Read Yucateco Job 34 Bible Online

Job 34 - Yucateco bible

Job 34

¹Cu dzo'ocole', Eliue', tu ya'alaj xan: Te'exe', aj ojéelaje'ex yéetel aj canbalnaja'ane'ex, u'uye'ex in t'aano'ob.

³Le xiquino', u yojel ba'ax cu ya'ala'al, je'el bix le chi' cu yu'ubic u qui'il le janalo'.

⁴Bey túuno' cone'ex xakal tucultic le ba'ala', co'ox utzil c tucultique'ex ba'ax ma'alob.

⁵Jobe' cu sen a'alic: Tene' mix jun p'éel ba'al kaas in beetmaj, ba'ale' Kue', ma' tu yóoltic u beet ba'ax tu beel tin wéetel.

⁶Chéen tuusil ca in wa'al wa si'ipilnaja'anen; in yajile' ma' tu yutztal, quex tumen ma' kebanchaja'aneni'.

⁷¡Mina'an u láak wíinic je'el bix Jobe'! cu p'a'astic Ku bey je'el bix u yu'ukul ja'e';

⁸utz tu yóol u nupicubáa yéetel j loolob máaco'ob, u ti'al u múul xíimbal ichil j loolob máaco'ob.

⁹Cu ya'alic mix ba'al u biilal ti' wíinic u dzáubáa utzil tu táan Ku.

¹⁰Ba'ale', te'exe' wíinique'ex ti'ibil a tuucule'ex ch'en xiquintene'exi'. ¡Mix a chéen tucultique'ex wa je'el u beetic Junab Ku le sen Aj Páajtalil jun p'éel ba'al kaas, wa ba'ax ma' tu beeli'!

¹¹Leti'e', cu dzáic ti' tu jujun túulil u bo'olal ba'ax cu beetic; cu beetic u kamic tu jujun túulil ba'ax cu najmatic.

¹²Tu jaajile', Junab Ku le sen Aj Páajtalilo', ma' teech u beetic mix ba'al kaas, wa ba'ax ma' tu beeli';

¹³ti' mix máac tu kamaj le páajtalil u ti'al u méektáantic tuláacal u yóokolcaabi'.

¹⁴Wa cu lukesic u múus iikil cuxtal ti' le máaco'obo', tuláacalo'ob cu quíimilo'ob jun táacalili', je'el u ca'a suuto'ob ti' le lu'umo'.

¹⁶Wa wíiniquech ti'ibil a tuucule', u'uyeni'; ch'en xiquint ma'alob in t'aano'ob.

¹⁷Wa tumen wa ca u p'ect Ku ba'al tu beele', ma' tu páajtal u méektáan.

¹⁸Wa kasa'antaco'ob le ajawo'ob wa kasa'antaco'ob xan le dzuulo'obo', Kue', ma' tu cóomtal u yóol u ya'alic tu táan yicho'ob.

¹⁹Leti'e', ma' tu dzáicubáa chéen tu tzéel le aj méektáano'obo', mix tu beetic ya'ab utz ti' le ayikalo'ob asab ti' le óotzilo'obo', tumen leti' láaj beetmailo'ob.

²⁰Le wíinico'obo', cu quíimilo'ob jun súutuc, chúumuc áakab; le caajo', cu x wo'oquin cu dzo'ocole' cu samkajal, le wíinic yaan u páajtalilo' cu xu'ulul quex mix máac beetic loob ti'.

²¹Kue' cu canantic u cuxtal le j xiibo', u yojel xan tu'ux cu máan.

²²Mina'an sen éekjoch'e'enil ca páatac u balic ba'ax cu beetic le j loolob máaco'.

²³Kue', ma' tu ya'alic ti' le wíinic ba'ax kiin unaj u bin tu táan u ti'al u cáant si'ipili'.

²⁴Ma' kabéet u káat péectziltic bix je'el u páajtal u pitkesic tu káanche'ob le dzuulo'ob u ti'al ca u culquint u láako'obi'.

²⁵Kue' u yojel ba'ax cu beetico'ob, cu kuchul le áakabo' cu láaj xu'ulsico'ob.

²⁶Cu jadzláantic bey u ja'adzal quíimsaj wíinico'ob tu táan yich tuláacal le caajo',

²⁷Tumen ma' tu yóoltajo'ob u yu'ubo'ob u t'aani', ma' xan j cuxlajo'ob je'el bix u ya'almajile'.

²⁸Tu beetajo'ob u kuch'ul tac tu yicnal Ku u yawat okol le óotzilo'ob yéetel le máaxo'ob tu yedzajo'obo', ca j u'uya'ab u yokolo'ob tumen Ku.

²⁹Ba'ale', wa ma' tu t'aan Kue', ¿máax bíin xot kintic? wa cu balic u yiche', ¿máax bíin ilic? Leti' canantic le caajo'ob, leti' xan canantic le wíinico'ob

³⁰u ti'al ma' u méektáanta'al le caaj mix u tu'usul tumen jun túul loolob máac.

³¹¿Dzo'oc wa a wa'alic ti' Ku: Tin cha'aj in tu'usul, ma' bíin ca'a kebanchajaqueni'.

³²E'es ti' teen le si'ipilo'ob ma' tin wilico'. Wa dzo'oc in beetic ba'ax kaase', ma' bíin suunaquen in beeti'?

³³¿A káat loobal ca u bo'otech Ku je'el bix utz ta t'aanne', quex tumen dzo'oc a cúulpaachcuntic? Bey tumen teech beetic ba'ax ca tucultico', ma' teni', a'al to'on ba'ax a wojel.

³⁴Le aj ojéelajo'ob cu ch'en xiquintiqueno'ob, yéetel le máaxo'ob ma'alob u tuuculo'obo', bíin u ya'alo'ob ti' teen:

³⁵Jobe', chéen táan u t'aan ma' u yojel ba'ax cu ya'aliqui'; u t'aano'obe' mix ba'al u káat u ya'ale.

³⁶¡Jobe' unaj u jach ma'alob tucultic ba'ax cu ya'alic, tumen u t'aane' u t'aan je'el bix jun túul j loolob máaque'!

³⁷Jobe' ma' chéen jun túul aj kebani', ba'ale' jun túul j dzu'uy pool; tu táan cu p'a'astic Ku, cu dzicubáa tutuc chi' tu yéetel.