Read Yucateco Job 35 Bible Online

Job 35 - Yucateco bible

Job 35

¹Eliue', j t'aanaj tu yóox téene' ca tu ya'alaj: ¿Job ca tucultic tu beel ba'ax ca wa'alic Kue' u najmal ya'alic tu beel ba'ax ca wa'alic?

³Tumen teche' ta wa'alaj ti' Ku: ¿Ba'ax a káat ti' wa ca kebanchajquen? ¿Ba'ax kaasil cu beetic ti' teech in keban?

⁴Ma'alob, bin in ca'aj in núuc a t'aan, yéetel u t'aan a wéet bisajba'ob.

⁵Il ma'alob le ca'ano', il xan buca'aj ca'analil yanil le múuyalo'ob yaan ta wóokolo'.

⁶Wa ca kebanchajale', mix ba'al cu yúuchul ti' Ku; quex buca'aj ca kebanchajaquech, mix ba'al je'el a beetic ti'e'.

⁷Wa ma'alob ba'ax ca beetique', mix ba'al ca dzáic ti'; ma' xan ta beetic mix jun p'éel utz ti'.

⁸Ti' wíinico'ob je'el bixecho' cu beeta'al kaas ti'ob tumen le kebano', leti'ob cu beeta'al utz tumen le ma'alob ba'alo'ob ca beetico'.

⁹Le wíinico'obo', cu yawato'ob tu yáanal yaayaj palitzilil, cu caxtico'ob máax toquico'ob tu kab le j mu'uka'an máaco'obo';

¹⁰ba'ale', ma' tu caxtico'ob Ku le máax beetmailo'obo', le máax cu dzáic muuk ichil u talamil le mukyajo',

¹¹ti' le máax cu ca'anbesico'on yéetel u cuxtal le ba'alche'ob bey xan yéetel u cuxtal le ch'íich'o'obo'.

¹²Cu yawat t'aano'ob, ba'ale' ma' tu núuca'al ti'ob tumen Ku, tumen sen loolob máaco'ob yéetel sen ca'anal u yicho'ob.

¹³Junab Ku le sen Aj Páajtalilo', ma' tu táan óoltic tuuso'ob.

¹⁴Quex ca wa'alic ma' ta wilic Kue', pa'ate, tumen le ba'ax cu yúuchul ti' techo' ti' yaan ta táane'.

¹⁵Teche' ca wa'alic, leti'e' ma' tu p'u'ujul, mix xan tu jaadz, ma' xan tu dzáicubáa u yil le kebano'.

¹⁶¡Ba'ale', Job, teche' ma' nu'uca'an ba'axo'ob ca wa'aliqui', ya'ab a t'aan, ba'ale' x ma' ojéelajil a t'aan!