u paal Baraquel buzita, u ch'i'ibal Ramae', ma' j páatchaj u muclic u p'uja'anil ti' Jobi', tumen tu yu'ubaj táan u sen a'alic ma' si'ipilnaja'ani' chéen táan u ja'adzal tumen Ku.

³Ba'ale' j p'u'uj xan tu yo'olal u yóox túul u yéet j bisajbáilo'ob Job, tumen ma' tu caxtajo'ob bix u núuquico'ob u t'aan jobi', tumen tu cha'ajo'ob u ya'alic, ti' Ku yaan u si'ipilnaja'anil ba'ax cu yúuchul ti' Job.

⁴Bey tumen Eliu u asab táanquelmilo'obo', tu pa'ataj u jáawal u t'aano'ob tu yóox túulalo'ob yéetel Jobo';

⁵ba'ale' le ca tu yilaj ma' tu caxtico'ob bix je'el u núuquico'ob u t'aan Jobe', ma' j páatchaj u p'áatal ma' u t'aani',

⁶Eliú u paal Baraquel buzitae', j t'aanaje' ca tu ya'alaj. Bey tumen táan in wilic nucuch máaque'ex tin tzéele', ma' tin wóoltaj in wa'al ba'ax quin tucultiqui'.

⁷Ca tin tucultaj: Unaj u t'aan máaxo'ob u yojelo'ob ba'ax cu ya'alico'ob; tumen ya'ab ba'ax u yojelo'ob tu yo'olal u ya'abil u ja'abilo'ob.

⁸Quex tu jaajile', tuláacal wíinic yaan u na'at, tumen le sen Aj Páajtalilo' u dzaamaj u pixan ti'.

⁹Le ya'abcach ja'abilo'obo', ma' tu beetic aj ojéelajil mix máac, Mix le nuxibil cu taasic nu'uca'an kaj óolalil.

¹⁰Let o'olal quin káatic ti' te'ex: Ca a ch'en xiquintene'ex bejela'e', tumen tene', yaan xan ba'axo'ob bíin in wa'alej.

¹¹Tene', tin ch'en xiquintaj ma'alob, tin wu'uyaj ba'axo'ob ta wa'alaje'ex. Tin wilaj bix a caxticaba'ex u asab ma'alobil t'aano'ob,

¹²dzo'oc xan in wilic mix jun túul ti' te'ex páatchaj u núuquic ti' job ba'ax kabéet u ya'ala'al ti'i'.

¹³Bey túuno' u ti'al ma' a tuculticaba'ex sen aj ojéelaje'exe', Ku, ma' chéen wíinico'ob bíin núuquic u t'aan Jobi'.

¹⁴Ba'ale' mix Job u yóolt t'aan tin wéeteli', mix xan teen bíin t'aanaquen je'el bix úuchic a t'anique'exo'.

¹⁵Job, le óox túul máaco'oba' saatal u yóolo'ob, ma' tu caxtico'ob ba'ax u ya'alo'ob ti' teech;

¹⁶Ba'ale', ma' a tucultic wa bíin in mac in chi' chéen tumen cu maquico'ob u chi'ob, wa tumen ma' tu caxtico'ob ba'ax u ya'alo'ob ti' teech.

¹⁷Bin in ca'aj táacpajal ti' le tzicbala', in ca'aj in wa'al ba'ax kabéet in wa'alic.

¹⁸sen ya'ab ba'axo'ob yaan in wa'alej ma' tu páajtal in maquic in chi';

¹⁹Ta'itac in xíiquil, beyen le vino cu xiquic le túumben chúuj tu'ux cu ka'alalo'.

²⁰Yaan in t'aan u ti'al u jóomol in wóol, yaan in wa'alic ti' teech ba'ax u najmal.

²¹Ma' bíin in báay jo'olt mix máaqui'; bíin in t'ane'ex jun tacáalili'.

²²Tu jaajile', ma' suuc in báay jo'oltic mix máaqui'; ¡le Máax betmailo'ono', bíin u jadzen wa ca in beet beyo'!