Read Yucateco Job 33 Bible Online

Job 33 - Yucateco bible

Job 33

¹Job, let o'olale' ch'en xiquint in t'aano'obi'; táan óolt ba'axo'ob bíin in wa'al ti' techi'.

²Ti' yaan tin chi' le ba'ax u najmal in núuquic:

³in ca'aj t'aan yéetel jaaj óolal, bin in ca'aj in wa'al ti' teech ba'ax quin tucultic.

⁴Ku, le sen Aj Páajtalil, leti' j beeten, u yooxow u chi' j dzáa in cuxtal.

⁵Wa ca páajtale', núuc ba'ax quin in wa'alej; tucult ma'alob ba'ax ca bin a núuc ti' teen, pact in wichi'.

⁶Tu ca'a túulalo'on, láajqueto'on tu táan Ku; tene', láili' j pa'aten yéetel kate'.

⁷Let o'olalo', mina'an ba'ax o'olal a ch'a'ic sajaquil ti' teen, ma' a tucultic wa bíin in ca'aj in wa'al ti' teech ca a dzo'ocbes in t'aani'.

⁸Bey in wóol tin wu'uyaj a wa'alic beya':

⁹Tene', utz in cuxtal, mina'an in si'ipil, ma' in beetmaj mix jun p'éel kebani'.

¹⁰Ba'ale' Kue' táan u taquic in pool, táan xan u beetic ti' teen je'el bix u beetic ti' u aj p'eeque',

¹¹dzo'oc u kaxic in wooco'ob tu yéetel cadenaob, táan u ch'úuctic tuláacal tu'ux quin máan.

¹²Ba'ale', ma' jaaj ba'axo'ob ca wa'aliqui', tumen Junab Kue' asab nojoch ti' wíinico'ob.

¹³¿Ba'axten ca pajic subtal tu yo'olal ma' tu núuquic mix jun p'éel a káat chi'ob?

¹⁴Ya'ab u jejeláasil bix u t'aan Ku, ba'ale' to'one' ma'atech c táan óoltic.

¹⁵Yaan kiino'ob cu t'aan yéetel áakab ichil jun p'éel wayak wa ichil jun p'éel náay, ca'aliquil táan u wenel le wíinico'obo' wa quéen t'úubuco'ob ichil u wenelo'ob.

¹⁶Kue' cu t'aan tu jool u xiquin le wíinico'ob; cu ya'alic u nu'uc ti'ob cu beetic u sen sajactalo'ob,

¹⁷u ti'al u jun páaycuntico'ob ti' ba'alo'ob kaastac cu beetico'ob u ti'al u yilico'ob ma' utz le x ca'anal ichilo'.

¹⁸Beyo', cu to'ocolo'ob ti' le mucnalo' cu jáanpayta'alo'ob ti' le quíimilo'.

¹⁹ba'ale' Kue' yaan kiine' cu ya'alic u nu'ucul ti' wíinic yéetel koja'anilo'ob, bey xan tu yéetel yaayaj ki'inamilo'ob tu wíinclil.

²⁰Je'el ba'alac janalile', quex seten qui' cu taaccunsa'al u xe'ob tumeno'ob.

²¹Cu bin u dzo'oyolo'ob tac u baaquelo'ob cu jo'op'ol u chíicpajal.

²²U cuxtale' cu kuchul tac tu jool mucnal, cu kuchul tac tu chi' quíimil.

²³Ba'ale', wa yaan jun túul ángel naadz ti'e', jun túul ich mil ca káat óolnac tu yo'olal ca u jajcunt u tojil u cuxtal,

²⁴ca u ch'a'a óotzilil ti' u ti'al u káat óoltic ti' Ku: Toc ti' le quíimilo', tumen dzo'oc in caxtic u tojol u ma'anal,

²⁵bíin utzac túun ti' u koja'anil, bíin p'áatac bey tu táanquelemil tu ca'a téene'.

²⁶Le quéen káat óolnac ti' Kue', bíin u'uya'ac; yéetel qui'imac óolal quetlan yich bíin u pact Ku, bíin u kay ti' le wíinico'ob u ch'a'a óotzilil Ku.

²⁷Bíin u ya'al beya': Kebanchajen, tin beetaj ba'axo'ob ma' tu beeli', ba'ale' Kue', ma' tu yóoltaj u jadzeni';

²⁸ba'ale' tu tocajen ti' le quíimilo', láili' cu páajtal in wilic u sáasil tac bejela'e'.

²⁹Kue' bey u utz ti' wíinic ya'ab u téenelo';

³⁰Cu toquic ti' quíimil, cu cha'ic u p'áatal cuxa'an ich sáasil.

³¹Job, ch'en xiquinten ma'alobi'; mac a chi' ca'aliquil táan in t'aan.

³²Wa yaan ba'ax a káat a wa'al ti' tene', a'al teen; wa jaaj ba'ax bíin a wa'ale', quin éejemtic yéetel qui'imac óolal;

³³ba'ale' wa ma' a káat t'aane', ch'en xiquinten ma'alobi', in ca'aj ca'anbesech u ti'al ca yanac a ojéelaj.